ବାଲିଆପାଳ,୪।୨(ସ୍ବ.ପ୍ର.): ବାଲେଶ୍ୱର ଜିଲା ଦକ୍ଷିଣ ବାଲିଆପାଳରେ ପ୍ରସ୍ତାବିତ ସୁବର୍ଣ୍ଣରେଖା ବନ୍ଦର ରେଳ ରାସ୍ତା ପାଇଁ ଚଞ୍ଚକତା କରାଯାଇ ଜମି ଅଧିଗ୍ରହଣ କରାଯାଇଥିବା ନେଇ ଶୁକ୍ରବାର ପୂର୍ବାହ୍ନରେ ବାଲିଆପାଳ ପୂର୍ତ୍ତ ବିଭାଗ ଡାକ ବଙ୍ଗଳାଠାରେ ଅନୁଷ୍ଠିତ ଖବରଦାତା ସମ୍ମିଳନୀରେ କେତେଜଣ ଜମି ମାଲିକ ଅଭିଯୋଗ କରିଛନ୍ତି।
ଅଭିଯୋଗ ଅନୁଯାୟୀ, ବାଲିଆପାଳ ଥାନା ନାଭଡ଼ା ଗ୍ରାମର ଲୋକମାନଙ୍କର ପୈତୃକ ସମ୍ପତ୍ତିିରେ ଭାଇ ଭାଇ ମଧ୍ୟରେ ଥିବା ବିବାଦରୁ ଫାଇଦା ନେବାକୁ ଚେଷ୍ଟା କରୁଛନ୍ତି ବନ୍ଦର କର୍ତ୍ତୃପକ୍ଷ। ଉକ୍ତ ଗ୍ରାମର ବିଧବା ମହିଳା ଭାରତୀ ରଣଜିତ, ସୁମତୀ ରଣଜିତ, ସରସ୍ବତୀ ରଣଜିତ ଓ ମାଳତୀ ରଣଜିତଙ୍କ ପରିବାରରେ ଦୀର୍ଘ ଦିନ ଧରି ପୈତୃକ ସମ୍ପତ୍ତିକୁ ନେଇ ସାର୍ଥକ ରଣଜିତଙ୍କ ମଧ୍ୟରେ ବାଦବିବାଦ ଲାଗି ରହିଥିଲା। ବନ୍ଦର ପକ୍ଷରୁ ରେଳପଥ ନିର୍ମାଣ ପାଇଁ ଜମି ଚିହ୍ନଟ କାର୍ଯ୍ୟ ବେଳେ ଖାତା ନମ୍ବର-୬୩୧ରେ ଦୁଇଟି ପ୍ଲଟ ନଂ.- ୮୭୨/୮୯୬ ଉପରେ ରେଳପଥ ପାଇଁ ଚିହ୍ନଟ ହୋଇଥିଲା। ଗତ ୪ା୮ା୨୦୨୨ ତାରିଖରେ ଠିକାଦାର ଖତିଆନରେ ଥିବା ଅଂଶୀଦାରମାନଙ୍କୁ ଦସ୍ତଖତ ନ ଦେଲେ ସରକାର ସମସ୍ତ ଜମି ନେଇ ଯିବେ ଆଉ ପଇସା ମିଳିବ ନାହିଁ ବୋଲି ଭୟଭୀତ କରାଇ ସାଧା କାଗଜରେ ଦସ୍ତଖତ କରାଇ ନେଇଥିଲେ। ମାତ୍ର ଦସ୍ତଖତ ନେଇ ଯିବାର କିଛି ଦିନ ପରେ ଉକ୍ତ ଜମିକୁ ସାର୍ଥକ ରଣଜିତ ସମସ୍ତ ଅଂଶୀଦାରଙ୍କ ଜମିକୁ ରେଜିଷ୍ଟ୍ରେସନ କରାଇ ସମସ୍ତ ଟଙ୍କା ହଡ଼ପ କରି ନେଇଥିବା ଅଭିଯୋଗରେ ଦର୍ଶାଯାଇଛି। ଏ ସମ୍ପର୍କରେ ଠିକାଦାରଙ୍କୁ ଅନ୍ୟ ଅଂଶୀଦାରମାନେ ପଚାରିବାକୁ ଚେଷ୍ଟା କରିବାରୁ ଠିକାଦାରଙ୍କ ଦ୍ୱାରା ନିଯୁକ୍ତ ବ୍ୟକ୍ତି ତଥା ଅନ୍ୟ ଅଂଶୀଦାର ସାର୍ଥକ ରଣଜିତଙ୍କ ଧମକର ଶିକାର ହୋଇ ବାଲିଆପାଳ ଥାନା ଅଧିକାରୀ ଏବଂ ତହସିଲଦାରଙ୍କଠାରେ ଗୁହାରି କରିଥିଲେ। ମାତ୍ର କୌଣସି ସୁଫଳ ନ ମିଳିବାରୁ ବାଧ୍ୟ ହୋଇ ଜିଲାପାଳ ଓ ଜିଲା ଆରକ୍ଷୀ ଅଧୀକ୍ଷକଙ୍କୁ ନିବେଦନ କରିଥିବା ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। ସାଧାରଣରେ ଜମି ବିକ୍ରି କରିବା ପାଇଁ ପକ୍ଷମାନଙ୍କ ମଧ୍ୟରେ ସେୟାର କାଟି ଜମି ବିକ୍ରୟ କରିବାକୁ ନାକେଦମ୍ ହେବାକୁ ପଡୁଥିବା ବେଳେ କିପରି ସାଧା କାଗଜରେ ଦସ୍ତଖତ ନେଇ ଜମି ରେଜିଷ୍ଟ୍ରେସନ ହୋଇପାରୁଛି ବୋଲି ଦେବରଞ୍ଜିତ ପ୍ରଶ୍ନ କରିଛନ୍ତି।