ବ୍ରହ୍ମପୁର ଅଫିସ,୫ା୭: ସ୍ବତନ୍ତ୍ର ଫାଷ୍ଟଟ୍ରାକ ପୋକ୍ସୋ ଜଜ୍ ଗଣେଶ୍ୱର ପତି ଶୁକ୍ରବାର ଜଣେ ଛାତ୍ରୀଙ୍କ ଫଟୋ ଭାଇରାଲ ମାମଲାର ବିଚାର କରିଥିଲେ। ପ୍ରମାଣ ଅଭାବରୁ ସେ ଅଭିଯୁକ୍ତଙ୍କୁ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ଅଭିଯୁକ୍ତ ଜଣଙ୍କ ହେଲେ ପୁରୁଷୋତ୍ତମପୁର ଥାନା ଅଞ୍ଚଳର ଋଷିଆ ବେହେରା ଓରଫ ହୃଷିକେଶ।
ପ୍ରକାଶ ଯେ, ଋଷିଆ ଗ୍ରାମର ଜଣେ ଯୁକ୍ତ ଦୁଇ ଛାତ୍ରୀଙ୍କୁ ଏକତରଫା ପ୍ରେମ କରୁଥିଲେ। ଛାତ୍ରୀ ଜଣଙ୍କ କଲେଜ ଯିବା ବେଳେ ଋଷିଆ ରାସ୍ତାରେ ତାଙ୍କର ଫଟୋ ଉଠାଇଥିଲେ। ପରେ ଛାତ୍ରୀଙ୍କ ମା’ଙ୍କ ନିକଟକୁ ଫୋନ କରି ତାଙ୍କ ଝିଅକୁ ବିବାହ କରିବାକୁ ଚାହୁଁଥିବା କହିଥିଲେ। ଏହି ପ୍ରସ୍ତାବକୁ ଛାତ୍ରୀଙ୍କ ପରିବାର ଲୋକ ପ୍ରତ୍ୟଖାନ କରିଥିଲେ। ତେଣୁ ଋଷିଆ ୨୦୧୮ ଜୁଲାଇ ୪ ତାରିଖରେ ଛାତ୍ରୀଙ୍କ ଫଟୋକୁ ଭାଇରାଲ କରିଥିଲେ। ପରେ କେତେଜଣ ଲୋକଙ୍କୁ ନେଇ ଛାତ୍ରୀଙ୍କ ଘର ପାଖକୁ ଯାଇ ତାଙ୍କୁ ଅପହରଣ କରିବାକୁ ଧମକ ଦେଇଥିଲେ। ଏଥିରେ ପରିବାରର ମର୍ଯ୍ୟାଦା ହାନି ହୋଇଥିବା ଛାତ୍ରୀଙ୍କ ବାପା ଥାନାରେ ଅଭିଯୋଗ କରିଥିଲେ। ପୋଲିସ ନଂ.୧୪୫/ ୧୮ରେ ଏକ ମାମଲା ରୁଜୁ କରି ଅଭିଯୁକ୍ତ ଋଷିଆଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ପରେ ସେ ଜାମିନ ପାଇଥିଲେ। ଶୁକ୍ରବାର ୬ଜଣ ସାକ୍ଷୀଙ୍କ ବୟାନକୁ ଭିତ୍ତି କରି ଉପଯୁକ୍ତ ପ୍ରମାଣ ମିଳି ନ ଥିବାରୁ ବିଚାରପତି ଉପରୋକ୍ତ ରାୟ ପ୍ରକାଶ କରିଛନ୍ତି। ମୁଦୁଲାଙ୍କ ପକ୍ଷରୁ ମକଦ୍ଦମା ଲଢ଼ୁଥିବା ପ୍ରଦୀପ କୁମାର ଶତପଥୀ ଏହି ସୂଚନା ଦେଇଛନ୍ତି।