ଶ୍ରୀନଗର, ୧୫।୯ : ଜମ୍ମୁ -କଶ୍ମୀରରେ ସୁରକ୍ଷାକର୍ମୀଙ୍କୁ ଏକ ବଡ଼ ସଫଳତା ମିଳିଛି। ନୌଗାମ ଅଞ୍ଚଳରେ ସୁରକ୍ଷାକର୍ମୀଙ୍କ ଏନକାଉଣ୍ଟରରେ ଦୁଇଜଣ ଆତଙ୍କବାଦୀ ନିହତ ହୋଇଛନ୍ତି। ଆତଙ୍କବାଦୀଙ୍କ ନିକଟରୁ ଗୋଟିଏ ଏକେ-୪୭ ରାଇଫଲ, ଦୁଇଟି ପିସ୍ତଲ ଏବଂ ଅନ୍ୟାନ୍ୟ ଅସ୍ତ୍ରଶସ୍ତ୍ର ଜବତ କରାଯାଇଛି। କୁହାଯାଉଛି ଯେ ପଶ୍ଚିମବଙ୍ଗର ଶ୍ରମିକଙ୍କ ହତ୍ୟାରେ ଉଭୟ ଆତଙ୍କବାଦୀ ସମ୍ପୃକ୍ତ ଥିଲେ।
କୁହାଯାଉଛି ଯେ ନୌଗାମ ଏନକାଉଣ୍ଟରରେ ନିହତ ହୋଇଥିବା ଆତଙ୍କବାଦୀମାନେ ଅଲ କାଏଦା ଅନୁବନ୍ଧିତ ଅନସର ଗାଜୱାଟ-ଉଲ ହିନ୍ଦର ସଦସ୍ୟ ଥିଲେ। ଉଭୟଙ୍କୁ ଏଜାଜ ରସୁଲ ନାଜର ଏବଂ ସହିଦ ଅହମ୍ମଦ ଓରଫ ଆବୁ ହାମଜା ଭାବେ ଚିହ୍ନଟ କରାଯାଇଛି। ଆତଙ୍କବାଦୀ ରସୁଲ ନାଜର ପୁଲୱାମାର କରିମାବାଦ ବାସିନ୍ଦା ହୋଇଥିବାବେଳେ ସହିଦ ବଡ଼ଗାମର ବାସିନ୍ଦା । ଆତଙ୍କବାଦୀଙ୍କ ବିରୋଧରେ ଏହି ଅପରେସନ ଚିନାର କର୍ପସ ଏବଂ ଅନ୍ୟାନ୍ୟ ସୁରକ୍ଷାକର୍ମୀଙ୍କ ପାରସ୍ପରିକ ସହଯୋଗରେ କରାଯାଇଥିଲା।
ଅତିରିକ୍ତ ମହାନିର୍ଦ୍ଦେଶକ ପୋଲିସ (କଶ୍ମୀର) ବିଜୟ କୁମାର ଟୁଇଟ କରି କହିଛନ୍ତି ଯେ ନିହତ ହୋଇଥିବା ଆତଙ୍କବାଦୀମାନେ ଆତଙ୍କବାଦୀ ସଂଗଠନ ଅନସର ଗାଜୱାଟ-ଉଲ ହିନ୍ଦର ସଦସ୍ୟ। ପୁଲୱାମାରେ ୨ ସେପ୍ଟେମ୍ବର ୨୦୨୨ ରେ ପଶ୍ଚିମବଙ୍ଗର ଶ୍ରମିକ ମୁନିର-ଉଲ-ଇସଲାମଙ୍କ ଉପରେ ହୋଇଥିବା ଆତଙ୍କବାଦୀ ଆକ୍ରମଣରେ ସେମାନେ ଜଡିତ ଥିଲେ।
