ମହାକାଳପଡ଼ା,୧ା୮ (ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ ଗୋଗୁଆ ପଞ୍ଚାୟତ ରାହାମାସ୍ଥିତ ଠାକୁର ନିଗମାନନ୍ଦ ନୋଡାଲ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକଙ୍କ ଦାୟିତ୍ୱହୀନତା ଯୋଗୁ ଜଣେ ଦଶମ ପାସ୍ କରିଥିବା ଛାତ୍ରଙ୍କ ଭବିଷ୍ୟତ ଅନ୍ଧାର ହୋଇଯିବ ବୋଲି ଅଭିଯୋଗ ହେଉଛି। ମିଳିଥିବା ସୂଚନା ଅନୁସାରେ, ସ୍ଥାନୀୟ ବାବର ଗ୍ରାମର କଣ୍ଠେଶ୍ୱର ସ୍ବାଇଁଙ୍କ ପୁଅ ଟାଇଟନ୍ ଚଳିତ ବର୍ଷ ମାଟ୍ରିକ ପରୀକ୍ଷାରେ ପାସ୍ କରିଥିଲେ। ତେବେ ମାଟ୍ରିକ ପାସ୍ ପ୍ରମାଣପତ୍ରରେ ଛାତ୍ରଙ୍କ ପିତାଙ୍କ ନାମ ତ୍ରୁଟି ଥିବା ଦେଖିବାକୁ ମିଳିଛି। ମାଟ୍ରିକ ଫର୍ମ ପୂରଣ ବେଳେ ପିତାଙ୍କ ନାମ ତ୍ରୁଟି ଥିବାରୁ ଛାତ୍ର ଜଣକ ପ୍ରଧାନ ଶିକ୍ଷକଙ୍କୁ ଅବଗତ କରିଥିଲେ। କିନ୍ତୁ ପ୍ରଧାନ ଶିକ୍ଷକଙ୍କ ଦାୟିତ୍ୱହୀନତା ଯୋଗୁ ଛାତ୍ରଙ୍କ ମାଟ୍ରିକ ପ୍ରମାଣପତ୍ରରେ ପିତାଙ୍କ ନାମ ତ୍ରୁଟି ଥିବାରୁ କଲେଜରେ ନାମ ଲେଖାଇବାକୁ ସମସ୍ୟା ଦେଖାଦେବ ବୋଲି ଅଭିଯୋଗ କରିଛନ୍ତି ଛାତ୍ରଙ୍କ ବାପା କଣ୍ଠେଶ୍ୱର। ପରିବାର ଲୋକମାନେ ପ୍ରଧାନ ଶିକ୍ଷକଙ୍କ କାର୍ଯ୍ୟକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି। ଚଳିତବର୍ଷ ଯୁକ୍ତ୨ ନାମ ଲେଖା ଅଗଷ୍ଟ ୧୦ ତାରିଖରେ ଶେଷ ହେବ। ତେବେ ଏହି ଛାତ୍ରଙ୍କ ପ୍ରମାଣପତ୍ର ତ୍ରୁଟି ନ ସୁଧୁରିଲେ ଆଗାମୀ ଏକ ବର୍ଷ ବରବାଦ ହେବ ବୋଲି କୁହାଯାଇଛି। ଏ ସମ୍ପର୍କରେ ରାହାମାସ୍ଥିତ ଠାକୁର ନିଗମାନନ୍ଦ ନୋଡାଲ ଉଚ୍ଚ ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଶିକ୍ଷକ ବାବାଜୀ ମହାରଣାଙ୍କୁ ପଚାରିବାରେ ଉକ୍ତ ଛାତ୍ରଙ୍କ ପ୍ରମାଣପତ୍ରରେ ତ୍ରୁଟି ଥିବା ସ୍ବୀକାର କରିବା ସହ ସଂଶୋଧନ ପାଇଁ ବିଭାଗର ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଯାଇଛି ବୋଲି ସେ କହିଛନ୍ତି।
