ନୂଆପଡ଼ା,୧୨।୯(ମକାରୁ ବେମାଲ): କେନ୍ଦ୍ର ତଥା ରାଜ୍ୟ ସରକାର ଶିକ୍ଷାର ପ୍ରଚାର ପ୍ରସାର ଓ ଲୋକାଭିମୁଖୀ କରିବା ଛାତ୍ରୀଛାତ୍ରଙ୍କ ଉତ୍ସାହ ବଢାଇବା ପାଇଁ ପୋଷାକଠାରୁ ଆରମ୍ଭ କରି ମଧ୍ୟାହ୍ନ ଭୋଜନ ବ୍ୟବସ୍ଥା କରିଛନ୍ତି। ପିଲାଙ୍କୁ ଆକୃଷ୍ଟ କରିବା ପାଇଁ ବିଭିନ୍ନ ଖେଳ ସାମଗ୍ରୀ ଯୋଗାଇବା ସହ ସୁସ୍ଥ ପରିବେଶ ପାଇଁ ବଗିଚାମାନ ନିର୍ମାଣ କରାଯାଉଛି। ହେଲେ ଛାତ୍ରୀଛାତ୍ର ଅନୁପାତରେ ଶିକ୍ଷକ କିମ୍ବା ଶ୍ରେଣୀ ଗୃହ ନ ଥିବାରୁ ପିଲାଙ୍କ ପାଠପଢ଼ାରେ ସମସ୍ୟା ଦେଖାଦେଉଛି। ଏପରି ଏକ ଚିତ୍ର ନୂଆପଡା ଜିଲା କୋମନା ବ୍ଲକରେ ଦେଖିବାକୁ ମିଳିଛି। କୋମନା ବ୍ଲକ ଅନ୍ତର୍ଗତ ରଜାନା ଉଚ୍ଚ ପ୍ରାଥମିକ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୨୧୫ ଛାତ୍ରୀଛାତ୍ରଙ୍କ ପାଇଁ ରହିଛି ୫ଟି ଶ୍ରେଣୀ କୋଠରି। ସେଥିମଧ୍ୟରୁ ଗୋଟିଏ ସମ୍ପୂର୍ଣ୍ଣ ଡେମେଜ ହୋଇ ଛାତରୁ ସିମେଣ୍ଟ ଅତଡା ଖସୁଛି। ଛାତ ତଳକୁ ଦବି ଯାଇ ବିପଦ ସଙ୍କୁଳ ଅବସ୍ଥାରେ ରହିଛି। ଅନ୍ୟ ଏକ କୋଠରିରେ ବର୍ଷା ହେଲେ ଛାତରୁ ପାଣି ଗଳୁଛି। ୩ଟି କୋଠରିରେ ୮ଟି ଶ୍ରେଣୀର ଛାତ୍ରୀଛାତ୍ର କଭଳି ଅଧ୍ୟୟନ କରୁଥିବେ ତାହା ସହଜେ ଅନୁମେୟ। ବର୍ଷା ନ ହେଲେ ବାରଣ୍ଡାରେ ବସାଇ ଶିକ୍ଷାଦାନ କରାଯାଏ। ବର୍ଷା ହେଲେ ୩ଟି କୋଠରିରେ ସବୁ ପିଲାକୁ ବସାଇ ପାଠପଢା ଯାଉଛି। ବିଦ୍ୟାଳୟରେ ଥିବା ନଳକୂଅରେ ଫ୍ଲୋରାଡଯୁକ୍ତ ପାଣି ବାହାରୁ ଥିବାରୁ ପ୍ରଶାସନ ପକ୍ଷରୁ ନିଷିଧ କରାଯାଇଛି। ହେଲେ ବିଦ୍ୟାଳୟ ପାଖରେ ନଳକୂଅ କିମ୍ବା ଅନ୍ୟ କୌଣସି ପାଣି ସୁବିଧା ନ ଥିବାରୁ ଛାତ୍ରୀଛାତ୍ରଙ୍କ ମଧ୍ୟାହ୍ନ ଭୋଜନ ପାଇଁ ଫ୍ଲୋରାଇଡଯୁକ୍ତ ପାଣି ବ୍ୟବହାର କରାଯାଉଛିି। ଛାତ୍ରୀଛାତ ଅନୁପାତରେ ପରିଶ୍ରାଗାର ଓ ପାଇଖାନା ନ ଥିବାରୁ ବାହାରକୁ ଯିବାକୁ ପଡୁଛି। ଶ୍ରେଣୀ କୋଠରି ଲାଗି ରୋଷେଇ ଗୃହ ରହି ଥିବାରୁ ରୋଷେଇ ବେଳେ ଧୂଆଁମୟ ହୋଇ ଉଠୁଛି। ଫଳରେ ଛାତ୍ରୀଛାତ୍ରମାନଙ୍କ ପ୍ରତି ଆଖି ରୋଗ ହେବାର ଆଶଙ୍କା ରହିଛି। ସ୍ଥାନୀୟ ସରପଞ୍ଚ କ୍ଷିରସିନ୍ଧୁ ଭୋଇଙ୍କୁ ବିଦ୍ୟାଳୟ ପରିଚାଳନା କମିଟି ଅନେକ ଥର ଜଣାଇଥିଲେ ମଧ୍ୟ କର୍ଣ୍ଣପାତ କରୁ ନ ଥିବା ଅଭିଯୋଗ କରିଛନ୍ତି। ଶ୍ରେଣୀ ଗୃହ ପାଇଁ ଗ୍ରାମବାସୀ ଶିକ୍ଷା ବିଭାଗ, ବିଡିଓଙ୍କୁ ମଧ୍ୟ ଅନେକ ଥର ଲିଖିତ ଭାବେ ଜଣାଇଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଏ ନେଇ କୋମନା ଗୋଷ୍ଠି ଶିକ୍ଷା ଅଧିକାରୀ ଅନିତା ପଣ୍ଡାଙ୍କୁ ପଚାରିବାରୁ ମୁଁ ନୂତନ ଭାବେ ଆସିଛି। ତଦନ୍ତ କରି ସମସ୍ୟା ସମାଧାନ କରାଯିବ ବୋଲି କହିଛନ୍ତି। ବିଦ୍ୟାଳୟ ସମସ୍ତ ସମସ୍ୟା ଶୀଘ୍ର ସାମାଧାନ କରାଯାଉ ବୋଲି ବିଦ୍ୟାଲୟ ପରିଚାଳନା କମିଟି ସଭାପତି ପ୍ରଭାସ ଚିନ୍ଦା, ଉପସଭାପତି ଟେଭେ ଆଡବଙ୍ଗ, ଶୁଶିଲା ଆଡବଙ୍ଗ, ଗୀତା ବନଛୋର, ଯାଜ୍ଞାସିନୀ ଚିନ୍ଦା, ଦୁର୍ବଳ ବାଗ,ଅର୍ଜୁନ ଚିନ୍ଦା, ସିୟାରାମ ହାତି, ତୁଳସିରାମ ପୋଡ, ଅଯୋଧ୍ୟା ଶଗରିଆ, ଯୁଗେଶ୍ୱର ବାଗ, ଗଣ୍ଡାରାମ ଶଗରିଆ, ପରମାନନ୍ଦ ବାଗ, ମଧୁ ଚିନ୍ଦା, ବିଦ୍ୟାଧର ଚିନ୍ଦା, ଉପେନ୍ଦ୍ର ଚିନ୍ଦା, ହିରାଲାଲ ହାତି ପ୍ରମୁଖ ଦାବି କରିଛନ୍ତି।