ନୟାଗଡ଼ ଅଫିସ,୧୩।୧: ସ୍କୁଲରେ ପାଠପଢ଼ା ବନ୍ଦ କରାଇ ନୟାଗଡ ଏନଏସି ହାଇସ୍କୁଲ କର୍ତ୍ତୃପକ୍ଷ ନୟାଗଡ ବ୍ରଜେନ୍ଦ୍ର ହାଇସ୍କୁଲର ଖେଳ ପଡିଆକୁ ନାଚଗୀତର ଆସରକୁ ଗୁରୁବାର ପଠାଇବା ପରେ ସାଧାରଣରେ ଅସନ୍ତୋଷ ପ୍ରକାଶ ପାଇଛି । କଂଗ୍ରେସ ଏହାକୁ ପ୍ରତିବାଦ କରି ଶିକ୍ଷାମନ୍ତ୍ରୀ ଓ ସଚିବଙ୍କୁ ଫେରାଦ୍ ହୋଇଛି ।
ସୂଚନା ଅନୁସାରେ ନୟାଗଡ ଖେଳପଡିଆରେ ଫୁଟ୍ବଲ ଟୁର୍ନାମେଣ୍ଟ ଚାଲୁ ରହିଛି । ଏହାର ଫାଇନାଲ ମ୍ୟାଚରେ ସ୍କୁଲର ଛାତ୍ରୀଛାତ୍ରଙ୍କୁ ନେଇ ସାଂସ୍କୃତିକ କାର୍ଯ୍ୟକ୍ରମ ହେବାର ରହିଛି । ଏଠାରେ ହଜାରରୁ ଊର୍ଦ୍ଧ୍ୱ ଛାତ୍ରୀଛାତ୍ର କାର୍ଯ୍ୟକ୍ରମରେ ଭାଗ ନେବେ । ଏଥିପାଇଁ ବ୍ରଜେନ୍ଦ୍ର ହାଇସ୍କୁଲରେ ନାଚଗୀତର ଆସର ପାଇଁ ପ୍ରଶିକ୍ଷଣ ଦିଆଯାଉଛି । ଏଠାକୁ ଏନଏସି ହାଇସ୍କୁଲର ୨୦୦ ଛାତ୍ରୀଛାତ୍ର ଯାଇଥିଲେ । ସେହିପରି ଜିଲା ସଦର ମହକୁମାର ଅନ୍ୟ କିଛି ସ୍କୁଲର ଛାତ୍ରୀଛାତ୍ର ଯାଇଥିଲେ । କାର୍ଯ୍ୟକ୍ରମ ଶେଷ କରି ଛାତ୍ରୀଛାତ୍ର ଇତସ୍ତତଃ ଭାବେ ବଜାର ଦେଇ ସ୍କୁଲକୁ ଫେରିଥିଲେ । ତେବେ କାର୍ଯ୍ୟକ୍ରମ ରେ ଯୋଗ ଦେବା ପାଇଁ ସରକାରୀ ଭାବେ କୌଣସି ସ୍କୁଲକୁ ଚିଠି ହୋଇ ନାହିଁ । ତେବେ ବେସରକାରୀ ଭାବେ ଛାତ୍ରୀଛାତ୍ରଙ୍କୁ ମୌଖିକ ଭାବେ ଡକାଇ ନିଆଯାଇଥିବା ଜଣାପଡିଛି । ଅନ୍ୟପକ୍ଷେ ବ୍ରଜେନ୍ଦ୍ର ହାଇସ୍କୁଲରୁ ପିଲା ସ୍କୁଲକୁ ଫେରି ବହି ନେଇ ଘରକୁ ଫେରିଥିଲେ । ଏନେଇ ପ୍ରଧାନଶିକ୍ଷକ କୈଳାଶ କର କୁହନ୍ତି, ସ୍କୁଲ ପକ୍ଷରୁ କୌଣସି ଛାତ୍ରୀଛାତ୍ରଙ୍କୁ ବ୍ରଜେନ୍ଦ୍ର ହାଇସ୍କୁଲକୁ ପଠାଯାଇନାହିଁ । କୌଣସି ଶିକ୍ଷକ ବି ଯାଇ ନାହାନ୍ତି । ଯେଉଁ ଶିକ୍ଷକମାନେ ବ୍ରଜେନ୍ଦ୍ର ହାଇସ୍କୁଲକୁ ଯାଇଥିଲେ ସରକାରୀ କାମରେ ଯାଇଥିଲେ । କଂଗ୍ରେସ ଜିଲା ସଭାପତି କୁହନ୍ତି, ଜିଲା ଶିକ୍ଷା ଅଧିକାରୀଙ୍କ ଅନୁମତି ନ ଥାଇ ଛାତ୍ରୀଛାତ୍ରଙ୍କୁ ଛାଡିବା ଠିକ ନୁହେଁ । କିଛି ସୁବିଧା ଅସୁବିଧା ହେଲେ କିଏ ବୁଝିବ । ପ୍ରଧାନଶିକ୍ଷକ କାହା ଚାପରେ ଛାତ୍ରୀଛାତ୍ରଙ୍କୁ ସଂସ୍କୃତିକ କାର୍ଯ୍ୟମରେ ଯୋଗ ଦେବାକୁ ଛାଡିଛନ୍ତି ତଦନ୍ତସାପେକ୍ଷ । ୨୦୦ ଛାତ୍ରୀଛାତ୍ର ମନଇଛା ସ୍କୁଲ ଡ୍ରେସରେ ଅନ୍ୟ ଏକ ସ୍କୁଲକୁ ଯାଇ ପାଠପଢ଼ା ସମୟରେ ନାଚଗୀତ ଶିଖିବା ସନ୍ଦେହ ସୃଷ୍ଟି କରୁଛି। ଏହାର ତଦନ୍ତ କରା ନ ଗଲେ ଓ ଗୁରୁବାର ପରି ଶୁକ୍ରବାର ପୁନରାବୃତ୍ତି ହେଲେ କଂଗ୍ରେସ ଆନ୍ଦୋଳନକୁ ଓହ୍ଲାଇବ ବୋଲି କହିଛନ୍ତି ।