ଚଣ୍ଡିଖୋଲ,୨ା୧(ଡି.ଏନ.ଏ.): ୧୯୭୧ ଭାରତ-ପାକିସ୍ତାନ ଯୁଦ୍ଧ ବେଳେ ବ୍ୟବହୃତ ହୋଇଥିବା ଏକ ରୁଷ୍ ନିର୍ମିତ ଯୁଦ୍ଧ ଟ୍ୟାଙ୍କ ଶନିବାର ଚଣ୍ଡିଖୋଲସ୍ଥିତ ବାବା ଭୈରବାନନ୍ଦ ସ୍ବୟଂଶାସିତ ମହାବିଦ୍ୟାଳୟରେ ପହଞ୍ଚିଛି। ଛାତ୍ରୀଛାତ୍ରଙ୍କୁ ଦେଶ ପ୍ରେମରେ ଉଦ୍ବୁଦ୍ଧ ହେବା ପାଇଁ ଏହି ଟ୍ୟାଙ୍କ ପ୍ରଦର୍ଶନୀ କରାଯିବ ବୋଲି ମହାବିଦ୍ୟାଳୟ ଅଧ୍ୟକ୍ଷ ଡ. ବୀରେନ୍ଦ୍ର ମିଶ୍ର ସୂଚନା ଦେଇଛନ୍ତି। ଏହି ଟ୍ୟାଙ୍କଟି ଭାରତ ସୀମାରେ ଥିଲା। ତେବେ ଛାତ୍ରୀଛାତ୍ରଙ୍କଠାରୁ ଆରମ୍ଭ କରି ସାଧାରଣ ଜନତା ଯୁଦ୍ଧ ଟ୍ୟାଙ୍କ ବିଷୟରେ ପରିଚିତ ପାଇଁ ଏହାକୁ ମହାବିଦ୍ୟାଳୟ ପରିସରରେ ରଖିବା ଲାଗି ଜଣେ କମାଣ୍ଡାଣ୍ଟ ପ୍ରସ୍ତାବ ଦେଇଥିଲେ।
ଚଣ୍ଡିଖୋଲ ମହାବିଦ୍ୟାଳୟ ପୁରାତନ ଛାତ୍ରୀଛାତ୍ର ଏହାକୁ ଆଣିବା ପାଇଁ ୩ଲକ୍ଷରୁ ଊର୍ଦ୍ଧ୍ୱଟଙ୍କା ପ୍ରଦାନ କରିଥିବାବେଳେ ମହାବିଦ୍ୟାଳୟ ତରଫରୁ ୧ଲକ୍ଷ ୮ହଜାର ଟଙ୍କା ପ୍ରଦାନ କରାଯାଇଥିଲା। ମହାବିଦ୍ୟାଳୟ ଅଧ୍ୟକ୍ଷ, ପରିଚାଳନା କମିଟି ସଭାପତି ବିନାୟକ ପଣ୍ଡା, ପୁରାତନ ଛାତ୍ର ସଂସଦ ତରଫରୁ ଦେବରାଜ ବେହେରା, ଚଣ୍ଡିଖୋଲ ଓକିଲ ସଂଘ ସମ୍ପାଦକ ପ୍ରକାଶ ଦାସ, ଏନ୍ସିସି କମାଣ୍ଡାଣ୍ଟ୍ ଅଧ୍ୟାପକ ଦିଲୀପ ନାୟକ ଓ ସଲୀଳରାଜନନ୍ଦନ ମହାନ୍ତିଙ୍କ ସମେତ ଛାତ୍ରୀଛାତ୍ର, ଅଧ୍ୟାପିକାଅଧ୍ୟାପକ ଏବଂ ସ୍ଥାନୀୟ ଜନସାଧାରଣ ଚଣ୍ଡିଖୋଲଛକଠାରୁ ଟ୍ୟାଙ୍କକୁ ସ୍ବାଗତ କରି କଲେଜ ପରିସରରେ ପହଞ୍ଚାଇଥିଲେ।