କରୋନା ସଂକ୍ରମଣ ଯୋଗୁ ଏବେ ସମଗ୍ର ବିଶ୍ୱ ଚିନ୍ତାରେ। ତେବେ କରୋନା ଦ୍ୱାରା ଆମେରିକା ସବୁଠାରୁ ଅଧିକ କ୍ଷତି ସହିଛି। ଏଠାରେ କରୋନା ସଂକ୍ରମିତଙ୍କ ସହ ମୃତ୍ୟୁ ସଂଖ୍ୟା ମଧ୍ୟ ସବୁଠାରୁ ଅଧିକ। ତେବେ ଯୁବକମାନେ ସବୁବେଳେ ବିପଦକୁ ସାମ୍ନା କରିବାକୁ ଭଲପାଉଥିବା ବେଳେ କରୋନାକୁ ନ ଡରି କରୋନା ସଂକ୍ରମିତ ହେବାକୁ ଆଗେଇ ଆସୁଛନ୍ତି। ଏମିତି କିଛି ଘଟିଛି ଆଲବାମାର ଟୁସ୍କାଲୁସା ସହରରେ।
ଏଠାରେ ଯୁବକ ତଥା ଛାତ୍ରୀଛାତ୍ରମାନେ କରୋନାରେ ସଂକ୍ରମିତ ହେବା ପାଇଁ ପାର୍ଟିର ଆୟୋଜନ କରୁଛନ୍ତି। ଏହି ପାର୍ଟିକୁ ଅନେକ ଲୋକଙ୍କୁ ନିମନ୍ତ୍ରଣ ମଧ୍ୟ କରାଯାଉଛି। ପାର୍ଟି ଶେଷ ହେବା ପରେ ପ୍ରଥମେ ଯିଏ କରୋନା ସଂକ୍ରମିତ ହୋଇଥିବା ଜଣାପଡ଼ୁଛି ତାଙ୍କୁ ପୁରସ୍କାର ରୂପେ ଟଙ୍କା ଦିଆଯାଉଛି। ତେବେ ଏହି ପାର୍ଟିରେ ସାମିଲ ହେବା ପାଇଁ ହଜାର ହଜାର ସଂଖ୍ୟାରେ ଯୁବକମାନେ ଆଗେଇ ଆସୁଛନ୍ତି। ପାର୍ଟିରେ ଅଂଶଗ୍ରହଣ କରୁଥିବା ବ୍ୟକ୍ତିମାନେ ସର୍ବପ୍ରଥମେ ଏକ ସ୍ଥାନରେ ଟଙ୍କା ଜମା କରୁଛନ୍ତି। ପରେ ଏମାନଙ୍କ ମଧ୍ୟରୁ ଯିଏ ପ୍ରଥମେ କରୋନା ସଂକ୍ରମିତ ବୋଲି ଜଣାପଡ଼ିଛନ୍ତି ତାଙ୍କୁ ଟଙ୍କା ଭର୍ତ୍ତି ବାକ୍ସ ପ୍ରଦାନ କରାଯାଉଛି। ତେବେ ହଠାତ୍ ଅଲବାମା ୟୁନିଭର୍ସିଟି ଏବଂ ଶହରର ପ୍ରମୁଖ କଲେଜଗୁଡିକରେ କରୋନା ସଂକ୍ରମଣ ବ୍ୟାପିବାକୁ ଲାଗିଲା। ଡିପାର୍ଟମେଣ୍ଟ ଅଫ୍ ପବ୍ଲିକ ହେଲ୍୍ଥ ଅନୁସାରେ, ହଠାତ୍ ଏଠାରେ ୨ ହଜାର ୪୯ଜଣ କରୋନା ପଜିଟିଭ ଚିହ୍ନଟ ହେବା ସହ ୩୮ ଜଣଙ୍କ ମୃତ୍ୟୁ ଘଟିଲା। ଏ ନେଇ ପ୍ରଶାସନ ପକ୍ଷରୁ ଯାଞ୍ଚ ହେବାରୁ ସମସ୍ତ ଘଟଣା ସମ୍ମୁଖକୁ ଆସିଲା। ଏହାକୁ ଦୃଷ୍ଟିରେ ରଖି ଜୁଲାଇ ୩୧ ପର୍ଯ୍ୟନ୍ତ ଏଠାରେ ଲକ୍ଡାଉନ୍ ଘୋଷଣା କରାଯାଇଛି। ସିଟି କାଉନସିଲର ସୋନିଆ ମ୍ୟାକକିନିଷ୍ଟ୍ରି ଏହାକୁ ସ୍ବିକାର କରିବା ସହ ବିଶେଷକରି ଯୁବକମାନେ ଘରୁ ନ ବାହାରିବାକୁ ଅନୁରୋଧ କରିଛନ୍ତି।