ଥିରୁଭାନନ୍ତପୁରମ୍,୧୨।୪: ଜଣେ ବ୍ୟକ୍ତି ଦିନରେ ପାଠ ପଢ଼ୁଥିବା ବେଳେ ରାତିରେ ଜଗୁଆଳି କାମ କରୁଥିଲେ। ସେ ସ୍ନାତକ ପର୍ଯ୍ୟନ୍ତ ପାଠ ପଢ଼ିଛନ୍ତି। ଏବେ ରାଞ୍ଚିର ଆଇଆଇଏମ୍ରେ ସହକାରୀ ପ୍ରଫେସର ହେବାର ସୌଭାଗ୍ୟ ଲାଭ କରିଛନ୍ତି। ଏମିତି ଜଣେ ଅନନ୍ୟ ପ୍ରତିଭାର ଅଧିକାରୀ ହେଉଛନ୍ତି କେରଳର ୨୮ ବର୍ଷୀୟ ରଣଜିତ୍ ରାମଚନ୍ଦ୍ରନ। ତାଙ୍କର ଏହି ସଂଘର୍ଷମୟ ଜୀବନଯାତ୍ରା ଅନେକ ପ୍ରତିକୂଳ ପରିସ୍ଥିତି ବିରୋଧରେ ସଂଗ୍ରାମ କରିବାକୁ ଅନ୍ୟମାନଙ୍କୁ ପ୍ରେରଣା ଯୋଗାଇବ।
ତାଙ୍କ ଫେସବୁକ୍ ପୋଷ୍ଟରେ ଲେଖାଯାଇଛି, ଏଠାରେ ଆଇଆଇଏମ୍ ପ୍ରଫେସର ଜନ୍ମ ହୋଇଛନ୍ତି। ଏହି ପୋଷ୍ଟତଳେ ଏକ ଭଙ୍ଗା ଝୁମ୍ପୁଡ଼ି ଘରର ଫଟୋ ଅଛି। ଯେଉଁ ଘରେ ବର୍ଷା ହେଲେ ପାଣି ଗଳିଥାଏ।
ଏପ୍ରିଲ ୯ରେ ତାଙ୍କର ଏହି ପ୍ରେରଣାଦାୟକ ପୋଷ୍ଟ ସୋସିଆଲ ମିଡିଆରେ ଭାଇରାଲ ହୋଇଥିଲା। ବର୍ତ୍ତମାନ ଏହାକୁ ୩୭୦୦୦ ଲୋକ ଲାଇକ୍ କରିଛନ୍ତି। ସେହି ପୋଷ୍ଟରେ ସେ ତାଙ୍କ ସଂଗ୍ରାମର କାହାଣୀ କହିଛନ୍ତି। କେରଳ ଅର୍ଥମନ୍ତ୍ରୀ ଥୋମାସ ଆଇଜାକ ରାମଚନ୍ଦ୍ରନଙ୍କୁ ଫେସ୍ବୁକ୍ରେ ଅଭିନନ୍ଦନ ଜଣାଇବା ସହ ସମସ୍ତଙ୍କ ପାଇଁ ପ୍ରେରଣା ବୋଲି କହିଛନ୍ତି। ସେ ସୋସିଆଲ ମିଡିଆରେ ‘Ranjith R Panathur’ ନାମରେ ଜଣାଶୁଣା।
ରାମଚନ୍ଦ୍ରନ ଦଶମ ପାସ ପରେ କଲେଜରେ ଅର୍ଥଶାସ୍ତ୍ରରେ ଡିଗ୍ରୀ ହାସଲ କରିଥିଲେ। ସେତେବେଳେ ସେ କସାରଗୋଡର ପାନାଥୁରରେ ବିଏସ୍ଏନ୍ଏଲ୍ ଟେଲିକମ୍ ଏକ୍ସଚେଞ୍ଜରେ ରାତ୍ରି ଜଗୁଆଳ ଭାବରେ କାମ କରୁଥିଲେ। ସେ ଲେଖିଛନ୍ତି, ‘ମୁଁ ଦିନରେ କଲେଜ ଯାଉଥିଲି ଆଉ ରାତିରେ ଟେଲିଫୋନ୍ ଏକ୍ସଚେଞ୍ଜ ଅଫିସରେ କାମ କରୁଥିଲି। ସ୍ନାତକ ପାସ୍ କରିବା ପରେ ଆଇଆଇଟି ମାଡ୍ରାସରେ ତାଙ୍କୁ ସିଟ୍ ମିଳିଲା। କିନ୍ତୁ ତାଙ୍କୁ ମାଲାୟଲମ ଭାଷା ଜଣା ନ ଥିଲା। ଫଳରେ ନିରାଶ ହୋଇ ସେ ପିଏଚ୍ଡି ଛାଡ଼ିଦେବାକୁ ନିଷ୍ପତ୍ତି ନେଲେ। ମାତ୍ର ତାଙ୍କ ତତ୍ତ୍ୱାବଧାରକ ସୁଭାଷ ତାଙ୍କୁ ଏମିତି କରିବାକୁ ମନା କଲେ। ସେ ଲେଖିଛନ୍ତି, ମୁଁ ସଂଘର୍ଷ କରି ମୋର ସ୍ବପ୍ନକୁ ସାକାର କରିବାକୁ ସ୍ଥିର କଲି। ଗତବର୍ଷ ପିଏଚ୍ଡି ସମାପ୍ତ କଲି। ଦୁଇମାସ ହେଲା ସେ ବେଙ୍ଗାଲୁରୁର ଖ୍ରୀଷ୍ଟ ବିଶ୍ୱବିଦ୍ୟାଳୟର ସହକାରୀ ପ୍ରଫେସର ଭାବେ ରହିଛନ୍ତି।
ସେ ଗଣମାଧ୍ୟମକୁ କହିଛନ୍ତି ଯେ, ମୁଁ କେବେ ଭାବି ନ ଥିଲି ଏହି ପୋଷ୍ଟ ଏତେ ଭାଇରାଲ ହେବ। ମୁଁ ମୋ ଜୀବନର କାହାଣୀ ପୋଷ୍ଟ କରିଥିଲି। ଯାହା ଅନ୍ୟମାନଙ୍କୁ ପ୍ରେରଣା ଯୋଗାଇବ। ମୁଁ ଚାହେଁ ସମସ୍ତେ ଭଲ ସ୍ବପ୍ନ ଦେଖନ୍ତୁ ଏବଂ ଏହାକୁ ପାଇବା ପାଇଁ ସଂଗ୍ରାମ ଜାରିରଖନ୍ତୁ। ନିଶ୍ଚିତ ସଫଳତା ମିଳିବ।
ରାମଚନ୍ଦ୍ରନ କହିଛନ୍ତି, ଆର୍ଥିକ ଅସୁବିଧା ହେତୁ ସେ ବାରମ୍ବାର ସ୍କୁଲ ଛାଡ଼ିଥିଲେ। ତାଙ୍କ ପିତା ଜଣେ ଟେଲର ଏବଂ ମା’ ମହାତ୍ମାଗାନ୍ଧି ଗ୍ରାମୀଣ ଯୋଜନାର ଜଣେ ଦିନ ମଜୁରିଆ ଭାବେ କାମ କରନ୍ତି। ରାମଚନ୍ଦ୍ରନଙ୍କ ସଂଘର୍ଷ କାହାଣୀ ଅନେକଙ୍କ ହୃଦୟକୁ ଛୁଇଁଛି। ଏହା ଅନ୍ୟମାନଙ୍କ ପାଇଁ ନିଶ୍ଚିତ ପ୍ରେରଣା ଯୋଗାଇବ ଏଥିରେ ଦ୍ୱିମତ ନାହିଁ।