ଭୁବନେଶ୍ୱର,୨୧ା୫(ବ୍ୟୁରୋ): ଭୁବନେଶ୍ୱର ଶହୀଦନଗରସ୍ଥିତ ମହର୍ଷି ନାଚୁରାଲ ଲ’ କଲେଜରେ ପରୀକ୍ଷା ପରିଚାଳନାକୁ ନେଇ ଛାତ୍ରୀଛାତ୍ରଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଶନିବାର ନିର୍ଦ୍ଧାରିତ ସମୟଠାରୁ ୨ ଘଣ୍ଟା ବିଳମ୍ବରେ ପରୀକ୍ଷା ହେବା ଓ ଏହି ସମୟରେ ପରୀକ୍ଷା ଇନ୍ଚାର୍ଜ ଏବଂ ସୁପରିଣ୍ଟେଣ୍ଡେଣ୍ଟ ଛୁଟିରେ ରହିବା ଘଟଣାକୁ ନେଇ ପରୀକ୍ଷା ହଲ୍ରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ପିଲାଙ୍କ ପ୍ରତି କଲେଜ କର୍ତ୍ତୃପକ୍ଷ ଅବହେଳା କରିବା ସହ ସେମାନଙ୍କ ଭବିଷ୍ୟତ ନଷ୍ଟ କରୁଥିବା ଯୁକ୍ତ୩ ରାଜନୀତି ବିଜ୍ଞାନ ବିଭାଗ ଶେଷବର୍ଷ ଛାତ୍ରୀଛାତ୍ର ଅଭିଯୋଗ କରି କ୍ୟାମ୍ପସରେ ହୋହଲ୍ଲା କରିଥିଲେ। ସେମାନଙ୍କ ଅଭିଯୋଗ ଅନୁସାରେ, ଶନିବାର ବିଭାଗୀୟ ଛାତ୍ରୀଛାତ୍ର ପ୍ରୋଜେକ୍ଟ ଦାଖଲ କରିବାର ଥିଲା। ପୂର୍ବ ନିର୍ଦ୍ଧାରିତ ୧୦ଟା ୩୦ରେ ଛାତ୍ରୀଛାତ୍ର ଓ ଏକ୍ସଟର୍ନାଲ ପରୀକ୍ଷକ ପହଞ୍ଚତ୍ଥିଲେ ମଧ୍ୟ ଇଣ୍ଟରନାଲ ପରୀକ୍ଷକ ଆସି ନ ଥିଲେ। ପରୀକ୍ଷା ଇନ୍ଚାର୍ଜ ଓ ସୁପରିଣ୍ଟେଣ୍ଡେଣ୍ଟ ଛୁଟିରେ ଥିବାବେଳେ ପରୀକ୍ଷା ପରିଚାଳନା ପାଇଁ କେହି ଅଧ୍ୟାପକ ଆସି ନ ଥିବାରୁ ଛାତ୍ରୀଛାତ୍ରଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ତେଣୁ ଛାତ୍ରୀଛାତ୍ର ବିଭାଗୀୟ ଅଧ୍ୟାପକଙ୍କୁ ଫୋନ୍ରେ ଯୋଗାଯୋଗ କରିଥିଲେ ମଧ୍ୟ ସେ ବ୍ୟକ୍ତିଗତ କାମ କହି ପରୀକ୍ଷା ହଲ୍କୁ ଆସି ନ ଥିଲେ। ଏହାକୁ ନେଇ ପରୀକ୍ଷା ହଲ୍ରେ ଉତ୍ତେଜନା ପ୍ରକାଶ ପାଇଥିଲା। ପରେ ୧୨ଟା ୩୦ରେ ପରୀକ୍ଷା ଆରମ୍ଭ ହୋଇଥିଲା। ପିଲାଙ୍କ କହିବା କଥା, ପରୀକ୍ଷା ପୂର୍ବରୁ କଲେଜରେ ପାଠ୍ୟକ୍ରମ ଶେଷ କରାଯାଉ ନାହିଁ। ଛାତ୍ରୀଛାତ୍ର ଅଭିଯୋଗ କଲେ ବାକି ଥିବା ପାଠ୍ୟକ୍ରମ ୟୁୁଟ୍ୟୁବ୍ରୁ ପଢ଼ିବା ପାଇଁ ଅଧ୍ୟାପକ କହୁଥିବା ଆଦି ଅଭିଯୋଗ ଉଠାଇ ଛାତ୍ରୀଛାତ୍ରମାନେ ଉତ୍ତେଜିତ ହୋଇପଡିଥିଲେ। ତେବେ ଏ ସଂକ୍ରାନ୍ତରେ କଲେଜ ପ୍ରିନ୍ସିପାଲଙ୍କ ପ୍ରତିକ୍ରିୟା ମିଳିପାରି ନାହିଁ।
