ଛତ୍ରପୁର,୬।୩(ଡି.ଏନ୍.ଏ.): ଗଞ୍ଜାମ ଜିଲା ଛତ୍ରପୁର ସରକାରୀ ଆଇଟିଆଇର ଛାତ୍ରୀଛାତ୍ରଙ୍କ ଦ୍ୱାରା ଅଦରକାରୀ ପଦାର୍ଥରୁ ତିଆରି ହୋଇଥିବା ବିଜୁବାବୁଙ୍କ ପ୍ରତିମୂର୍ତ୍ତି ଏବଂ ପ୍ରିୟ ଡାକୋଟା ବିମାନକୁ ଉଦ୍ଘାଟନ କରିଛନ୍ତି ବ୍ରହ୍ମପୁର ଏମ୍ପି ଚନ୍ଦ୍ରଶେଖର ସାହୁ ଏବଂ ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା।
ଓଡ଼ିଶାର ବରପୁତ୍ର ସ୍ବର୍ଗତ ବିଜୁ ପଟ୍ଟନାୟକଙ୍କ ୧୦୭ତମ ଜୟନ୍ତୀରେ ଛତ୍ରପୁର ସରକାରୀ ଆଇଟିଆଇ ପରିସରରେ ପ୍ରବାଦ ପୁରୁଷ ବିଜୁବାବୁଙ୍କ ଏହି ବିରାଟ ପ୍ରତିମୂର୍ତ୍ତି ଓ ତାଙ୍କ ପ୍ରିୟ ଡାକୋଟାକୁ ଛାତ୍ରୀଛାତ୍ରମାନେ ନିର୍ମାଣ କରିଛନ୍ତି। ଆଇଟିଆଇରେ ଥିବା ବିଭିନ୍ନ ଅଦରକାରୀ ଲୁହାରେ ଛାତ୍ରୀଛାତ୍ରମାନେ ଏହାକୁ ନିର୍ମାଣ କରିଛନ୍ତି। ଆଇଟିଆଇର ଇଲେକ୍ଟ୍ରିସଆନ, ଫିଟର ଏବଂ ମେକାନିକାଲ ଟ୍ରେଡ ସମେତ ଅନ୍ୟ ବିଭାଗର ଛାତ୍ରୀଛାତ୍ରମାନେ ଏହାକୁ ନିର୍ମାଣ କରିଛନ୍ତି।
ଛତ୍ରପୁର ସରକାରୀ ଆଇଟିଆଇର ଅଧ୍ୟକ୍ଷ ଇଂ. ପ୍ରିୟବ୍ରତ ପଣ୍ଡାଙ୍କ ସହ ଶିକ୍ଷକମାନଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ନିର୍ମାଣ କାର୍ଯ୍ୟ ସଫଳ ହୋଇଥିବା ଛାତ୍ରୀଛାତ୍ରମାନେ କହିଛନ୍ତି l ବିଜୁବାବୁଙ୍କ ପ୍ରତିମୂର୍ତ୍ତି ୮ ଫୁଟ ରହିଥିବା ବେଳେ ଡାକୋଟାର ଉଚ୍ଚତା ୭ ଫୁଟ, ଲମ୍ବା ୨୦ ଫୁଟ ଏବଂ ଓସାର ୨୬ ଫୁଟ ରହିଛି। ଏହି କାର୍ଯ୍ୟ ଗତ ୧୮ତାରିଖରୁ ଆରମ୍ଭ ହୋଇଥିଲା ବୋଲି ଛାତ୍ରଛାତ୍ରୀମାନେ କହିଛନ୍ତି। ଉଦ୍ଘାଟନୀ ଉତ୍ସବରେ ଛତ୍ରପୁର ସରକାରୀ ଉପଖଣ୍ଡ ଚିକିତ୍ସାଳୟର ଡାକ୍ତର ଗୋପବନ୍ଧୁ ବେହେରାଙ୍କ ସମେତ ବହୁ ମାନ୍ୟଗଣ୍ୟ ଅଧିକାରୀ ଯୋଗ ଦେଇଥିଲେ।