ମେଧାବୀ ଛାତ୍ର ଜଣକ ମନରେ ଅନେକ ଆଶା ବାନ୍ଧି କେନ୍ଦୁଝରରୁ ଭୁବନେଶ୍ୱର ଉଚ୍ଚଶିକ୍ଷା ପାଇଁ ଆସି ସଫଳତାର ସହ ଶିକ୍ଷା ଶେଷକରି ନିଯୁକ୍ତି ପାଇଁ ପ୍ରସ୍ତୁତି କରୁଥାନ୍ତି। ହେଲେ ସମୟକ୍ରମେ ପାରିବାରିକ ଘଟଣା ପାଇଁ ସେ ଭୁବନେଶ୍ୱରରୁ କେନ୍ଦୁଝରକୁ ଫେରିଆସନ୍ତି। ଏପରିକି ପାରିବାରିକ ବ୍ୟବସାୟ ସହିତ ବାପାଙ୍କ ସହ ସହଯୋଗୀ ହେବାକୁ ପଡ଼ିଥିଲା। କଠିନ ପରିଶ୍ରମ ଓ ଦୃଢ଼ ଇଚ୍ଛାଶକ୍ତି ବଳରେ ସେ ଅଳ୍ପ ଦିନରେ ଅନେକ କିଛି ସଫଳତା ହାସଲ କରିଛନ୍ତି। ପରବର୍ତ୍ତୀ ସମୟରେ ସେ ଖଣି ବ୍ୟବସାୟରେ ପ୍ରବେଶକରି ଆଶାନୁରୂପ ସଫଳତା ମଧ୍ୟ ପାଇଛନ୍ତି। ସେହି ସଫଳ ଖଣି ବ୍ୟବସାୟୀ ତଥା ମେସର୍ସ ଟି.ପି. ମହାନ୍ତି ପ୍ରା.ଲି.ର ପରିଚାଳନା ନିର୍ଦ୍ଦେଶକ ତାରିଣୀ ପ୍ରସାଦ ମହାନ୍ତିଙ୍କ ସହ ଧରିତ୍ରୀର ସ୍ବତନ୍ତ୍ର ଆଳାପ….
ପ୍ର-୧: ଖଣି ବ୍ୟବସାୟର ଯାତ୍ରା କିଭଳି ରହିଛି?
ଉ- ୮୦ଦଶକରେ ପରିସ୍ଥିତିରେ ପଡ଼ି ମୋତେ ଭୁବନେଶ୍ୱରରୁ କେନ୍ଦୁଝର ଫେରିବାକୁ ପଡ଼ିଥିଲା। ଏପରିକି ବହୁ ଘାତ ପ୍ରତିଘାତ ମଧ୍ୟରେ ପରିବାର ଓ ପାରିବାରିକ ବ୍ୟବସାୟରେ ଜଡ଼ିତ ହେବା ସାଙ୍ଗକୁ ଅନ୍ୟ ବ୍ୟବସାୟରେ ମଧ୍ୟ ଜଡ଼ିତ ହୋଇ ରହିଲି। ବିଶେଷକରି କେନ୍ଦୁଝର ଏକ ଖଣିଭିତ୍ତିକ ଜିଲା ହୋଇଥିବାରୁ ୯୦ ଦଶକରେ ମୁଁ ଖଣି ବ୍ୟବସାୟରେ ପ୍ରବେଶ କରିବାକୁ ଆବଶ୍ୟକ ପ୍ରୟାସ ଓ ପ୍ରଚେଷ୍ଟା ଆରମ୍ଭ କରିଥିଲି। ଦୀର୍ଘ ୧୮ ବର୍ଷର କସରତ ଓ ନୀତିନିୟମ ଏବଂ ପ୍ରଣାଳୀ ମଧ୍ୟରେ ଅହରହ ଚେଷ୍ଟା ପରେ ୨୦୦୯ରେ ଆନୁଷ୍ଠାନିକ ଭାବେ ଖଣି ବ୍ୟବସାୟରେ ପ୍ରବେଶ କରିଥିଲି। ପରବର୍ତ୍ତୀ ସମୟରେ ଆବଶ୍ୟକ ସରକାରୀ କାଗଜପତ୍ର ଓ ପ୍ରତିକୂଳ ପରିସ୍ଥିତିରେ ବ୍ୟବସାୟ ଜାରି ରହିଛି। ବହୁ ଘାତ ପ୍ରତିଘାତ ଓ ଆଇନକାନୁନ ସହ ବୃହତ୍ ଖଣି କମ୍ପାନୀ ତଥା ଲିଜ୍ଧାରୀଙ୍କ ମଧ୍ୟରେ ବ୍ୟବସାୟ ଅଗ୍ରସର ହୋଇଚାଲିଛି।
ପ୍ର-୨: ୨୦୦୦ମସିହା ପୂର୍ବ ଏବଂ ପରବର୍ତ୍ତୀ ଖଣି ଆବଣ୍ଟନକୁ କିଭଳି ଦେଖୁଛନ୍ତି?
ଉ- ୨୦୦୦ ମସିହାର ପୂର୍ବ ୨୦ବର୍ଷ (୧୯୮୦) ଏବଂ ପରବର୍ତ୍ତୀ ୨୦ବର୍ଷ (୨୦୨୦) ମଧ୍ୟରେ ଅନେକ ଫରକ ଏବଂ ପରିବର୍ତ୍ତନ ଆସିଛି। ବିଶେଷକରି ବର୍ତ୍ତମାନ ସମୟରେ ଖଣି ଲିଜ୍ଧାରୀମାନେ ବୃହତ୍ ବିଡର ହୋଇଥିବା ବେଳେ ସ୍ଥାନୀୟ ଏବଂ ମଧ୍ୟମ ବର୍ଗର ବିଡରମାନେ ଅନେକାଂଶରେ ସମସ୍ୟାର ସମ୍ମୁଖୀନ ହେଉଛନ୍ତି। ଏପରିକି ୮୦ ଓ ୯୦ଦଶକରେ ସରକାର ସ୍ଥାନୀୟ ଖବରକାଗଜ ମାଧ୍ୟମରେ ସମ୍ପୃକ୍ତ ଖଣିର ବିବରଣୀ ସହ ନିଲାମୀ ପ୍ରକ୍ରିୟାକୁ ତ୍ୱରାନ୍ବିତ କରୁଥିବା ବେଳେ ବର୍ତ୍ତମାନ ଅନେକ ସରକାରୀ ନୀତିନିୟମ ଏବଂ ଅନ୍ଲାଇନ ଜରିଆରେ ଖଣି ନିଲାମ କରାଯାଉଛି। ସେହିଭଳି ସେ ସମୟରେ ବିଡରମାନେ ଆଶାପୋଷଣ କରୁଥିବା ବେଳେ ବର୍ତ୍ତମାନ ଭାଗ୍ୟରେ ଥିଲେ ମିଳିବ ବୋଲି ଆକଳନ କରାଯାଉଛି।
ପ୍ର-୩: ଡିଏମ୍ଏଫ୍ ବିଷୟରେ କ’ଣ କହିବେ?
ଉ- ଜିଲା ଖଣିଜ ପାଣ୍ଠି (ଡିଏମ୍ଏଫ୍) ସମ୍ପୃକ୍ତ ଜିଲାର ଅତ୍ୟାବଶ୍ୟକ ବିକାଶ କାର୍ଯ୍ୟରେ ବିନିଯୋଗ ପାଇଁ ଉଭୟ ସରକାର ଓ ଜିଲା ପ୍ରଶାସନ ଜରିଆରେ କାର୍ଯ୍ୟକାରୀ କରାଯାଇଥାଏ। ହେଲେ ବର୍ତ୍ତମାନ ସମୟରେ ଉକ୍ତ ପାଣ୍ଠି ଅବାଟରେ ବିନିଯୋଗ ହେଉଛି। ସରକାର ଉକ୍ତ ପାଣ୍ଠିକୁ ସମ୍ପୃକ୍ତ ଜିଲାର ବିକାଶ ସହ ଶିକ୍ଷା, ସ୍ବାସ୍ଥ୍ୟ, ପରିବେଶ ଓ ଗମନାଗମନ (ରାସ୍ତା) ଦିଗରେ ଠିକ୍ ଭାବେ ବିନିଯୋଗ କରିପାରିଲେ ସବୁ ବର୍ଗଙ୍କର ବିକାଶ ଓ ଉନ୍ନତି ହୋଇପାରିବ। ସରକାର ଉକ୍ତ ପାଣ୍ଠି ସୁବିନିଯୋଗ କଲେ ଉଭୟ ଖଣି ଅଞ୍ଚଳର ଅଧିବାସୀ ଓ ଜିଲାର ବିକାଶ ଏବଂ ଅଭିବୃଦ୍ଧି ଘଟିପାରିବ ବୋଲି ଆଶା କରାଯାଉଛି।
ପ୍ର-୪: ଖଣି ବ୍ୟବସାୟରେ ସ୍ବଚ୍ଛତା କିଭଳି ଆସିପାରିବ ?
ଉ- ପ୍ରତି ବ୍ୟବସାୟରେ ବ୍ୟବସାୟୀଙ୍କ ଆଭିମୁଖ୍ୟ ଓ ସଚ୍ଚୋଟତା ଉପରେ ଉକ୍ତ ବ୍ୟବସାୟର କାର୍ଯ୍ୟଧାରା ଓ ଶୈଳୀ ନିର୍ଭର କରିଥାଏ। ପୂର୍ବର ଖଣି ବ୍ୟବସାୟ ସମ୍ପର୍କରେ ବିଶେଷ ଅବଗତ ନୁହେଁ। କିନ୍ତୁ ୨୦୦୦ ପରଠାରୁ ଖଣି ବ୍ୟବସାୟରେ ଅନେକ ପରିବର୍ତ୍ତନ ସହ ସ୍ବଚ୍ଛତା ରହିଛି। ଏପରିକି ଧୀରେ ଧୀରେ ଅତ୍ୟାଧୁନିକ ଜ୍ଞାନକୌଶଳର ପ୍ରୟୋଗ ସାଙ୍ଗକୁ ନିୟମ ମଧ୍ୟ କଡ଼ାକଡ଼ି ହୋଇଯାଇଛି। ବର୍ତ୍ତମାନ ଖଣି ବ୍ୟବସାୟରେ ବ୍ୟାପକ ସ୍ବଚ୍ଛତା ଆସିଛି। ଆଗକୁ ମଧ୍ୟ ଆହୁରି ସ୍ବଚ୍ଛତା ରହିବ ବୋଲି ଆଶା କରାଯାଉଛି।
ପ୍ର-୫: ନୂତନ ଖଣି ବ୍ୟବସାୟୀ ବା ଯୁବ ଉଦ୍ୟୋଗୀଙ୍କୁ କ’ଣ କହିବେ?
ଉ- ବ୍ୟବସାୟ ପ୍ରତି ଯୁବବର୍ଗ ଆଗ୍ରହ ଦେଖାଇବା ଭଲ କଥା, ହେଲେ ଆଗ୍ରହକୁ ଉଚିତ ମାର୍ଗରେ ଆଗେଇନେଇ ସେହି ଅନୁଯାୟୀ କାର୍ଯ୍ୟ କରିବାକୁ ହେବ। ବିଶେଷକରି ଖଣି ବ୍ୟବସାୟରେ ପରିବେଶ ଓ ପରିସ୍ଥିତିକୁ ଆଖି ଆଗରେ ରଖି ବ୍ୟବସାୟ କରିବାକୁ ହେବ।
ପ୍ର- ୬: ଅବସର ସମୟରେ କ’ଣ କରିବାକୁ ଭଲ ପାଆନ୍ତି ?
ଉ- ଅବସର ସମୟରେ ପରିବାର ଓ ପରିଜନଙ୍କ ସହିତ ସମୟ ବିତାଇବା ସହ ବିଦେଶ ଭ୍ରମଣ ଓ ସ୍ବଦେଶୀ ପର୍ଯ୍ୟଟନସ୍ଥଳ ବୁଲିବାକୁ ଭଲଲାଗେ। ଏପରିକି ବ୍ୟବସାୟରେ ଜଡ଼ିତ ଥିବାରୁ ବିଭିନ୍ନ ଦିଗ ଓ ସରକାରୀ ନୀତିନିୟମ ସମ୍ପର୍କରେ ଅବଗତ ହେବା ସହ ବ୍ୟବସାୟିକ କାର୍ଯ୍ୟକଳାପ ଉପରେ ଚର୍ଚ୍ଚା, ଆଲୋଚନା କରିବାକୁ ଭଲଲାଗେ।