ନିରାକାରପୁର, ୨୪।୨(ମାନସ ଚନ୍ଦ୍ର ପଟ୍ଟନାୟକ ): ଶିକ୍ଷାର ବିକାଶ ପାଇଁ କେନ୍ଦ୍ରଠାରୁ ରାଜ୍ୟ ସରକାର ପର୍ଯ୍ୟନ୍ତ ସମସ୍ତେ ଯୋଜନା ପରେ ଯୋଜନା ପ୍ରସ୍ତୁତ କରିଛନ୍ତି। ହେଲେ ତଳସ୍ତରରେ କିଛି ଅସାଧୁ ଅଧିକାରୀ ଓ କର୍ମଚାରୀଙ୍କ ଯୋଗୁ ସରକାର ଅନେକ ସମୟରେ ବଦନାମ ହେବାକୁ ପଡୁଛି । ସରକାରଙ୍କ ନୀତିନିୟମ ଅନୁସାରେ ଛାତ୍ରୀଛାତ୍ରଙ୍କୁ ପାଠପଢା ବ୍ୟତୀତ ଅନ୍ୟାନ୍ୟ କାର୍ଯ୍ୟରେ ନିୟୋଜିତ ନିମନ୍ତେ ବାରଣ କରାଯାଇଛି । ହେଲେ ସ୍କୁଲରେ ଛାତ୍ରୀଛାତ୍ରଙ୍କୁ ପାଠପଢା ବଦଳରେ ସ୍କୁଲରେ ଆବର୍ଜନା ସଫା କରୁଥିବା ଭଳି ଦୃଶ୍ୟ ଖୋର୍ଦ୍ଧା ଜିଲା କମାଗୁରୁ ପଞ୍ଚାୟତ ବେଲପଦା ସରକାରୀ ପ୍ରାଥମିକ ବିଦ୍ୟାଳୟରେ ସୋମବାର ଦେଖିବାକୁ ମିଳିଛି ।
ସ୍କୁଲ ଖୋଲିବା ପରେ ଉକ୍ତ ବିଦ୍ୟାଳୟର ଶିକ୍ଷୟିତ୍ରୀ ଓ ପ୍ରଧାନ ଶିକ୍ଷୟିତ୍ରୀ ବସି ରହି ଛାତ୍ରମାନଙ୍କୁ ଆବର୍ଜନା ସଫା କରିବା ଦାୟିତ୍ୱରେ ନିୟୋଜିତ କରିଥିବା ବେଳେ କିଛି ଛାତ୍ରୀଙ୍କ ହାତରେ ଝାଡୁ ଧରାଇ ସ୍କୁଲ ପରିସର ସଫା କାର୍ଯ୍ୟରେ ଲଗାଇଥିଲେ । ଆଉ କିଛି ଛାତ୍ରୀ ସ୍କୁଲ ଗୃହ ଓ ବାରଣ୍ଡା ଝାଡୁ କରୁଥିବା ଦେଖିବାକୁ ମିଳିଛି। ଏନେଇ ଦାୟିତ୍ୱରେ ଥିବା ଶିକ୍ଷୟିତ୍ରୀଙ୍କୁ ପଚାରିବାରୁ ସେ କହିଛନ୍ତି, ଆମର ଷ୍ଟାଫ ଆଉ କେହିନାଁହାନ୍ତି କିଏ ସଫାକରିବ । ଏନେଇ ସିଆରସିସି ବିଜୟ କୁମାର ମାନସିଂହଙ୍କୁ ପଚାରିବାରୁ ଏଭଳି ଖବର ଶୁଣି ମୁଁ ପ୍ରଧାନଶିକ୍ଷୟତ୍ରୀଙ୍କୁ ତାଗିଦ କରିଥିବା ସେ ପ୍ରକାଶ କରିଛନ୍ତି ।
