ବିଞ୍ଝାରପୁର,୬ା୭(ରାମକୃଷ୍ଣ ଦାସ): ଯାଜପୁର ଜିଲା ବିଞ୍ଝାରପୁର ବ୍ଲକ ଅଧୀନ ବାଛୋଳ ପଞ୍ଚାୟତ ଦାଣ୍ଡିସାହି ସରକାରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟରେ ଶିକ୍ଷକଙ୍କ ବଦଳିକୁ ନେଇ ଅସନ୍ତୋଷ ପ୍ରକାଶ ପାଇଛି। ଶିକ୍ଷକ ଅମର ଦାସଙ୍କ ବଦଳିକୁ ବିରୋଧ କରି ଗୁରୁବାର ଗ୍ରାମବାସୀ, ଅଭିଭାବକ ଓ ଛାତ୍ରୀଛାତ୍ର ବିଦ୍ୟାଳୟରେ ତାଲା ପକାଇବା ସହିତ ବଦଳି ବାତିଲ ଦାବି କରିଛନ୍ତି।
ଛାତ୍ରୀଛାତ୍ରଙ୍କ ଉପସ୍ଥାପନ କମ ଯୋଗୁ ୨ ବର୍ଷ ହେବ ଶିଅଳପଡ଼ା ପ୍ରାଥମିକ ବିଦ୍ୟାଳୟକୁ ଦାଣ୍ଡିସାହି ସରକାରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟ ସହିତ ମିଶ୍ରଣ କରାଯାଇଛି। ଏହି ଆଧାରରେ ଶିଅଳପଡ଼ାର ୨ ଶିକ୍ଷକଙ୍କୁ ମଧ୍ୟ ଏହି ବିଦ୍ୟାଳୟରେ ନିଯୁକ୍ତ କରାଯାଇଥିଲା। ବର୍ତ୍ତମାନ ଦାଣ୍ଡିସାହି ସରକାରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟରେ ୭୧ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ବିଦ୍ୟାଳୟରେ ମୋଟ୍ ୪ ଶିକ୍ଷକ ଅଛନ୍ତି।
ପ୍ରତି ୩୦ଜଣ ଛାତ୍ରୀଛାତ୍ରରେ ଜଣେ ଶିକ୍ଷକ ନିଯୁକ୍ତ ରହିବା ନେଇ ସରକାରୀ ନିୟମ ରହିଛି। ମାତ୍ର ବିଞ୍ଝାରପୁର ବ୍ଲକରେ ଅନେକ ବିଦ୍ୟାଳୟରେ ଶିକ୍ଷକ ପଦବୀ ଖାଲି ପଡିଛି। ଚଳିତ ବର୍ଷ ୩୦ରୁ ଊର୍ଦ୍ଧ୍ୱ ଶିକ୍ଷୟିତ୍ରୀଶିକ୍ଷକ ଅବସର ଗ୍ରହଣ କରିଥିବାରୁ ଏବେ ବ୍ଲକରେ ଶିକ୍ଷକ ଅଭାବ ଉତ୍କଟ ସସମ୍ୟା ହୋଇଛି। ଅନ୍ୟ ବିଦ୍ୟାଳୟ ଗୁଡ଼ିକରେ ଶିକ୍ଷକ ପଦବୀ ଦୀର୍ଘଦିନ ହେବ ଖାଲି ପଡ଼ିଥିବାରୁ ଏବେ ବିଭିନ୍ନ ବିଦ୍ୟାଳୟରୁ ଶିକ୍ଷକ ବଦଳି କରାଯାଇ ଯେଉଁ ବିଦ୍ୟାଳୟଗୁଡ଼ିକରେ ସମସ୍ୟା ରହିଛି ସେଥିରେ ଅବସ୍ଥାପିତ କରାଯାଉଛି।
ଏହି ଆଧାରରେ ଦାଣ୍ଡିସାହି ପ୍ରକଳ୍ପ ପ୍ରାଥମିକ ବିଦ୍ୟାଳୟର ଶିକ୍ଷକ ଦାସଙ୍କୁ ଓଳେଇ ଚନ୍ଦନପୁରକୁ ବଦଳି କରାଯାଇଛି। ସେ ମଧ୍ୟ ଓଳେଇ ଚନ୍ଦନପୁର ବିଦ୍ୟାଳୟରେ ଯୋଗଦେଇ ବିଭାଗକୁ ଅବଗତ କରିସାରିଛନ୍ତି। ହେଲେ ତାଙ୍କ ବଦଳି ବାତିଲ କରା ନ ଗଲେ ଅନିର୍ଦ୍ଦିଷ୍ଟ ସମୟ ବିଦ୍ୟାଳୟରେ ତାଲା ପକାଇ ପ୍ରତିବାଦ କରିବାକୁ ଅଭିଭାବକମାନେ ଚେତାବନୀ ଦେଇଛନ୍ତି। ଅନ୍ୟପକ୍ଷରେ କେଉଁ ପରିସ୍ଥିତିରେ ବିଦ୍ୟାଳରେ ତାଲା ପକାଗଲା ସେ ନେଇ ଶିକ୍ଷା ବିଭାଗ ପକ୍ଷରୁ ବରିଷ୍ଠ ଅଧିକାରୀ ପ୍ରଧାନଶିକ୍ଷକଙ୍କ ଜରିଆରେ ତଦନ୍ତ କରିବେ ବୋଲି ବ୍ଲକ ଶିକ୍ଷା ଅଧିକାରୀ ସୁବାସ ଚନ୍ଦ୍ର ବିଶ୍ୱାଳ ସୂଚନା ଦେଇଛନ୍ତି।
