ପଟ୍ଟାଙ୍ଗି,୨୭ା୩(ଡି.ଏନ.ଏ.):ରାଜ୍ୟ ପଞ୍ଚାୟତିରାଜ ବିଭାଗ ପକ୍ଷରୁ ମାର୍ଚ୍ଚ ୨ରେ ପ୍ରକାଶ ପାଇଥିବା ବଦଳି ତାଲିକାରେ କୋରାପୁଟ ଜିଲା ପଟ୍ଟାଙ୍ଗି ବିଡିଓଙ୍କ ନାମ ରହିଥିଲା। ତେବେ ତାଙ୍କ ସ୍ଥାନକୁ ବଦଳି ହୋଇଥିବା ବିଡିଓ ସେ କାର୍ଯ୍ୟ କରୁଥିବା ସ୍ଥାନରୁ ଆସୁ ନ ଥିବାରୁ ପଟ୍ଟାଙ୍ଗିରେ କାର୍ଯ୍ୟରତ ବିଡିଓ ତାଙ୍କ ବଦଳି ଜାଗାକୁ ଯାଇପାରୁନାହାନ୍ତି। ଫଳରେ ରାଜ୍ୟ ସରକାରଙ୍କ ପକ୍ଷରୁ ହୋଇଥିବା ବଦଳି ନିର୍ଦ୍ଦେଶକୁ ଏକ ପ୍ରକାର ଅଣଦେଖା କରାଯାଉଥିବା ଅଭିଯୋଗ ହେଉଛି।
ଖବରରୁ ଜଣାପଡିଛି, ରାଜ୍ୟର ବିଭିନ୍ନ ବ୍ଲକର ବିଡିଓ ଏବଂ ତହସିଲଦାରଙ୍କୁ ମିଶାଇ ୨୨ ଜଣ ଅଧିକାରୀଙ୍କ ବଦଳି ହୋଇଥିଲା। ଉକ୍ତ ବଦଳି ତାଲିକାରେ ପଟ୍ଟାଙ୍ଗି ବିଡିଓ ସୌମ୍ୟ ସାର୍ଥକ ମିଶ୍ରଙ୍କ ନାମ ରହିଥିଲା। ତାଙ୍କର ପିଏ ଆଇଟିଡିଏ ରୂପେ କୋରାପୁଟ ବଦଳି ହୋଇଥିବା ବେଳେ ତାଙ୍କ ସ୍ଥାନରେ ନବରଙ୍ଗପୁର ଜିଲା କୋଷାଗୁମୁଡା ବ୍ଲକର ବିିଡିଓ ସୁକାନ୍ତ ପଟ୍ଟନାୟକଙ୍କୁ ଅବସ୍ଥାପିତ କରାଯାଇଥିଲା। ବଦଳି ନିର୍ଦ୍ଦେଶ ପ୍ରକାଶ ପାଇବାର ୨୪ ଦିନ ବିତିଯାଇଥିଲେ ମଧ୍ୟ କୋଷାଗୁମୁଡା ବିଡିଓ ପଟ୍ଟନାୟକ ରାଜ୍ୟ ସରକାରଙ୍କ ବଦଳି ନିର୍ଦ୍ଦେଶ ଅନୁସାରେ ପଟ୍ଟାଙ୍ଗି ଆସୁନାହାନ୍ତି। ସେ ପଟ୍ଟାଙ୍ଗି ଆସୁ ନ ଥିବା ହେତୁ ଏଠାରେ କାର୍ଯ୍ୟରତ ବିଡିଓ ମିଶ୍ର ତାଙ୍କ ବଦଳି ସ୍ଥାନ କୋରାପୁଟ ଯାଇପାରୁନାହାନ୍ତି। ମିଶ୍ରଙ୍କ ପିଏ ଆଇଟିଡିଏ ରୂପେ କୋରାପୁଟ ବଦଳି ହୋଇଛି। ଅନ୍ୟପକ୍ଷରେ ପିଏ ଆଇଟିଡିଏ ରୂପେ ପଟ୍ଟାଙ୍ଗି ବିଡିଓଙ୍କ କୋରାପୁଟକୁ ବଦଳି ହୋଇଥିଲେ ମଧ୍ୟ ସେଠାରେ ଥିବା ପିଏ ଆଇଟିଡିଏ କାରୁ ସୋରେନଙ୍କ ଅନ୍ୟ କେଉଁଠିକୁ ବଦଳି ହୋଇନାହିଁ। ଏପରି ସ୍ଥଳେ ସେ ସେଠାରେ ଥିବାରୁ ପଟ୍ଟାଙ୍ଗି ବିଡିଓ ମିଶ୍ର ସେଠାକୁ ଯାଇପାରୁନାହାନ୍ତି। କୋଷାଗୁମୁଡା ବିଡିଓ ପଟ୍ଟନାୟକ ମଧ୍ୟ ତାଙ୍କ ବଦଳି ସ୍ଥାନ ପଟ୍ଟାଙ୍ଗି ଆସିପାରୁ ନାହାନ୍ତି। ଏଥିପ୍ରତି ଦୃଷ୍ଟି ଦେଇ ରାଜ୍ୟ ସରକାର ଉକ୍ତ ବଦଳି ପ୍ରକ୍ରିୟାରେ ରହିଥିବା ଅସଙ୍ଗତି ଦୂର କରିବାକୁ ସାଧାରଣରେ ଦାବି ହେଉଛି।