ଭୁବନେଶ୍ୱର,୨୯।୧(ବ୍ୟୁରୋ): ତ୍ରିକୋଣୀୟ ପ୍ରେମକୁ ନେଇ ରାଜଧାନୀରେ ଜଣେ ଛାତ୍ରୀଙ୍କୁ ଆକ୍ରମଣ ହେବା ସହ ଛାତ୍ରଙ୍କୁ ଛୁରାମାଡ଼ ହୋଇଛି। ପ୍ରଥମ ପ୍ରେମିକଙ୍କ ଛୁରାମାଡ଼ରେ ଦ୍ୱିତୀୟ ପ୍ରେମିକ ଆହତ ହୋଇଛନ୍ତି। ଚନ୍ଦ୍ରଶେଖରପୁର ଥାନା ଅନ୍ତର୍ଗତ ଶୈଳଶ୍ରୀବିହାର ଅଞ୍ଚଳରେ ଶୁକ୍ରବାର ଏହି ଘଟଣା ଘଟିଛି। ଛୁରା ମାଡ଼ରେ ଗୁରୁତର ଆହତ ଛାତ୍ରଙ୍କୁ ସ୍ଥାନୀୟ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ପୋଲିସ ଛୁରା ମାଡ଼ କରିଥିବା ଅନ୍ୟଜଣେ ଛାତ୍ରଙ୍କୁ ଅଟକ ରଖି ପଚରାଉଚରା କରୁଛି। ତେବେ ରିପୋର୍ଟ ଲେଖାହେବା ପର୍ଯ୍ୟନ୍ତ ଏନେଇ ଥାନାରେ ମାମଲା ରୁଜୁ ହୋଇ ନ ଥିବାବେଳେ ଦୁଇପକ୍ଷ ଆପୋସ ସାମାଧାନ ପାଇଁ ଚେଷ୍ଟା କରୁଥିବା ସୂଚନା ମିଳିଛି।
ସୂଚନା ଅନୁଯାୟୀ, ପୁରୀ ଜିଲାର ଜଣେ ଯୁବତୀ ସ୍ଥାନୀୟ ଥାନା ଅଞ୍ଚଳର ଏକ ଘରୋଇ ଇଞ୍ଜିନିୟରିଂ କଲେଜରେ ବି.ଟେକ୍ ଶେଷବର୍ଷରେ ପଢୁଛନ୍ତି। ସେହି କଲେଜରେ ପଢୁଥିବା ଜଗତ୍ସିଂପୁର ଜିଲାର ଜଣେ ଛାତ୍ର ଦୁଇବର୍ଷ ହେବ ତାଙ୍କୁ ପ୍ରେମ କରୁଥିଲେ। ଇତିମଧ୍ୟରେ ଅନ୍ୟଏକ ଇଞ୍ଜିନିୟରିଂ କଲେଜରେ ପଢ଼ୁଥିବା ପୁରୀ ଜିଲାର ଜଣେ ଛାତ୍ର ସମ୍ପୃକ୍ତ ଯୁବତୀଙ୍କୁ ମଧ୍ୟ ଭଲପାଇ ବସିଥିଲେ। ଶୁକ୍ରବାର ସାରେ ଶୈଳଶ୍ରୀବିହାର ଛକ ରାସ୍ତାରେ ଦ୍ୱିତୀୟ ପ୍ରେମିକ ଉକ୍ତ ଯୁବତୀଙ୍କ ସହ ବୁଲାବୁଲି କରୁଥିଲେ। ଏନେଇ ପ୍ରଥମ ପ୍ରେମିକ ଖବରପାଇ ତାଙ୍କ ସାଙ୍ଗ ସହ ସେଠାକୁ ଆସି ଯୁବତୀଙ୍କୁ ମାଡ଼ ମାରିଥିଲେ। ଘଟଣାକୁ ନେଇ ସେମାନଙ୍କ ମଧ୍ୟରେ ଝଗଡ଼ା ହୋଇଥିଲା। ତେବେ ଯୁବତୀଙ୍କ ସହ ବୁଲିଥିବା ଦ୍ୱିତୀୟ ପ୍ରେମିକ ପ୍ରତିବାଦ କରିବାରୁ ସେମାନଙ୍କ ମଧ୍ୟରେ ବଚସା ହୋଇଥିଲା। ଏହି ସମୟରେ ପ୍ରଥମ ପ୍ରେମିକ ସାଙ୍ଗରେ ଆଣିଥିବା ଏକ ଛୁରିରେ ଦ୍ୱିତୀୟ ପ୍ରେମିକଙ୍କୁ ବାରମ୍ବାର ଆକ୍ରମଣ କରିଥିଲେ। ଚିତ୍କାର ଶୁଣି ସ୍ଥାନୀୟ ଲୋକେ ଲୁଟ୍ ଘଟଣା ଭାବି ସମସ୍ତଙ୍କୁ କାବୁ କରି ପୋଲିସକୁ ଖବର ଦେଇଥିଲେ।
