ଦାରିଙ୍ଗବାଡ଼ି,୧ା୧୨(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ସିମନବାଡ଼ି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ମାଳମାଳ ସମସ୍ୟା ଲାଗିରହିଛି। ଏହାର ସମାଧାନ ଦିଗରେ ନା ପ୍ରଶାସନ, ଶିକ୍ଷା ବିଭାଗ, ଜିଲା ଓ ସ୍ଥାନୀୟ ଅଧିକାରୀ କେହି ସମସ୍ୟାର ସମାଧାନ ପାଇଁ ପଦକ୍ଷେପ ନେଉନାହାନ୍ତି। ଫଳରେ ସୋମବାର ବିଦ୍ୟାଳୟର ଅଷ୍ଟମଶ୍ରେଣୀ ଛାତ୍ରୀଛାତ୍ର ଏକାଠି ହୋଇ ପଞ୍ଚାୟତ କାର୍ଯ୍ୟାଳୟକୁ ଘେରିଛନ୍ତି। ସେମାନଙ୍କ ଅନେକ ସମସ୍ୟା ରହିଥିବା ବେଳେ ସବୁଠାରୁ ବଡ଼ ସମସ୍ୟା ହେଲା ଶୌଚାଳୟଟିଏ ନାହିଁ। ଫଳରେ ସ୍କୁଲର ହତା ମଧ୍ୟରେ ଖୋଲା ଯିବାକୁ ପଡୁଛି କିମ୍ବା ଘରକୁ ଯିବାକୁ ପଡୁଛି। ବାରମ୍ବାର ସ୍କୁଲ କର୍ତ୍ତୃପକ୍ଷ ଓ ଅଭିଭାବକ ଛାତ୍ରୀଛାତ୍ର ଅଭିଯୋଗ କରିଥିଲେ ମଧ୍ୟ କେହି ତାଙ୍କ କଥାକୁ କର୍ଣ୍ଣପାତ କଲେ ନାହିଁ। ଶେଷରେ ସେମାନେ ଅଭିନବ ପ୍ରତିବାଦ କରିବା ସହ ସ୍କୁଲ କର୍ତ୍ତୃପକ୍ଷଙ୍କୁ ଲିଖିତ ଜଣାଇ ଲମ୍ବା ଧାଡ଼ିରେ ସ୍କୁଲ ପାଠ ପାଠ ଛାଡ଼ି ନିଜ ହକ୍ ପାଇଁ ପଞ୍ଚାୟତ କାର୍ଯ୍ୟାଳୟ ବାହାରିପଡ଼ିଥିଲେ। ମଧ୍ୟାହ୍ନରେ ଏଭଳି ଘଟଣା ଦେଖି ଅଞ୍ଚଳବାସୀ ମଧ୍ୟ ଚକିତ ହୋଇଯାଇଛନ୍ତି। ଛାତ୍ରୀମାନେ ନିଜ ଆବଶ୍ୟକ ମୌଳିକ ସୁବିଧା ପାଇବାରୁ ବଞ୍ଚିତ ଯୋଗୁ ବାଧ୍ୟ ହୋଇ ବିଦ୍ୟାଳୟ ଛାଡ଼ି ଏଭଳି ପଦକ୍ଷେପ ନେଇଛନ୍ତି। ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ପ୍ରଭାତ ପ୍ରଧାନଙ୍କ ନିକଟରେ ନିଜ ବିଦ୍ୟାଳୟର ସମସ୍ୟା ସମ୍ପର୍କରେ ଅଭିଯୋଗ କରିବା ପରେ ସେ ସମସ୍ତ ଅଭିଯୋଗ ଶୁଣିବା ପରେ ଦେଇଥିଲେ ଆସନ୍ତା ଏକ ମାସ ମଧ୍ୟରେ ସମସ୍ୟାର ସମାଧାନ କରିବାକୁ ପ୍ରତିଶ୍ରୁତି ଦେଇଥିଲେ। ପରେ ଛାତ୍ରୀଛାତ୍ର ଆନ୍ଦୋଳନରୁ ଓହରିଥିଲେ।