ସୋନପୁର,୧୪।୩(ମୃତ୍ୟୁଞ୍ଜୟ ଶତପଥୀ)ସାଧାରଣ ନିର୍ବାଚନକୁ ନେଇ ବାତାବରଣ ସରଗରମ ଥିବା ବେଳେ ଏବେ ମେଣ୍ଟ ଚର୍ଚ୍ଚା ସୁବର୍ଣ୍ଣପୁର ରାଜନୀତିକୁ ଆହୁରି ଉଷ୍ମ କରିଛି। ଯଦିଓ ମେଣ୍ଟର ରୂପରେଖ ସମ୍ପର୍କରେ ଚିତ୍ର କିଛି ସ୍ପଷ୍ଟ ହୋଇନି, କିନ୍ତୁ ଖୁବ୍ଶୀଘ୍ର ବିଜେଡି-ଭାଜପା ଏ ବାବଦରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇପାରନ୍ତି। ଆଉ ଯଦି ମେଣ୍ଟ ହୁଏ, ଉଭୟ ଦଳରୁ ଆଶାୟୀ ଥିବା ଅନେକ ବଡ ନେତା ନିଜ ସ୍ଥିତି ନେଇ ଦୋଦୁଲ୍ୟମାନ ଅବସ୍ଥାରେ ଅଛନ୍ତି।
ଆସନ ବୁଝାମଣା ଅନୁସାରେ, ୨୦୦୦ ମସିହା ସାଧାରଣ ନିର୍ବାଚନରେ ଢେଙ୍କାନାଳ ଓ କନ୍ଧମାଳ ଲୋକ ସଭା ଆସନ ବିଜେଡି ଭାଗରେ ପଡିଥିଲା। ସୁବର୍ଣ୍ଣପୁର ଜିଲାର ସୋନପୁର, ବୀରମହାରାଜପୁର ଓ ବିନିକା ବିଧାନସଭା ଆସନ ମଧ୍ୟ ବିଜେଡି ଭାଗରେ ପଡିଥିଲା। ଏହିସବୁ ଆସନରେ ବିଜେଡି ପ୍ରାର୍ଥୀ ବିଜୟୀ ହୋଇଥିଲେ। ୨୦୦୪ ମସିହାରେ ବିଜେଡି ବିନିକା ଓ ବୀରମହାରାଜପୁର ଆସନ ଜିତିଥିବା ବେଳେ ସୋନପୁର ଆସନରେ ହାରି ଯାଇଥିଲା। ୨୦୦୯ ସୀମା ପୁନନିର୍ଦ୍ଧାରଣ ପରେ ବିନିକା ଆସନ ବିଲୀନ ହୋଇ ଯାଇଥିଲା। ସେହିପରି ପୂର୍ବରୁ ଏହି ଜିଲା ଢେଙ୍କାନାଳ ଓ କନ୍ଧମାଳ ଲୋକ ସଭା କ୍ଷେତ୍ର ଅଧୀନରେ ଥିବା ବେଳେ ସୀମା ପୁନଃ ନିର୍ଦ୍ଧାରଣ ପରେ ବଲାଙ୍ଗୀର ଲୋକ ସଭା ଅଧୀନକୁ ଆସିଥିଲା। ଅନ୍ୟପକ୍ଷେ ୨୦୦୯ରେ ମେଣ୍ଟ ସରକାର ଭାଙ୍ଗିବା ପରେ ଜିଲାରେ ବଦଳି ଯାଇଥିଲା ରାଜନୈତିକ ସ୍ଥିତି। ବିଜେଡି ଓ ଭାଜପା ସୋନପୁର ଓ ବୀରମହାରାଜପୁର ଆସନରେ ନିଜର ପ୍ରାର୍ଥୀ ଦେଇଥିଲେ। ଏଥିରେ ବିଜେଡି ପୂର୍ବପେକ୍ଷା ଅଧିକ ଶକ୍ତିଶାଳୀ ହୋଇଥିଲା,ମାତ୍ର ଭାଜପାକୁ କ୍ଷତି ସହିବାକୁ ପଡିଥିଲା। ଏମ୍ପି ଓ ବିଧାୟକ ଆସନ ବିଜେଡି ଜିତିଥିଲା। ୨୦୧୪ ସାଧାରଣ ନିର୍ବାଚନରେ ବିଜେଡି କ୍ରମାଗତ ଜନମତ ହାସଲ କରି ପ୍ରତିପକ୍ଷ ଦଳକୁ ଏକପ୍ରକାର ଚକ୍ମା ଦେଇଥିଲା। ୨୦୧୯ ସାଧାରଣ ନିର୍ବାଚନରେ ବଲାଙ୍ଗୀର ଲୋକ ସଭା ଆସନ ଭାଜପା ଜିତିଥିଲା ବେଳେ ଦଳୀୟ ପ୍ରାର୍ଥତ୍ନୀ ସୁବର୍ଣ୍ଣପୁର ଜିଲାରୁ ବିଜେଡି ପ୍ରାର୍ଥୀଙ୍କ ଠାରୁ କମ୍ ଭୋଟ ପାଇଥିଲେ। ଜିଲାର ଦୁଇ ବିଧାନସଭା ଆସନ ସୋନପୁର ଓ ବୀରମହାରାଜପୁରରେ ବିଜେଡି ପୂର୍ବ ଭଳି ପୋଛି ନେଇଥିଲା। ତେବେ ଭାଜପା ବିଧାନସଭା ପ୍ରାର୍ଥୀ ପରିବର୍ତ୍ତନ କରି ନିଜର ଭୋଟ ହାର ବୃଦ୍ଧି କରିବାକୁ ସକ୍ଷମ ହୋଇଥିଲା। ୨୦୨୪ ସାଧାରଣ ନିର୍ବାଚନରେ ଉଭୟ ଦଳ ପରସ୍ପରକୁ ସବୁ ଆସନରେ କଡା ଟକ୍କର ଦେବା ଲାଗି ରଣନୀତି ପ୍ରସ୍ତୁତ କରିଥିବା ବେଳେ ଦଳୀୟ ନେତୃତ୍ୱ ବର୍ତ୍ତମାନ ମେଣ୍ଟ ଆଡକୁ ମୁହାଁଇବା ଦୁଇ ଦଳର ନେତା ଓ କର୍ମୀଙ୍କୁ ଅପ୍ରସ୍ତୁତ କରିଛି। ବିଜୟ ବ୍ୟବଧାନକୁ ଦେଖିଲେ ଜିଲାର ଦୁଇଟିଯାକ ବିଧାନସଭା ଆସନ ବିଜେଡି ଭାଗରେ ପଡିବା ସମ୍ଭାବନା ସୃଷ୍ଟି ହୋଇଛି। ସେହିପରି ବଲାଙ୍ଗୀର ଏମ୍ପି ଆସନ ଭାଜପା ଭାଗରେ ପଡିବା ନିଶ୍ଚିତ। ତେବେ ଉଭୟ ଦଳର ଭବିଷ୍ୟତକୁ ଦୃଷ୍ଟିରେ ରଖି ଜିଲାର ଗୋଟିଏ ଲେଖାଏ ବିଧାନସଭା ଆସନ ନିଜ ପାଖରେ ରଖିବାକୁ ନେତୃବୃନ୍ଦ ଆଶା ରଖିଛନ୍ତି। ବିଶେଷକରି ବିଜେଡିକୁ ଦୁଇଟି ଯାକ ଆସନ ମିଳିଲେ ଦୀର୍ଘବର୍ଷ ଧରି ସଂଗଠନ କରି ଆସୁଥିବା ଭାଜପା ନେତୃବୃନ୍ଦଙ୍କ ଭବିଷ୍ୟତ କ’ଣ ହେବ ସେ ନେଇ ଦଳରେ ନାନା ପ୍ରଶ୍ନବାଚୀ ସୃଷ୍ଟି ହୋଇଛି।