ପରଜଙ୍ଗ, ୯।୧୦(ଡି.ଏନ୍.ଏ.): ବାପା ଦିନ ମଜୁରିଆ। ସାରା ଦିନ କଟେ ହାଡ଼ଭଙ୍ଗା ପରିଶ୍ରମରେ। ସଂସାର ରଥକୁ ଚଳାଇ ନେବାକୁ ମା’ଙ୍କର ଅବଦାନ ବି କମ୍ ନୁହେଁ। ରାତି ପାହିଲେ ସଫା କରନ୍ତି ଗଁା ଲୋକଙ୍କ କୁଢ଼କୁଢ଼ ମଇଳା ଲୁଗାପଟା। ଅଭାବୀ ଜୀବନକୁ ଅମାପ କଷଣ। ହେଲେ ଦୁହିଁଙ୍କ ହାଡ଼ଭଙ୍ଗା ପରିଶ୍ରମର ମୂଲ୍ୟ ମିଳିଛି। ସଦ୍ୟ ପ୍ରକାଶିତ ଓଡ଼ିଶା ସିଭିଲ୍ ସର୍ଭିସ୍ (ଓସିଏସ୍)-୨୦୨୦ ପରୀକ୍ଷାରେ ପୁଅ ପାଇଛନ୍ତି ୭୬ତମ ର଼୍ୟାଙ୍କ୍। କଠିନ ଅଧ୍ୟବସାୟ ଓ ଦୃଢ଼ ଇଚ୍ଛାଶକ୍ତି ଆଗରେ ଅଭାବ ଅନଟନ ପରାସ୍ତ ହୋଇଥିବାବେଳେ ଏ କ୍ଷେତ୍ରରେ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି ଢେଙ୍କାନାଳ ଜିଲା ପରଜଙ୍ଗ ବ୍ଲକ ପାଟରପଦା ପଞ୍ଚାୟତ କଟାବାହଳ ଗ୍ରାମର ମେଧାବୀ ଛାତ୍ର ମୁନା ସେଠୀ।
ରବୀନ୍ଦ୍ର ସେଠୀ ଏବଂ ବାସନ୍ତୀ ସେଠୀଙ୍କ ସାନପୁଅ ହେଉଛନ୍ତି ମୁନା। ଗଁା ସ୍କୁଲରୁ ପଞ୍ଚମ ଏବଂ ସରାଙ୍ଗ ନବୋଦୟ ବିଦ୍ୟାଳୟରୁ ଯୁକ୍ତ ୨ ପାସ୍ କରିଥିବା ଏହି ମେଧାବୀ ଛାତ୍ରଙ୍କୁ ଉଚ୍ଚ ଶିକ୍ଷା ପାଇଁ କରିବାକୁ ପଡ଼ିଥିବା ବଡ଼ ସଂଘର୍ଷ। ସାଙ୍ଗସାଥୀଙ୍କଠାରୁ ଆର୍ଥିକ ସହାୟତା ପାଇ ରେଭେନ୍ଶାରୁ ବାଣିଜ୍ୟରେ ସ୍ନାତକ ପାସ୍ କରିଥିଲେ ସେ। ଏହାପରେ ଉତ୍କଳ ବିଶ୍ୱବିଦ୍ୟାଳୟରେ ପିଜିରେ ନାମ ଲେଖାଇଥିଲେ। ତେବେ ସ୍ବାସ୍ଥ୍ୟଗତ କାରଣରୁ ପରୀକ୍ଷା ଦେଇପାରି ନ ଥିଲେ। ଅନ୍ୟମାନଙ୍କଠାରୁ ଭିନ୍ନ କିଛି କରିଦେଖାଇବାକୁ ସେ ଆରମ୍ଭ କରିଥିଲେ ଓଡ଼ିଶା ସିଭିଲ୍ ସର୍ଭିସ୍ ପାଇଁ ପ୍ରସ୍ତୁତି। ଏଥିସହ ପାଠପଢ଼ା ଖର୍ଚ୍ଚ ଉଠାଇବାକୁ ସେ ପିଲାମାନଙ୍କୁ ଟିଉସନ ମଧ୍ୟ କରୁଥିଲେ। ଏତେସବୁ ପରିଶ୍ରମ ଶେଷରେ ସାକାର ରୂପ ନେଇଛି। କଷ୍ଟକର ଜୀବନ ସଂଘର୍ଷରେ ମୁନାଙ୍କ ସଫଳତା ସବୁ ଗରିବ ପରିବାରର ମେଧାବୀ ଛାତ୍ରୀଛାତ୍ରଙ୍କ ପାଇଁ ଉଦାହରଣ ପାଲଟିଛି। ଓସିଏସ୍ ପରୀକ୍ଷାରେ କୃତକାର୍ଯ୍ୟ ହେବା ପରେ ସେ ଏହାର ଶ୍ରେୟ ନିଜର ମା’ବାପା ଏବଂ ବନ୍ଧୁମାନଙ୍କୁ ଦେଇଛନ୍ତି। ନିଜ ପ୍ରତିକ୍ରିୟାରେ ମୁନା କୁହନ୍ତି, ଏହା ତାଙ୍କର ୪ର୍ଥ ପ୍ରଚେଷ୍ଟା ଥିଲା। ବିନା କୋଚିଂରେ ଏଭଳି ଗୁରୁତ୍ୱପୂର୍ଣ୍ଣ ପରୀକ୍ଷାରେ ସଫଳତା ପାଇଥିବା କଥା ଭାବିଲେ ଖୁସି ଲାଗୁଛି। ବୃତ୍ତିଗତ କ୍ଷେତ୍ରରେ ପାଠପଢ଼ା ବେଳର ସଂଘର୍ଷମୟ ସମୟ, ଘଟଣା ଦୁର୍ଘଟଣା ସବୁବେଳେ ମନେପଡ଼ିବ। ଗରିବ ଅସହାୟଙ୍କ ସେବାରେ ନିଜକୁ ସମର୍ପଣ କରିବେ ବୋଲି ମୁନା କହିଛନ୍ତି।