ଭୁବନେଶ୍ୱର, ୨୦।୫(କ୍ରୀଡ଼ା ପ୍ରତିନିଧି)- ପ୍ରଶାନ୍ତ ମହାପାତ୍ର ଜଣେ ସଫଳ କ୍ରିକେଟର, ଦକ୍ଷ ମ୍ୟାଚ ରେଫରି ଏବଂ ବିସିସିଆଇ ଲେଭଲ-୨ କୋଚ୍ ଥିଲେ। ଖେଳ ଜୀବନ ହେଉ କି ମ୍ୟାଚ ପରିଚାଳନା ଯେତେବେଳେ ଯେଉଁ ଦାୟିତ୍ୱ ପାଇଥିଲେ ତାହାକୁ ସଫଳତାର ସହ ସମ୍ପନ୍ନ କରି ପ୍ରଶଂସା ସାଉଁଟିଥିଲେ।
୧୯୭୩ ସେପ୍ଟେମ୍ବର ୧ରେ ଜନ୍ମିତ ପ୍ରଶାନ୍ତ ଜଣେ ଡାହାଣହାତୀ ବ୍ୟାଟ୍ସମ୍ୟାନ ଓ ମଧ୍ୟମଗତି ବୋଲର ଥିଲେ। ପୁରୁଣା ଭୁବନେଶ୍ୱରସ୍ଥିତ ରାମେଶ୍ୱର ସ୍ପୋର୍ଟିଂ ଏବଂ ମୁକ୍ତେଶ୍ୱର କ୍ରିକେଟ କ୍ଲବ ପକ୍ଷରୁ ଖେଳି କ୍ରିକେଟ ଜୀବନକୁ ଆଗକୁ ବଢ଼ାଇଥିଲେ। ତାମିଲନାଡ଼ୁ ବିପକ୍ଷରେ ସେ ପ୍ରଥମେ ୧୯ ବର୍ଷରୁ କମ୍ କ୍ରିକେଟ ଖେଳିଥିଲେ ଏବଂ ୧୯୯୦ରେ ବିହାର ବିପକ୍ଷରେ ରଣଜୀ ଟ୍ରଫି କ୍ୟାରିୟର ଆରମ୍ଭ କରିଥିଲେ। ୧୯୮୭-୮୮ରୁ ୨୦୦୨-୦୩ ମଧ୍ୟରେ ସେ କ୍ୟାରିୟରରେ ୪୫ଟି ପ୍ରଥମଶ୍ରେଣୀ (ଓଡ଼ିଶା ପକ୍ଷରୁ ୪୨ଟି ରଣଜୀ ଟ୍ରଫି ଏବଂ ଇଷ୍ଟଜୋନ୍ ପକ୍ଷରୁ ୩ଟି ଦୁଲୀପ ଟ୍ରଫି) ଏବଂ ୧୭ଟି ଲିଷ୍ଟ-ଏ ମ୍ୟାଚ ଖେଳିଥିଲେ। ଏହା ବ୍ୟତୀତ ସେ ୨୬ଟି ଅନ୍ୟ ମ୍ୟାଚ ଖେଳିଥିଲେ। ଏହା ମଧ୍ୟରେ ୮ଟି ୧୫ ବର୍ଷରୁ କମ୍ ବିଜୟ ମର୍ଚ୍ଚାଣ୍ଟ ଟ୍ରଫି, ୪ଟି ୧୭ ବର୍ଷରୁ କମ୍ ବିଜୟ ହଜାରେ ଟ୍ରଫି, ୧୨ଟି ୧୯ ବର୍ଷରୁ କମ୍ କୁଚ୍ବିହାର ଟ୍ରଫି ଏବଂ ୨ଟି ୧୯ ବର୍ଷରୁ କମ୍ ସି.କେ. ନାଇଡୁ ଟ୍ରଫି ମ୍ୟାଚ ଅନ୍ତର୍ଭୁକ୍ତ। ପ୍ରଥମଶ୍ରେଣୀ କ୍ରିକେଟରେ ସେ ୪୫ଟି ମ୍ୟାଚର ୮୦ଟି ଇନିଂସରୁ ୩୦.୦୮ ଆଭରେଜରେ ୨,୧୯୬ ରନ ସଂଗ୍ରହ କରିଥିଲେ। ତାଙ୍କର ସର୍ବାଧିକ ସ୍କୋର ଥିଲା ୧୫୭*। ସେ ୫ ଶତକ ଏବଂ ୧୧ ଅର୍ଦ୍ଧଶତକ ହାସଲ କରିଥିବାବେଳେ ୪୪ଟି କ୍ୟାଚ ନେଇଥିଲେ। ସେହିପରି ଲିଷ୍ଟ-ଏରେ ସେ ମୋଟ ୨୬୧ ରନ କରିଥିଲେ।
ଅବସର ପରେ ୨୦୧୪ ସେପ୍ଟେମ୍ବରରେ ସେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ମ୍ୟାଚ ରେଫରି ପ୍ୟାନେଲରେ ସାମିଲ ହୋଇଥିଲେ। ମ୍ୟାଚ ରେଫରି ଭାବେ ସେ ୪୮ଟି ପ୍ରଥମଶ୍ରେଣୀ, ୪୫ଟି ଲିଷ୍ଟ-ଏ ଏବଂ ୪୯ଟି ଟି୨୦ ମ୍ୟାଚ ପରିଚାଳନାର ଗୁରୁଦାୟିତ୍ୱ ବହନ କରିଥିଲେ। ୨୦୧୨ ଫେବୃୟାରୀରେ ଅନୁଷ୍ଠିତ ବିସିସିଆଇ ଲେଭଲ-୧ କୋଚ୍ ପରୀକ୍ଷାରେ ମଧ୍ୟ ସେ ସଫଳତାର ସହ ଉତ୍ତୀର୍ଣ୍ଣ ହୋଇଥିଲେ। ସେହିବର୍ଷ ମେ’ରେ ସେ ବିସିସିଆଇ ଲେଭଲ-୨ କୋଚ୍ ପରୀକ୍ଷାରେ ମଧ୍ୟ କୃତିତ୍ୱ ଅର୍ଜନ କରିଥିଲେ। ଜୁନିୟର ବର୍ଗରେ ପ୍ରଭାବୀ ପ୍ରଦର୍ଶନ ପାଇଁ ସେ ୧୯୮୭-୮୮ରେ ବିସିସିଆଇ ପକ୍ଷରୁ ଶ୍ରେଷ୍ଠ ବ୍ୟାଟ୍ସମ୍ୟାନ(୧୫ ବର୍ଷରୁ କମ୍) ପୁରସ୍କାର ପାଇଥିଲେ। ୧୯୯୬-୯୭ରେ ତାଙ୍କୁ ମାରୁତି ଇଷ୍ଟେଟ ସହିଦ ସ୍ପୋର୍ଟିଂ କ୍ରିକେଟର ଅଫ୍ ଦି ଇୟର ପୁରସ୍କାରରେ ସମ୍ମାନିତ କରାଯାଇଥିଲା। ତାଙ୍କ ପରଲୋକରେ ବିଭିନ୍ନ ମହଲରୁ ଶୋକ ପ୍ରକାଶ କରାଯାଇଛି।