ପରଜଙ୍ଗ, ୧୭।୯(ଡି.ଏନ୍.ଏ.): ଢେଙ୍କାନାଳ ଜିଲା ପରଜଙ୍ଗ ବ୍ଲକ ସରାଙ୍ଗସ୍ଥିତ ଇନ୍ଦିରା ଗାନ୍ଧୀ ବୈଷୟିକ ଶିକ୍ଷାନୁଷ୍ଠାନ (ଆଇଜିଆଇଟି)ରେ ପଢୁଥିବା ଜଣେ ବି-ଟେକ୍ ଶେଷବର୍ଷ ଛାତ୍ର ନିଖୋଜ ହୋଇଯାଇଛନ୍ତି। ସେ ହେଲେ କେନ୍ଦୁଝର ଜିଲା ଆନନ୍ଦପୁର ଅଞ୍ଚଳର ସନ୍ଦୀପ କୁମାର ଜେନା। ସନ୍ଦୀପ ରହୁଥିବା ବ୍ରହ୍ମୋସ ଛାତ୍ରାବାସ ପ୍ରକୋଷ୍ଠରୁ ଏକ ଚିଠି ମିଳିଛି। ସୁପରିଣ୍ଟେଣ୍ଡେଣ୍ଟ ଏବଂ ଓ୍ବାର୍ଡେନ୍ଙ୍କ ଦ୍ୱାରା ମାନସିକ ନିର୍ଯାତନାର ଶିକାର ହୋଇ ଛାତ୍ରଜଣକ ଏଭଳି ପଦକ୍ଷେପ ନେଇଥିବା ଏଥିରେ ଉଲ୍ଲେଖ ରହିଛି। ଘଟଣା ପ୍ରଘଟ ହେବା ପରେ ଶତାଧିକ ଛାତ୍ର ଶିକ୍ଷାନୁଷ୍ଠାନ ମୁଖ୍ୟ ଫାଟକ ସମ୍ମୁଖରେ ଧାରଣାରେ ବସିଛନ୍ତି। ଏହି ଘଟଣାକୁ ନେଇ କଲେଜ କ୍ୟାମ୍ପସ୍ରେ ଚାପା ଉତ୍ତେଜନା ଲାଗି ରହିଥିବାବେଳେ ପୋଲିସ ପହଞ୍ଚତ୍ ବୁଝାଶୁଝା କରୁଛି।
ଉକ୍ତ ଚିଠିରେ ଉଲ୍ଲେଖ ରହିଛି, ଗୁରୁବାର ରାତିରେ ସନ୍ଦୀପ ଆଇଜିଆଇଟି ପରିସରରେ ଥିବା ସୂର୍ଯ୍ୟଭବନରୁ ବ୍ରହ୍ମୋସ ଛାତ୍ରାବାସକୁ ଏକାକୀ ଚାଲି ଚାଲି ଆସୁଥିଲେ। ଏହି ସମୟରେ ନିଶାସକ୍ତ ଅବସ୍ଥାରେ ଓ୍ବାର୍ଡେନ୍ ରବୀନ୍ଦ୍ର ବେହେରା ଏବଂ ସୂର୍ଯ୍ୟଭବନ ସୁପରିଣ୍ଟେଣ୍ଡେଣ୍ଟ ଉମାକାନ୍ତ ବେହେରା ତାଙ୍କୁ ଅଶ୍ଳୀଳ ଭାଷାରେ ଗାଲିଗୁଲଜ କରିଥିଲେ। ତାଙ୍କ ମା’ଙ୍କୁ ଫୋନ୍ କରି ହଷ୍ଟେଲରୁ ବାହାର କରିଦେବାକୁ ଧମକ ଦେଇଥିଲେ। ଏଥିରେ ମାନସିକ ଭାରସାମ୍ୟ ହରାଇ ସନ୍ଦୀପ ହଷ୍ଟେଲରୁ କୁଆଡ଼େ ପଳାଇଛନ୍ତି। ଯଦି ତାଙ୍କର କିଛି ବି ସୁବିଧା ଅସୁବିଧା ହୁଏ, ତେବେ ଏଥିଲାଗି ଓ୍ବାର୍ଡେନ୍ ଦାୟୀ ରହିବେ ବୋଲି ଚିଠିରେ ଉଲ୍ଲେଖ ରହିଛି। ଏଥିସହ ଛାତ୍ରଜଣକ ଶେଷରେ ‘ସରି ବୋଉ’ ଲେଖି ତାଙ୍କ ମା’ଙ୍କୁ କ୍ଷମାପ୍ରାର୍ଥନା କରିଛନ୍ତି।
ହଷ୍ଟେଲର ଜଣେ ଛାତ୍ର ନିଖୋଜ ଥିବା ଜଣାପଡ଼ିବା ପରେ ଅପରାହ୍ନରେ କଲେଜର ବହୁ ଛାତ୍ର ବିକ୍ଷୋଭ ଆରମ୍ଭ କରିଛନ୍ତି। ସମ୍ପୃକ୍ତ ଦୁଇ କର୍ମଚାରୀଙ୍କୁ ତୁରନ୍ତ କାର୍ଯ୍ୟାନ୍ତର କରିବାକୁ ସେମାନେ ଅଡ଼ି ବସିଛନ୍ତି। ଏଥିସହ ନିଖୋଜ ଛାତ୍ରଙ୍କୁ ଖୋଜି ବାହାର କରିବା ଦାବିରେ ଅଟଳ ରହିଛନ୍ତି। ପୋଲିସ ପହଞ୍ଚତ୍ ଉତ୍ତ୍ୟକ୍ତ ଛାତ୍ରଙ୍କୁ ବୁଝାଶୁଝା କରିଥିଲେ ମଧ୍ୟ ସୁଫଳ ମିଳିନାହିଁ। ଖବର ଲେଖାଯିବା ସୁଦ୍ଧା ଆନ୍ଦୋଳନ ଜାରି ରହିଥିଲା। ଏ ସଂକ୍ରାନ୍ତରେ ସ୍କୁଲ ନିର୍ଦ୍ଦେଶକ ସତ୍ୟବ୍ରତ ମହନ୍ତଙ୍କ ମୋବାଇଲ ନଂ. ୯୪୩୭୨୧୧୫୮୨କୁ ଯୋଗାଯୋଗ କରାଯାଇଥିଲେ ମଧ୍ୟ କୌଣସି ଉତ୍ତର ମିଳିନାହିଁ। ସେହିପରି ସରାଙ୍ଗ ଫାଣ୍ଡି ପୋଲିସର ପ୍ରତିକ୍ରିୟା ମଧ୍ୟ ମିଳିପାରିନାହିଁ।
