କେନ୍ଦ୍ରାପଡା ଅଫିସ/ମାର୍ଶାଘାଇ,୨।୧୧: କେନ୍ଦ୍ରାପଡା ଜିଲା ମାର୍ଶାଘାଇ ଥାନା ଜୁଣ ଛକରେ ଥିବା ଏକ କୋଚିଂ ସେଣ୍ଟରରେ ମଙ୍ଗଳବାର ବିଳମ୍ବିତ ରାତିରେ ବିଦ୍ୟୁତ୍ ସଂସ୍ପର୍ଶରେ ଆସି ଜଣେ ଛାତ୍ରଙ୍କ ମୃତ୍ୟୁ ଘଟିଛି। ମୃତକ ହେଲେ ଗୋପିନାଥପୁର ଗ୍ରାମର ଦେବୀ ପ୍ରସାଦ ଦାସ। ସେ ଯୁକ୍ତ ଦୁଇ ବିଜ୍ଞାନର ଛାତ୍ର ଥିଲେ।
ଦେବୀ ମାର୍ଶାଘାଇ ସ୍ଥିତ ଦ ରିୟଲ ଗାଇଡ ରେସିଡେନ୍ସି କୋଚିଂ ସେଣ୍ଟରରେ ରହି ପାଠ ପଢୁଥିଲେ। ସେହି କୋଚିଂ ସେଣ୍ଟର ନିକଟରେ ହାଇଭୋଲଟେଜ୍ ବିଦ୍ୟୁତ ତାର ଯାଇଛି। କୌଣସି କାରଣରୁ ଦେବୀ ରାତି ପ୍ରାୟ ୧୧.୩୦ରେ ବାହାରକୁ ଆସିଥିବା ବେଳେ ଏହି ସମୟରେ ସେ ବିଦ୍ୟୁତ ତାର ସଂସ୍ପର୍ଶରେ ଆସିଯାଇଥିଲେ। ପ୍ରତ୍ୟକ୍ଷଦର୍ଶୀଙ୍କ ସୂଚନା ମୁତାବକ ଛାତ୍ରଜଣଙ୍କ ନିଆଁଲାଗି ନଡାଗଦା ଭଳି ଜଳିଯାଇଥିଲେ। ଅନ୍ୟପଟେ, ଏହି ଘଟଣାରେ ୨ ଜଣଙ୍କୁ ଗୁରୁତର ହୋଇ କଟକ ବଡ ମେଡିକାଲରେ ଭର୍ତ୍ତି କରାଯାଇଛି। ଏନେଇ ମାର୍ଶାଘାଇ ପୋଲିସ ଘଟଣାସ୍ଥଳରେ ପହଞ୍ଚି ପ୍ରାଥମିକ ତଦନ୍ତ ସହ ପରିଚାଳକ ଚିତ୍ତରଞ୍ଜନ ରଥଙ୍କୁ ଥାନାରେ ଅଟକ ରଖି ପଚରାଉଚରା କରୁଛି।