ଭୁବନେଶ୍ୱର,୫ା୭(ବ୍ୟୁରୋ): ବିଜେବି କଲେଜ ଛାତ୍ରୀ ରୁଚିକା ମହାନ୍ତିଙ୍କ ଆତ୍ମହତ୍ୟା ଘଟଣାକୁ ନେଇ ରାଜ୍ୟ ସରକାରଙ୍କୁ ଏବେ ବିରୋଧୀ ଟାର୍ଗେଟ କରିବା ଆରମ୍ଭ କରି ଦେଇଛନ୍ତି। ଏପରିକି ରୁଚିକାଙ୍କ ପରିବାର ଲୋକ ମଧ୍ୟ ଦୋଷୀଙ୍କୁ ଧରିବା ଦାବିରେ କଲେଜ ବାହାରେ ଧାରଣାରେ ବସିଛନ୍ତି। ସୋମବାର ବିଧାନସଭା ଭିତରେ ବିରୋଧୀ ଏହି କଥା ଉଠାଇ ସରକାରଙ୍କୁ ଘେରିଥିବା ବେଳେ ଛାତ୍ର କଂଗ୍ରେସ ମଧ୍ୟ ଆନ୍ଦୋଳନକୁ ଜୋରଦାର କରିଛି।
ରୁଚିକାଙ୍କୁ ନ୍ୟାୟ ଏବଂ ଦୋଷୀଙ୍କୁ ତୁରନ୍ତ ଗିରଫ କରିବା ଦାବିରେ ଛାତ୍ର କଂଗ୍ରେସ କର୍ମୀମାନେ ରାଜଭବନଠାରୁ ଏକ ବାଇକ ଶୋଭାଯାତ୍ରା କରିଥିଲେ। ଛାତ୍ର କଂଗ୍ରେସ କର୍ମୀମାନେ ଶୋଭାଯାତ୍ରାରେ ରାଜଭବନରୁ ବାହାରି ବିଧାନସଭା ଘେରାଉ କରିବାକୁ ଉଦ୍ୟମ କରୁଥିବା ବେଳେ ଲୋୟର ପିଏମ୍ଜି ନିକଟରେ ପୋଲିସ ରହିବା ସହ ସେହି ରାସ୍ତାକୁ ସମ୍ପୂର୍ଣ୍ଣ ଭାବେ ବନ୍ଦ କରି ଦେଇଥିଲେ। ଛାତ୍ର କଂଗ୍ରେସ କର୍ମୀମାନେ ସେଠାରେ ପହଞ୍ଚିବା ପରେ ବାଉଁଶ ବାଡ ଡେଇଁ ବିଧାନସଭା ଆଡକୁ ପଶିବାକୁ ଚେଷ୍ଟା କରିଥିଲେ। ହେଲେ ଏହି ସମୟରେ ପୋଲିସ ଏବଂ ଛାତ୍ର କଂଗ୍ରେସ କର୍ମୀଙ୍କ ମଧ୍ୟରେ ମୁହାଁମୁହିଁ ସ୍ଥିତି ସୃଷ୍ଟି ହୋଇଥିଲା। ଛାତ୍ର କଂଗ୍ରେସ କର୍ମୀମାନେ ଏହି ଅବସରରେ ରାଜ୍ୟ ସରକାରଙ୍କ ବିରୋଧରେ ସ୍ଲୋଗାନ ଦେବା ସହିତ ରାଜ୍ୟର ଆଇନ ଶୃଙ୍ଖଳା ପରିସ୍ଥିତି ସମ୍ପୂର୍ଣ୍ଣ ଭୁଶୁଡି ପଡିଥିବା କହିଥିଲେ। ଫଳରେ ପାଖାପାଖି ଘଣ୍ଟାଏ ଧରି ସେହି ସ୍ଥାନରେ ପୋଲିସ-ଛାତ୍ର କଂଗ୍ରେସ କର୍ମୀଙ୍କ ଭିତରେ ମୁହାଁମୁହିଁ ସ୍ଥିତି ସୃଷ୍ଟି ହୋଇଥିଲା। ଏଥିରେ ଛାତ୍ର ସଭାପତି ୟାସିର ନଓ୍ବାଜଙ୍କ ସମେତ ୧୨ ଜଣ ଆହତ ହୋଇଥିବା ଦଳ ତରଫରୁ କୁହାଯାଇଛି। ପୋଲିସ ୨୦ରୁ ଅଧିକ କର୍ମୀଙ୍କୁ ଅଟକ ରଖିଥିବା ବେଳେ ପରବର୍ତ୍ତୀ ସମୟରେ ଛାଡ଼ି ଦେଇଛି।
ଏହି ଅବସରରେ ୟାସିର ଗଣମାଧ୍ୟମକୁ ସୂଚନା ଦେଇ କହିଛନ୍ତି, ଏହି ଘଟଣାକୁ ଚପାଇ ଦେବା ଲାଗି ସରକାର ଚେଷ୍ଟା କରୁଛନ୍ତି। ତେଣୁ ପୋଲିସର ତଦନ୍ତ ଅତ୍ୟନ୍ତ ମନ୍ଥର ଗତିରେ ଚାଲିଛି। ଉଚ୍ଚଶିକ୍ଷା ସଚିବ ଏହି କଥାରେ ମୁହଁ ଖୋଲୁନାହାନ୍ତି। କଲେଜ ପ୍ରିନ୍ସିପାଲ, ହଷ୍ଟେଲ ସୁପରିଣ୍ଟେଣ୍ଡେଣ୍ଟ ଏବଂ ଓ୍ବାର୍ଡନ ମିଶିି କେତେଜଣ ଛାତ୍ରୀଙ୍କୁ ସେଠାରୁ ଖସାଇ ଦେଇଛନ୍ତି। ଏହି ଅଧିକାରୀମାନଙ୍କୁ ତଦନ୍ତ ପରିସରକୁ ଅଣାଯାଉ। ବିଭିନ୍ନ ସରକାରୀ ମହାବିଦ୍ୟାଳୟ ଏବଂ ବିଶ୍ୱବିଦ୍ୟାଳୟରେ ରାଗିଂ ହେଉଥିବା ବେଳେ ଉଚ୍ଚଶିକ୍ଷା ସଚିବ ନୀରବ ରହିବା ଆଶ୍ଚର୍ଯ୍ୟ କରୁଛି। ସେପଟେ କରୋନା ଆଳରେ ଉଚ୍ଚଶିକ୍ଷା ମନ୍ତ୍ରୀ ଆତ୍ମଗୋପନ କରି ରହିଛନ୍ତି। ତୁରନ୍ତ ଦୋଷୀକୁ ଚିହ୍ନଟ କରି ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯାଉ। ମୃତକଙ୍କ ପରିବାରକୁ ୫୦ ଲକ୍ଷ ଟଙ୍କାର ଅନୁକମ୍ପା ରାଶି ପ୍ରଦାନ କରାଯାଉ। କଲେଜ ପ୍ରିନ୍ସିପାଲ, ହଷ୍ଟେଲ ସୁପରିଣ୍ଟେଣ୍ଡେଣ୍ଟ ଏବଂ ଓ୍ବାର୍ଡନଙ୍କୁ ତଦନ୍ତ ପରିସରକୁ ଅଣାଯାଉ, କାରଣ ସେମାନଙ୍କ ଜାଣତରେ ସେଠାରେ ରାଗିଂ ହେଉଥିବା ନଓ୍ବାଜ କହିଛନ୍ତି।