ଉମରକୋଟ, ୧୭।୯(ସ୍ବ.ପ୍ର.): ନବରଙ୍ଗପୁର ଜିଲା ଉମରକୋଟ ବ୍ଲକ ନେଉରା ପଞ୍ଚାୟତ ତେଲଗାଁ ଗ୍ରାମସ୍ଥିତ ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟରେ ଶୁକ୍ରବାର ଛାତ୍ରୀଛାତ୍ର ଓ ଅଭିଭାବକ ତାଲା ପକାଇଛନ୍ତି। ଏଠାରେ ଶିକ୍ଷକ ଅଭାବରୁ ପିଲାଙ୍କୁ ଗୁଣାତ୍ମକ ଶିକ୍ଷାଦାନ ମିଳି ପାରୁନାହିଁ ବୋଲି ଅଭିଭାବକମାନେ ଅଭିଯୋଗ କରିଛନ୍ତି। ୧୦ଜଣ ଶିକ୍ଷକଙ୍କୁ ନିଯୁକ୍ତି ନ ମିଳିବା ପର୍ଯ୍ୟନ୍ତ ଫାଟକରୁ ତାଲା ଖୋାଲାଯିବ ନାହିଁ ବୋଲି ଅଭିଭାବକମାନେ ଜିଦ୍ରେ ଅଡି ବସିଛନ୍ତି।
ତେଲଗାଁ ହାଇସ୍କୁଲରେ ୪୨୬ ପିଲା ପାଠ ପଢୁଛନ୍ତି। ପ୍ରାଥମିକ ବିଦ୍ୟାଳୟ ରେ ୩୧୧ ପିଲା ଓ ଉଚ୍ଚ ବିଦ୍ୟାଳୟରେ ୧୧୫ ପିଲା ଅଛନ୍ତି। ୮ ବର୍ଷ ହେବ ଏହି ସ୍କୁଲକୁ ଉଚ୍ଚ ବିଦ୍ୟାଳୟର ମାନ୍ୟତା ମିଳିଛି। ସେବେଠାରୁ ଜଣେ ଶିକ୍ଷକଙ୍କୁ ଏହି ହାଇସ୍କୁଲରେ ନିଯୁକ୍ତି ମିଳିନି। ଏଠାରେ ଜଣେ ମାତ୍ର ହାଇସ୍କୁଲ ମାନ୍ୟତା ଶିକ୍ଷକ ଓ ଚାରିଜଣ ପ୍ରାଥମିକ ଶିକ୍ଷକ ଅଛନ୍ତି। ନବମ ଓ ଦଶମ ଶ୍ରେଣୀ ପିଲାଙ୍କ ପାଠପଢ଼ା ବିପର୍ଯ୍ୟସ୍ତ ହୋଇ ପଡିଛି। ଶିକ୍ଷକ ନିଯୁକ୍ତି ପାଇଁ ଜିଲାପାଳ, ଉମରକୋଟ ବିଡିଓ, ବିଇଓ, ଏମ୍ପି, ବିଧାୟକଙ୍କୁ ଜଣାଇବା ପରେ ମଧ୍ୟ କେହି ଏ ଦିଗରେ କର୍ଣ୍ଣପାତ କରୁ ନ ଥିବା ଗ୍ରାମବାସୀ କହିଛନ୍ତି। ୧୦ଜଣ ଶିକ୍ଷକଙ୍କୁ ନିଯୁକ୍ତି ନ ମିଳିବା ପର୍ଯ୍ୟନ୍ତ ତାଲା ଖୋଲା ଯିବନି ବୋଲି ଗ୍ରାମବାସୀ କହିଛନ୍ତି। ସେହିଭଳି ପ୍ରଥମରୁ ଦଶମ ଶ୍ରେଣୀ ପାଇଁ ମାତ୍ର ୭ଟି କ୍ଲାସରୁମ୍ ରହିଛି। ୮ ବର୍ଷ ହେଲାଣି ଏଥିମଧ୍ୟରୁ ୩ଟି ଶ୍ରେଣୀ ଗୃହ ଅଧାପନ୍ତରିଆ ଅବସ୍ଥାରେ ପଡ଼ିଛି। ଯାହାର କି କବାଟ, ଝରକା କିମ୍ବା ଫ୍ଲୋରିଂ ହୋଇନି। ଆଉ ବଳକା ୪ଟି ଶ୍ରେଣୀଗୃହରେ ଚାଲିଛି ୧ରୁ ୧୦ ମ ଶ୍ରେଣୀ ଶିକ୍ଷାଦାନ। ଜିଲାପାଳ ଏହି ବିଦ୍ୟାଳୟର ସମସ୍ୟା ପ୍ରତି ଅବଗତ ହୋଇ ଏହାର ତୁରନ୍ତ ସମାଧାନ କରିବାକୁ ଗ୍ରାମବାସୀ ଦାବି କରିଛନ୍ତି। ୧୫ଦିନ ପୂର୍ବରୁ ବିଦ୍ୟାଳୟ ପ୍ରଧାନ ଶିକ୍ଷକଙ୍କ ମାଧ୍ୟମରେ ବିଇଓଙ୍କୁ ଶିକ୍ଷକ ନିଯୁକ୍ତି ନ ଦେଲେ ବିଦ୍ୟାଳୟରେ ତାଲା ପକାଯିବ ବୋଲି ଜଣାଇଥିଲୁ। ସମାଧାନ ପାଇଁ ସେ ପ୍ରତିଶ୍ରୁତି ଦେଇଥିଲେ। କିନ୍ତୁ ଏ ଦିଗରେ କୌଣସି ପଦକ୍ଷେପ ନିଆ ନ ଯିବାରୁ ଧାରଣାରେ ବସିଛୁ ବୋଲି ଅଭିଭାବକମାନେ କହିଛନ୍ତି। ବିଦ୍ୟାଳୟରେ ତାଲା ପକେଇବା ଘଟଣା ବିଷୟରେ ବିଇଓ ବିକାଶ ଚନ୍ଦ୍ର ସରକାରଙ୍କୁ ପଚାରିବାରୁ ଗ୍ରାମବାସୀ ଗୋଟିଏ ଦରଖାସ୍ତ ଦେଇଥିଲେ । ଆମେ ଅନୁଧ୍ୟାନ କରି ଶିକ୍ଷକ ଦେବୁ ବୋଲି ଚିନ୍ତା କରିଛୁ। ବିଦ୍ୟାଳୟ ବନ୍ଦ କରି ଏଭଳି କରିବା ଅନୁଚିତ। ବର୍ତ୍ତମାନ ଜିଲାରେ ଶିକ୍ଷକ ଅଭାବ। ତେଣୁ ଏତେ ସଂଖ୍ୟକ ଶିକ୍ଷକ ନିଯୁକ୍ତି କଷ୍ଟକର। ସିଆର୍ସିସି ସତ୍ୟବ୍ରତ କର ସେଠାକୁ ଯାଇ ଯାଇ ସ୍ଥିତି ଅନୁଧ୍ୟାନ କରି ରିପୋର୍ଟ ଦେଇଛନ୍ତି। ଆଜି ଦୁଇ ଜଣ ପ୍ରାଥମିକ ଶିକ୍ଷକଙ୍କୁ କାର୍ଯ୍ୟରେ ଯୋଗ ଦେବାକୁ ପଠାଯାଇଛି। ହାଇସ୍କୁଲ ଶିକ୍ଷକ ମୋ ହାତରେ ନାହିଁ, ତାହା ଜିଲା ଶିକ୍ଷା ଅଧିକାରୀ ନିଷ୍ପତ୍ତି ନେବେ ବୋଲି ସେ କହିଛନ୍ତି ।