ଆର.ଉଦୟଗିରି,୨୩ା୯(ଡି.ଏନ.ଏ.): ସରକାର ଗ୍ରାମାଞ୍ଚଳର ବିକାଶ ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ଏବେ ବି ଅନେକ ଗାଁ ଅବହେଳିତ ଅବସ୍ଥାରେ ରହିଛି। ପୋଲ ନ ଥିବାରୁ ବିପଦସଙ୍କୁଳ ଅବସ୍ଥାରେ ଏକ ଦଉଡି ସହାୟତାରେ ନଦୀ ପାର ହୋଇ ସ୍କୁଲ ଓ କଲେଜକୁ ଯାଉଛନ୍ତି ୫ ଖଣ୍ଡ ଗାଁର ଛାତ୍ରୀଛାତ୍ର। ଏହା ଦେଖିବାକୁ ମିଳିଛି ଗଜପତି ଜିଲା ଲିଲିଗଡ ପଞ୍ଚାୟତରେ। ଲଗାଣ ବର୍ଷାରେ ଏହି ପଞ୍ଚାୟତର ଆଶାଢ଼ିଆମ୍ବ ନଦୀରେ ଜଳ ସ୍ତର ବୃଦ୍ଧିପାଇଛି। ହେଲେ ଉକ୍ତ ନଦୀ ଉପରେ ପୋଲ ନ ଥିବାରୁ ଜୀବନକୁ ବାଜି ଲଗାଇ ବହୁ ଛାତ୍ରୀଛାତ୍ର ଦଉଡି ସହାୟତାରେ ଆରପଟକୁ ପାର ହୋଇ ସ୍କୁଲ ଓ କଲେଜକୁ ପାଠ ପଢିବା ପାଇଁ ଯାଉଛନ୍ତି। ଛୋଟ ଛୋଟ ଶିଶୁଙ୍କୁ କାନ୍ଧରେ ଓ କାଖ କରି ଅଭିଭାବକମାନେ ନଦୀପାର କରାନ୍ତି। ବରିଷ୍ଠ ନାଗରିକମାନେ ଜରୁରୀ କାମରେ ମୋହନା ଓ ଅନ୍ୟ ଗ୍ରାମକୁ ଯିବାକୁ ହେଲେ ବିପଦସଙ୍କୁଳ ଅବସ୍ଥାରେ ଭରା ନଦୀ ପାର ହେଉଛନ୍ତି। ନଦୀ ସେପାଖ ଡେଙ୍ଗାଆମ୍ବ, ଟିଟିମେରି, କୁଇହୁରୁ, କୁତୁଣୀକୁଆ ଓ ରାଇପଦା ଗାଁ ସମେତ ୫ରୁ ଅଧିକ ଗ୍ରାମର ଗ୍ରାମବାସୀ ନିର୍ଭରଶୀଳ। ନଦୀର ଜଳ ସ୍ତର ବୃଦ୍ଧି ପାଇଲେ ସ୍କୁଲ କଲେଜ ବନ୍ଦ ହେବା ସହ ସ୍ବାସ୍ଥ୍ୟକେନ୍ଦ୍ର ଓ ହାଟ ବଜାର ସବୁ କିଛି ଠପ ହୋଇଯାଏ। ଜରୁରୀ କାମ ପଡ଼ିଲେ ଲୋକେ ମୋହନା ଆସିପାରନ୍ତି ନାହିଁ। ଏହି ସମସ୍ୟା ନେଇ ଗ୍ରାମବାସୀ ବାରମ୍ବାର ପୋଲ ନିର୍ମାଣ ପାଇଁ ପ୍ରଶାସନ ନିକଟରେ ଦାବି କରି ଆସୁଥିଲେ ମଧ୍ୟ ପୋଲ ନିର୍ମାଣ ହୋଇପାରୁନାହିଁ। ତେବେ ବର୍ଷାଦିନେ ଏଭଳି ସମସ୍ୟା ଉତ୍କଟ ରୂପ ଧାରଣ କରେ ବୋଲି ଗ୍ରାମବାସୀ ଅଭିଯୋଗ କରିଛନ୍ତି।
