![](https://www.dharitri.com/wp-content/uploads/2022/03/bjd-3.jpg)
ବ୍ରହ୍ମପୁର,୨୧ା୪(ନରସିଂହ ସାହୁ): ଗୋପାଳପୁର ବିଧାନସଭା କ୍ଷେତ୍ର ପାଇଁ ବିଜେଡିର ବିଦ୍ରୋହୀ ପ୍ରାର୍ଥୀ ହୋଇଛନ୍ତି ଉମା ଚରଣ ନାୟକ। ସେ ଶନିବାର ଉପଜିଲାପାଳଙ୍କ କାର୍ଯ୍ୟାଳୟରେ କଳିଙ୍ଗ ବିଜୁ ନବୀନ ଜନତା ଦଳ ପକ୍ଷରୁ ପ୍ରାର୍ଥୀ ଭାବେ ନାମାଙ୍କନ ପତ୍ର ଦାଖଲ କରିଛନ୍ତି। ଉମା ନାୟକ ବିଜେଡି ଜିଲା ସଂଗଠନର ଉପସଭାପତି ଥିଲେ ଏବଂ ବିଇଏମସିର ପୂର୍ବତନ ଡେପୁଟି ମେୟର ଜ୍ୟୋତ୍ସ୍ନା ନାୟକଙ୍କ ସ୍ବାମୀ। ବ୍ରହ୍ମପୁର ମହାନଗରର ୬ଟି ୱାର୍ଡ ଗୋପାଳପୁର ବିଧାନସଭା ନିର୍ବାଚନ ମଣ୍ଡଳୀ ଅନ୍ତର୍ଭୁକ୍ତ। ୩୯ନଂ ୱାର୍ଡ ଶିଳ୍ପାଞ୍ଚଳ ବାସିନ୍ଦା ଭାବେ ନାମାଙ୍କନରେ ଉଲ୍ଲେଖ କରିଛନ୍ତି। ଏହି ୱାର୍ଡରୁ ଗତ ପୌର ନିର୍ବାଚନରେ ଭାଜପା କର୍ପୋରେଟର ନିର୍ବାଚିତ ହୋଇଛନ୍ତି।
ସୂଚନାଯୋଗ୍ୟ ଉମା ନାୟକ ବିଜେଡିର ଜଣେ ଆଗଧାଡ଼ିର ନେତା। ସେ ରାଜନୀତି ଆରମ୍ଭରୁ ବିଜୁ ଲଗାସି। ହଠାତ୍ କାହିଁକି ପ୍ରାର୍ଥୀପତ୍ର ଦାଖଲ କଲେ ତାହା ରହସ୍ୟ ଘେରକୁ ଆସିଛି। ବିଜେଡି ଜିଲା ସଂଗଠନରେ ତାଙ୍କୁ କୋଣଠେସା କରାଯାଇଥିବାରୁ ସେ ବିଦ୍ରୋହୀ ସାଜିଥିବା ଶିଳ୍ପାଞ୍ଚଳରେ ଚର୍ଚ୍ଚା ହେଉଛି। ଅନ୍ୟପକ୍ଷରେ ବ୍ରହ୍ମପୁର ବିଧାୟକ ବିକ୍ରମ ପଣ୍ଡାଙ୍କୁ ଚଳିତ ନିର୍ବାଚନରେ ବିଜେଡି ଗୋପାଳପୁର ପ୍ରାର୍ଥୀ କରିଛି। ଦୀର୍ଘ ମାସ ତଳୁ ପଣ୍ଡା ଗୋପାଳପୁର ସଂଗଠନ ଦାୟିତ୍ୱ ତୁଲାଉଛନ୍ତି। ଶଙ୍ଖ ଦଳର ସବୁ କାର୍ଯ୍ୟକ୍ରମରେ ଉମା ଉପସ୍ଥିତ ରହୁଥିବା ନଜିର ଅଛି। ଅଚାନକ ଭାବେ ନାମାଙ୍କନ ଦାଖଲ ସନ୍ଦେହ ସୃଷ୍ଟି ହୋଇଛି। ଅନ୍ୟପକ୍ଷରେ ପୂର୍ବରୁ ଉମା ଗୋପାଳପୁର ବିଧାୟକ ତଥା ବର୍ତ୍ତମାନର ବ୍ରହ୍ମପୁର ଲୋକସଭା କ୍ଷେତ୍ର ଭାଜପା ପ୍ରାର୍ଥୀ ପ୍ରଦୀପ କୁମାର ପାଣିଗ୍ରାହୀଙ୍କ ଏକାନ୍ତ ଅନୁଗତ ଥିଲେ ଏବଂ ତାଙ୍କ ଦ୍ୱାରା ରାଜନୀତିରେ ବିଭିନ୍ନ ସୁଯୋଗ ପାଇଥିଲେ। ପ୍ରଦୀପ ବିଜେଡିଙ୍କୁ ଚ୍ୟାଲେଞ୍ଜ କରି ଲୋକସଭା ମଇଦାନକୁ ଓହ୍ଲାଇଛନ୍ତି। ତାଙ୍କ ପାଇଁ ଏହି ନିର୍ବାଚନ ସମ୍ମାନର ପ୍ରଶ୍ନ ହୋଇଯାଇଛି। ଯେକୌଣସି ମତେ ନିର୍ବାଚିତ ହେବା ଲାଗି ପ୍ରାଣମୂଚ୍ଛା ପ୍ରୟାସ ଚଳାଇଛନ୍ତି। ତେଣୁ ଶିଳ୍ପାଞ୍ଚଳରେ ଦବଦବା ଥିବା ଉମା ନାୟକଙ୍କୁ ପାଣିଗ୍ରାହୀଙ୍କ ଚକ୍ରାନ୍ତ ହୋଇଥିବା ମଧ୍ୟ ଚର୍ଚ୍ଚା ପରିସରକୁ ଆସିଛି। ଯୋଗାଯୋଗ ସମ୍ଭବ ହୋଇନଥିବାରୁ ଉମାଙ୍କ
ପ୍ରତିକ୍ରିୟା ମିଳିନାହିଁ।