ଚଣ୍ଡିଖୋଲ,୧। ୯(ଡି.ଏନ.ଏ.): ଦୁଇ ଦିନ ହେଲା ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେଉଛି, ଯେଉଁଥିରେ ଜଣେ ଛାତ୍ରଙ୍କୁ ରାସ୍ତାରେ ଅନ୍ୟ କିଛି ଛାତ୍ର ଗୋଡ଼େଇ ଗୋଡ଼େଇ ଠେଙ୍ଗାରେ ପିଟୁଛନ୍ତି। ହତ୍ୟା ଧମକ ମିଳିବା ପରେ ପୀଡ଼ିତଙ୍କ ବାପା ମଙ୍ଗଳବାର ଲିଖିତ ଅଭିଯୋଗ କରିଛନ୍ତି ବାଲିଚନ୍ଦ୍ରପୁର ଥାନାରେ। ଏଥି ସହ ସାମ୍ନାକୁ ଆସିଛି ପୂରା ଘଟଣା।
ଅଭିଯୋଗରେ ଦର୍ଶାଯାଇଛି, ବାଲିଚନ୍ଦ୍ରପୁର ଥାନା ଅଧୀନ ବାଲିକୁଦା ଗ୍ରାମର ଅନିରୁଦ୍ଧ ଦଳାଇଙ୍କ ପୁଅ ରାଜା ବରୀ ବ୍ଲକ ସ୍ଥିତ ଏକ ମହାବିଦ୍ୟାଳୟରେ ଅଧ୍ୟୟନ କରନ୍ତି। ପାଞ୍ଚ ମାସ ତଳେ ଅର୍ଥାତ ମାର୍ଚ୍ଚ ୧୬ରେ ରାଜା ମହାବିଦ୍ୟାଳୟରୁ ଫେରୁଥିଲେ। ବାଲିଚନ୍ଦ୍ରପୁର ଥାନା ଅଧୀନ ବରପଦା ପଞ୍ଚାୟତ ପଙ୍କହୁଡ଼ା ଛକ ନିକଟରେ ରାଜାଙ୍କୁ ହଠାତ୍ ଠେଙ୍ଗାରେ ଆକ୍ରମଣ କରିଥିଲେ ୫ଜଣ ଛାତ୍ର। ରାଜା ପ୍ରାଣ ବିକଳରେ ଦୌଡୁଥିବା ବେଳେ ଗୋଡ଼ାଇ ଗୋଡ଼ାଇ ବାଡ଼େଇଥିଲେ ସହପାଠୀ। ଏହି ଦୃଶ୍ୟକୁ ମୋବାଇଲରେ ଉତ୍ତୋଳନ କରିଥିଲେ ବାଡ଼େଇଥିବା ଛାତ୍ରଙ୍କ ମଧ୍ୟରୁ ଜଣେ। ସେତେବେଳେ ମାଡ଼ ମାରିଥିବା ଛାତ୍ରଙ୍କ ଅଭିଭାବକ ଓ କେତେଜଣ ମୁରବୀଙ୍କ ହସ୍ତକ୍ଷେପ ପରେ ଆପୋସ ସମାଧାନ ହୋଇଥିଲା। ମାତ୍ର ଏବେ ସେହି ସହପାଠୀମାନେ ରାଜାଙ୍କୁ ଜୀବନରୁ ମାରିଦେବାକୁ ଧମକ ଦେବା ସହ ପାଞ୍ଚ ମାସ ତଳର ଭିଡିଓକୁ ଭାଇରାଲ କରି ଦେଇଛନ୍ତି।
ସୋସିଆଲ ମିଡିଆରେ ୩ ମିନିଟର ଭିଡିଓ ଭାଇରାଲ ହେବା ପରେ ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇବା ସହ ଏଭଳି ହିଂସା ଆଚରଣ କରିଥିବା ଛାତ୍ରଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ଉଠିଛି। ଗଣ୍ଡଗୋଳ କରୁଥିବା ଛାତ୍ରମାନେ ମହାବିଦ୍ୟାଳୟର ୟୁନିଫର୍ମ ପିନ୍ଧି ଥିବାରୁ ଘଟଣା ବରୀ ଅଞ୍ଚଳରେ ଘଟିଥିବା ଆଲୋଚନା ହେଉଥିଲା। କିନ୍ତୁ ମଙ୍ଗଳବାର ରାଜାଙ୍କ ବାପା ଥାନାରେ ଅଭିଯୋଗ କରିବା ପରେ ଘଟଣାଟି ବାଲିଚନ୍ଦ୍ରପୁର ଥାନା ଅଞ୍ଚଳର ବୋଲି ସ୍ପଷ୍ଟ ହୋଇଛି। ଏନେଇ ଥାନାଧିକାରୀ ବିଜୟନୀ ମଲ୍ଲଙ୍କୁ ପଚାରିବାରେ ସେ କହିଛନ୍ତି, ଅଭିଯୋଗ ଆଧାରରେ ମାମଲା ରୁଜୁ ହୋଇଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ହେବ।
