ଭୁବନେଶ୍ୱର,୭।୨(ବ୍ୟୁରୋ): ପାରାଦୀପ ବନ୍ଦରର ଅବସରପ୍ରାପ୍ତ କର୍ମଚାରୀ ରମେଶ ଚନ୍ଦ୍ର ଦାଶଙ୍କ ରବିବାର ସକାଳେ ହୃଦ୍ଘାତରେ ପରଲୋକ ହୋଇଯାଇଛି। ତାଙ୍କୁ ୬୮ ବର୍ଷ ହୋଇଥିଲା। ତାଙ୍କ ଘର ଢେଙ୍କାନାଳ ଜିଲା କାମାକ୍ଷାନଗର ବ୍ଲକ ଅନ୍ତର୍ଗତ ଜଗନ୍ନାଥପୁର ଗ୍ରାମରେ। ଭୁବନେଶ୍ୱର ଜାଗମରା ଅଞ୍ଚଳରେ ଭଡ଼ା ଘରେ ଶୋଇଥିବା ଅବସ୍ଥାରେ ରମେଶ ହୃଦ୍ଘାତର ଶିକାର ହୋଇଥିଲେ। ଅନ୍ତିମ ସମୟରେ ସ୍ତ୍ରୀ ଝରଣା ଦାଶ, ବଡ଼ଝିଅ ତଥା ‘ଧରିତ୍ରୀ’ର ସହସମ୍ପାଦିକା ରୀତୁ ଦାଶ, ସାନଝିଅ ମିତୁ ଏବଂ ପୁଅ ଦେବାଶିଷଙ୍କ ସମେତ ଅନ୍ୟ ଆତ୍ମୀୟସ୍ବଜନ ଉପସ୍ଥିତ ଥିଲେ। ସେ ଜଣେ ଅତ୍ୟନ୍ତ ମେଳାପୀ ସ୍ବଭାବର ଥିବାରୁ ତାଙ୍କ ପୈତୃକ ଗ୍ରାମ ଜଗନ୍ନାଥପୁରରେ ଶୋକର ଛାୟା ଖେଳିଯାଇଛି। ରାତିରେ ଗଁା ଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି। ପୁଅ ଦେବାଶିଷ ମୁଖାଗ୍ନି ଦେଇଥିଲେ।