ଖପ୍ରାଖୋଲ,୧୭ା୪(ଡି.ଏନ.ଏ.): ବର୍ତ୍ତମାନ ସମୟରେ କୃଷି ଉପରେ ପାଣିପାଗ ପରିବର୍ତ୍ତନର ଅନେକ ପ୍ରଭାବ ପଡ଼ୁଥିବା ବେଳେ ଚାଷୀ କିପରି ଏହାର ସାମ୍ନା କରୁଛି ସେ ନେଇ ଆଇଆଇଏମଏର ଗବେଷଣା କରୁଥିବା ତିନି ଜଣ ଛାତ୍ରୀ ଖପ୍ରାଖୋଲରେ କେତେଜଣ ଚାଷୀଙ୍କୁ ଭେଟି ଆଲୋଚନା କରିଛନ୍ତି। ଏନେଇ ଖପ୍ରାଖୋଲ ବ୍ଲକ କୃଷି ଅଧିକାରୀ କାର୍ଯ୍ୟାଳୟ ତାଲିମ ଗୃହଠାରେ ଏକ ଆଲୋଚନାଚକ୍ର ବ୍ଲକ କୃଷି ଅଧିକାରୀ ସୁଜିତ କୁମାର ଭୋଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା। ଆଲୋଚନାଚକ୍ରରେ ଆଇଆଇଏମ ଅହମ୍ମଦାବାଦର ଗବେଷଣାରତ ଛାତ୍ରୀ ଅଞ୍ଜଳୀ, ଦୃଷ୍ଟି ଓ ନିକିତା ଚାଷୀଙ୍କ ସହ ଆଲୋଚନା କରିଥିଲେ। ପାଣିପାଗ ପରିବର୍ତ୍ତନ ଯୋଗୁ ଚାଷୀ ପ୍ରଭାବିତ ହେଉଥିବାରୁ ଚାଷୀ ତା’ର ପ୍ରତିକାର ପାଇଁ କ’ଣ ସବୁ ପଦକ୍ଷେପ ନେଉଛନ୍ତି। ଚାଷୀ ଜୀବିକା ପାଇଁ ରାଜ୍ୟ ବାହାରକୁ ଯାଉଛନ୍ତି ନା ଭିଟାମାଟିରେ ସରକାରୀ ଯୋଜନାର ଲାଭ ପାଉଛନ୍ତି। ଏହାଛଡା ଉତ୍ପାଦିତ ଫସଲର ବିକ୍ରିବଟା ଉପରେ ଆଲୋଚନା କରିଥିଲେ। ପରେ ଓଡ଼ିଆପାଲି ପଞ୍ଚାୟତ କପସିପାଲି ଗାଁର ଅଗ୍ରଣୀ ଚାଷୀ କୁନୁ ବରିହାଙ୍କ ମୁଗ, ପିଆଜ, କଦଳୀ, ଚିନାବାଦାମ, ଆଖୁ ଇତ୍ୟାଦି ଚାଷ ଦେଖିବା ସହ ଜୈବିକ ପଦ୍ଧତି ଉପରେ ପଚାରି ବୁଝିଥିଲେ। ଏହି ଅବସରରେ ପାଟଣାଗଡ ଏଡିଓ ବାବୁଲି ଚରଣ ସେଠୀ, ଏଫିଏସ ମାଷ୍ଟର ଟ୍ରେନର ଅଭୟ ତ୍ରିପାଠୀ, ଉମେଶ ଗୁପ୍ତା, ବାସନ୍ତୀ ମୁଣ୍ଡା, ମକରଧ୍ବଜ ସାହୁ, ଉମାକାନ୍ତ ପ୍ରଧାନଙ୍କ ସମେତ ଚାଷୀମାନେ ଉପସ୍ଥିତ ଥିଲେ।