ନୂଆପଡ଼ା ଅଫିସ,୨/୯: ପଶ୍ଚିମ ଓଡ଼ିଶାର ଗଣପର୍ବ ନୂଆଁଖାଇ ପାଳନ ପାଇଁ ଗାଁକୁ ଆସୁଥିବା ବେଳେ ଟ୍ରକ୍ ଧକ୍କାରେ ଜଣେ ପୋଲିସ ସବଇନ୍ସପେକ୍ଟରଙ୍କ ମୃତ୍ୟୁ ଘଟିଛି। ମୃତକ ହେଲେ ନୂଆପଡ଼ା ଜିଲା ବୋଡେନ ଥାନା ବୋଇର ଗାଁର ସୁଧାଂଶୁ ପାଣ୍ଡେ (୫୦)। ସେ ଜିଲାର ବିଭିନ୍ନ ଥାନା, କୋର୍ଟରେ କାର୍ଯ୍ୟ କରି ଆସିଷ୍ଟାଣ୍ଟ ସବ୍ଇନ୍ସପେକ୍ଟର (ଏଏସ୍ଆଇ)ରୁ ସବ୍ଇନ୍ସପେକ୍ଟର (ଏସ୍ଆଇ) ପାହ୍ୟାକୁ ପଦୋନ୍ନତି ପାଇଛନ୍ତି। ସେ ଅନୁଗୋଳସ୍ଥିତ ପୋଲିସ ପ୍ରଶିକ୍ଷଣ କେନ୍ଦ୍ରରେ ପ୍ରଶିକ୍ଷଣ ନେଉଥିଲେ। ଗୁରୁବାର ନୂଆଁଖାଇ ଥିବାରୁ ସେ ଛୁଟି ନେଇ ଘରକୁ ଯିବା ପାଇଁ ଆସି ନୂଆପଡା ସିଲଦାସ୍ଥିତ ରିଜର୍ଭ ପୋଲିସ ପରିସରସ୍ଥ ସରକାରୀ କ୍ୱାର୍ଟର୍ସର ଥିଲେ। ସକାଳେ
ସରକାରୀ କ୍ୱାର୍ଟରରୁ ବାଇକ୍ (ନଂ.ଓଡି-୨୬ଏ-୨୪୫୫) ଯୋଗେ ଆସି ନିକଟସ୍ଥ ଗୋତମା ଛକଠାରେ ଠିଆ ହୋଇଥିଲେ। ଏହି ସମୟରେ ନୂଆପଡାରୁ ରାୟପୁର ଅଭିମୁଖେ ଯାଉଥିବା ଏକ କୋଇଲା ବୋଝେଇ ଟ୍ରକ୍ (ନଂ. ସିଜି୦୮ଏକ୍ୟୁ-୮୫୧୧) ତାଙ୍କୁ ଧକ୍କା ଦେଇଥିଲା। ଘଟଣାସ୍ଥଳରେ ପାଣ୍ଡେଙ୍କ ମୃତ୍ୟୁ ଘଟିଥିଲା। ଖବର ପାଇ ଜୋଙ୍କ ଥାନା ପୋଲିସ ଘଟଣାସ୍ଥଳରେ ପହଞ୍ଚତ୍ ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଦୁର୍ଘଟଣା ଘଟାଇଥିବା ଟ୍ରକ୍ ଜବତ କରିବା ସହ ଡ୍ରାଇଭର ଓ ହେଲପରଙ୍କୁ ଗିରଫ କରି ପୋଲିସ ତଦନ୍ତ ଚଳାଇଛି।