ଉଦଳା,୪ ।୨(ଡି.ଏନ.ଏ.) ବର୍ଦ୍ଧିତ ଫି’କୁ ନେଇ ମୟୂରଭଞ୍ଜ ଜିଲା ଉଦଳା କଲେଜରେ ଛାତ୍ର ଅଶାନ୍ତି ଦେଖାଦେଇଛି। ଏନେଇ ଯୁକ୍ତ ୩ ଶେଷ ବର୍ଷର ଛାତ୍ରୀଛାତ୍ରମାନେ କଲେଜ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ଉପଜିଲାପାଳଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି। ଅନୁଯାୟୀ, ଯୁକ୍ତ ତିନି ଶେଷ ବର୍ଷ ଛାତ୍ରୀଛାତ୍ରମାନଙ୍କ ପଞ୍ଚମ ସେମିଷ୍ଟର ନିମନ୍ତେ ଫର୍ମ ଫିଲ୍ଅପ୍ ହେବାରେ ଥିଲା। ମହାବିଦ୍ୟାଳୟ ପକ୍ଷରୁ ଏନେଇ ନିର୍ଦ୍ଦିଷ୍ଟ ଅର୍ଥରାଶି ଧାର୍ଯ୍ୟ କରାଯାଇଥିଲା। ଏଥିରେ କଲେଜ ଡେଭଲପ୍୍ମେଣ୍ଟ ଫି’ ସାମିଲ କରାଯାଇଥିତ୍ବାରୁ ଛାତ୍ରୀଛାତ୍ର ଏହାକୁ ବିରୋଧ କରିଥିଲେ। ଚତୁର୍ଥ ସେମିଷ୍ଟରରେ କମ୍ ଟଙ୍କା ଧାର୍ଯ୍ୟ ହୋଇଥିବା ବେଳେ ପଞ୍ଚମ ସେମିଷ୍ଟରରେ ଅଧିକ ଫି’ ଦେବାକୁ ପଡ଼ୁ ଥିବାରୁ ଛାତ୍ରୀଛାତ୍ର ଅଧ୍ୟକ୍ଷଙ୍କୁ ଜଣାଇଥିଲେ ସୁଦ୍ଧା କୌଣସି ସୁଫଳ ମିଳି ପାରି ନ ଥିଲା। ଯାହାକୁ ନେଇ ଛାତ୍ରୀଛାତ୍ରମାନେ ସୋମବାର କଲେଜ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହିତ ଧାରଣା ଦେଇଥିଲେ। ପରେ ସେମାନେ କଲେଜ ପାଖରୁ ଚାଲି ଚାଲି ଉପଜିଲାପାଳଙ୍କ କାର୍ଯ୍ୟାଳୟକୁ ଯାଇ ଦାବିପତ୍ର ପ୍ରଦାନ କରିଥିଲେ। ତୁରନ୍ତ ପଦକ୍ଷେପ ଗ୍ରହଣ କରା ନ ଗଲେ ଆନ୍ଦୋଳନ ତୀବ୍ର ହେବ ବୋଲି ଛାତ୍ର ହୃଷିକେଶ ନାଏକ, ବିଶ୍ୱଜିତ୍ ଦାସମହାପାତ୍ର, ରଶ୍ମୀରଞ୍ଜନ ମହାନ୍ତି, ସ୍ବାଧୀନ ନାଏକ, ସନ୍ଧ୍ୟା ମହାପାତ୍ରଙ୍କ ସମେତ ସମସ୍ତ ଛାତ୍ରଛାତ୍ରୀ କହିଛନ୍ତି।
