ରାୟଗଡ଼ା,୧୦ା୫(ସ୍ବ.ପ୍ର.): ରାୟଗଡ଼ା ବ୍ଲକ ଅନ୍ତର୍ଗତ ମାଲିଗାଁ ପଞ୍ଚାୟତର କଦଳୀଗୁଡ଼ା ଗ୍ରାମର ଜଣେ ନାବାଳିକାଙ୍କର ବଜ୍ରପାତରେ ଜୀବନ ଯାଇଛି। ନାବାଳିକା ଜଣକ ହେଲେ ଅଦାବଂଶ ସଞ୍ଜୁ(୧୬)।
ସୂଚନାନୁଯାୟୀ, ସଞ୍ଜୁ ନିଜର ଦୁଇ ସାଙ୍ଗଙ୍କ ସହିତ ଜେକେପୁରରୁ ଟ୍ୟୁଶନ ସାରି ଘରକୁ ଫେରୁଥିବା ସମୟରେ କଦଳୀଗୁଡ଼ା ଗାଁ ନିକଟରେ ଥିବା ଏକ ଆମ୍ବଗଛ ମୂଳରେ ଥିବା ଜଳଛତ୍ରଠାରେ ଅଟକି ପାଣି ପିଇବାକୁ ଯାଇଥିଲେ। ଏହି ସମୟରେ ବଜ୍ରପାତ ହେବାରୁ ସଞ୍ଜୁ ଓ ତାଙ୍କ ଦୁଇ ସାଥୀ ସୁଦର୍ଶନ ନାଗବଂଶ(୨୨) ଓ ମମିତା ଚେଦୀବଂଶ(୧୩) ତିନି ଜଣ ଆହତ ହୋଇଥିଲେ। ତେବେ ଅନ୍ୟ ଦୁଇଜଣ ସୁଦର୍ଶନ ଓ ମମିତା ଆହତ ହୋଇଥିବା ବେଳେ ସଞ୍ଜୁଙ୍କର ମୃତ୍ୟୁ ଘଟିଛି। ସଞ୍ଜୁ କୋମତାଲପେଟାସ୍ଥିତ ଉଗ୍ରତାରା କନିଷ୍ଠ ମହାବିଦ୍ୟାଳୟରେ ଯୁକ୍ତ ୨ରେ ଅଧ୍ୟୟନ କରୁଥିଲେ। ତେବେ ଆମ୍ବୁଲାନ୍ସକୁ ଖବର ଦେବା ପରେ ମଧ୍ୟ ଦୀର୍ଘ ସମୟ ଧରି ଆମ୍ବୁଲାନ୍ସ ନ ପହଞ୍ଚିବାରୁ ପରିବାର ଲୋକେ ଝିଅକୁ ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। ସେଠାରେ ମୃତଦେହ ବ୍ୟବଚ୍ଛେଦ କରାଯିବା ପରେ ପରିବାରବର୍ଗକୁ ହସ୍ତାନ୍ତର କରାଯାଇଛି । ବଜ୍ରପାତରେ ଝିଅର ମୃତ୍ୟୁ ନେଇ ପରିବାର ଲୋକେ ମାଲିଗାଁ ରାଜସ୍ବ ନିରୀକ୍ଷକଙ୍କୁ ସୂଚନା ଦେଇଛନ୍ତି। ଆହତ ଦୁଇଜଣଙ୍କ ସ୍ବାସ୍ଥ୍ୟାବସ୍ଥା ଠିକ୍ ରହିଥିବା ଜଣାପଡ଼ିଛି।