ବ୍ରିସ୍ବେନ: ଅଷ୍ଟ୍ରେଲିଆର କୁଇନ୍ସଲ୍ୟାଣ୍ଡସ୍ଥିତ ଆରେଥୁସା ଉଚ୍ଚ ପ୍ରାଥମିକ ବିଦ୍ୟାଳୟରେ ଏକ ଅଜବ ନିୟମ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଏହି ବିଦ୍ୟାଳୟ ନିଜ ଛାତ୍ରୀଛାତ୍ରମାନଙ୍କୁ ଧୂମପାନ କରିବାକୁ ଅନୁମତି ପ୍ରଦାନ କରିଛି। ଉକ୍ତ ବିଦ୍ୟାଳୟର କ୍ୟାମ୍ପସ୍ ମଧ୍ୟରେ ସିଗାରେଟ ଟାଣିବା ପାଇଁ ଛାତ୍ରୀଛାତ୍ରମାନଙ୍କୁ ବିରତି ମିଳିଥାଏ।
ଗଣମାଧ୍ୟମର ରିପୋର୍ଟ ଅନୁଯାୟୀ, ଆରେଥୁସା ବିଦ୍ୟାଳୟରେ ପିଲାମାନଙ୍କୁ ସ୍ମୋକିଂ ବ୍ରେକ୍ ପ୍ରଦାନ କରାଯାଇଥାଏ। ଏହି ବ୍ରେକ୍ ସମୟରେ ବିଦ୍ୟାଳୟ ପରିସରରେ ନିର୍ମିତ ସ୍ବତନ୍ତ୍ର ଧୂମପାନ ଜୋନ୍ରେ ଏକସଙ୍ଗେ ପ୍ରାୟ ୫୦ ପିଲା ସିଗାରେଟ୍ ଟାଣିପାରନ୍ତି। ଛାତ୍ରୀଛାତ୍ରଙ୍କ ଉପରେ ପଡ଼ୁଥିବା ଚାପର ସ୍ତରକୁ ହ୍ରାସ କରିବା ଏବଂ ସେମାନଙ୍କ ମଧ୍ୟରେ ପ୍ରକାଶ ପାଉଥିବା ହିଂସ୍ର ଆଚରଣକୁ କମାଇବା ପାଇଁ ବିଦ୍ୟାଳୟ ପକ୍ଷରୁ ଏହି ନିଷ୍ପତ୍ତି ନିଆଯାଇଛି। ଏନେଇ ଛାତ୍ରୀଛାତ୍ରଙ୍କ ଅଭିଭାବକମାନଙ୍କଠାରୁ ଅନୁମତି ନିଆଯାଇଛି ବୋଲି ଆରେଥୁସା ବିଦ୍ୟାଳୟ ପ୍ରଶାସନ ପକ୍ଷରୁ ସ୍ପଷ୍ଟୀକରଣ ଦିଆଯାଇଛି।
ବିଦ୍ୟାଳୟ ପ୍ରଶାସନ ଅନୁଯାୟୀ, ଏନେଇ ତଦନ୍ତକାରୀ ଏଜେନ୍ସିଠାରୁ ଆରମ୍ଭ କରି ମେଡିକାଲ କର୍ତ୍ତୃପକ୍ଷଙ୍କୁ ସୂଚନା ଦିଆଯାଇଛି। ଏ ବିଷୟରେ ଆରେଥୁସା ବିଦ୍ୟାଳୟ ପକ୍ଷରୁ କିଛି ଲୁଚା ଯାଇନାହିଁ। ଏହି ନୀତିକୁ ଖୋଲାଖୋଲି ଭାବେ ସମସ୍ତଙ୍କ ସାମ୍ନାରେ ରଖାଯାଇଥିବା ନେଇ ବିଦ୍ୟାଳୟ ପରିଚାଳନା କମିଟି କହିଛି। ତେବେ ସେମାନଙ୍କ ପ୍ରତ୍ୟାଖ୍ୟାନ ସତ୍ତ୍ୱେ ମଧ୍ୟ ସ୍କୁଲ୍ ପ୍ରଶାସନ ପକ୍ଷରୁ ପିଲାମାନଙ୍କୁ ସିଗାରେଟ ଟାଣିବାକୁ ଅନୁମତି ଦିଆଯାଇଛି ବୋଲି କେତେଜଣ ଅଭିଭାବକ ଅଭିଯୋଗ ଆଣିଛନ୍ତି। ସ୍କୁଲରେ ଏପରି ଅଜବ ନିୟମ ଯୋଗୁ ସେମାନଙ୍କର ପିଲାମାନେ ସିଗାରେଟ ଟାଣିବା ଆରମ୍ଭ କରି ଦେଇଛନ୍ତି ବୋଲି କେତେଜଣ ଅଭିଭାବକ କହିଛନ୍ତି।
