ସୁନ୍ଦରଗଡ,୧ା୫(ଡି.ଏନ.ଏ.): ନିଜର ପ୍ରବଳ ଇଚ୍ଛାଶକ୍ତି, ନିରନ୍ତର ଉଦ୍ୟମ, ଆଗ୍ରହ ଓ କଠିନ ପରିଶ୍ରମ ଦ୍ୱାରା ସ୍ବାବଲମ୍ବୀ ହୋଇପାରିଛନ୍ତି ଜଣେ ମହିଳା। ସେ ହେଉଛନ୍ତି ଝୁରିମାଲ ଗ୍ରାମର ରେଖା ନାଏକ। ସୁନ୍ଦରଗଡ଼ ଜିଲା ଲେଫ୍ରିପଡା ବ୍ଲକର ଏକ ରାଜସ୍ବ ଗ୍ରାମ ହେଉଛି ଝୁରିମାଲ। ଏହି ଗ୍ରାମର ଏକ ମଧ୍ୟବିତ୍ତ ପରିବାରର ସୁଗୃହିଣୀ ହେଉଛନ୍ତି ରେଖା। ସ୍ବାମୀ ସୁବ୍ରତ ଓ ଏକମାତ୍ର ଝିଅ ପ୍ରାଚୀ ଏବଂ ଶାଶୁ, ଶ୍ୱଶୁରଙ୍କୁ ନେଇ ରେଖାଙ୍କ ଛୋଟିଆ ପରିବାର। ପିଲାଟି ଦିନରୁ ଆତ୍ମନିର୍ଭରଶୀଳ ହେବାର ସ୍ବପ୍ନ ରେଖାଙ୍କୁ ଆଜି ଏକ ସଫଳ ସ୍ବାବଲମ୍ବୀ ମହିଳା କରିପାରିଛି। ଏକ ଆଦର୍ଶ ଗୃହିଣୀ ସଙ୍ଗେ ସଙ୍ଗେ ପରିବାରର ଆର୍ଥିକ ମାନଦଣ୍ଡକୁ ସ୍ବଚ୍ଛଳ କରିବା ପାଇଁ ରେଖାଙ୍କ ନିଷ୍ଠା ଓ ଉଦ୍ୟମକୁ ସଫଳ ରୂପାୟନ କରିବାରେ ପ୍ରମୁଖ ଭୂମିକା ଗ୍ରହଣ କରିଛି ଓଡ଼ିଶା ବନାଞ୍ଚଳ ଉନ୍ନୟନ ପ୍ରକଳ୍ପ-୨। ଏହି ପ୍ରକଳ୍ପ ମାଧ୍ୟମରେ ଉଜ୍ଜଳପୁର କ୍ଷେତ୍ର ପରିଚାଳନା ଏକକ ଅନ୍ତର୍ଗତ ଝୁରିମାଲ ବନ ସୁରକ୍ଷା ସମିତିର ସହାୟତାରେ ବିଭିନ୍ନ ଆୟଭିତ୍ତିକ କାର୍ଯ୍ୟକରି ଲକ୍ଷାଧିକ ଟଙ୍କା ଆୟ କରୁଛନ୍ତି ରେଖା। ସ୍ବେଚ୍ଛାସେବୀ ଅନୁଷ୍ଠାନ ସେବକ ତଥା ଓଡ଼ିଶା ଜୀବିକା ମିଶନର ସହାୟତାରେ ୨୦୧୭ ମସିହାରେ ସ୍ବପ୍ନା ସ୍ବୟଂ ସହାୟକ ଗୋଷ୍ଠୀ ଗଠନ କରି ସେ ଏକ ସକ୍ରିୟ ସଭ୍ୟାର ଭୂମିକା ନିଭାଉଛନ୍ତି। ବିଗତ ତିନି ବର୍ଷରେ ଓଡିଶା ବନାଞ୍ଚଳ ଉନ୍ନୟନ ପ୍ରକଳ୍ପ-୨ ତଥା ସ୍ବେଚ୍ଛାସେବୀ ଅନୁଷ୍ଠାନ ସେବକର ସହଯୋଗରେ ଜିଆଖତ ଚାଷ, ଆୟ ଭିତ୍ତିକ କାର୍ଯ୍ୟକ୍ରମ, ବିକଳ୍ପ କୃଷି ବ୍ୟବସ୍ଥା, ପନିପରିବା ଚାଷ ଉପରେ ପ୍ରଶିକ୍ଷଣ ଲାଭ କରିଛନ୍ତି ରେଖା। ୨୦୧୮ରେ ଓଡ଼ିଶା ଜୀବିକା ମିଶନ ତରଫରୁ ୩୦୦୦୦ ଟଙ୍କା ଋଣ ନେଇ ଏକ ଛୋଟ ତେଜରାଜି ଦୋକାନ ଆରମ୍ଭ କରିଛନ୍ତି ଓ ଏଥିରୁ ମାସିକ ୧୦୦୦୦ ଟଙ୍କା ପର୍ଯ୍ୟନ୍ତ ଲାଭ ପାଉଛନ୍ତି ରେଖା। ଏହା ସଙ୍ଗେ ସଙ୍ଗେ ନିଜ ଘରବାରିର ୦.୬୫ ଏକର ଜମିରେ ପ୍ରତ୍ୟେକ ଋତୁରେ ବିଭିନ୍ନ ପନିପରିବା ଯଥା:- ଆଳୁ, ପିଆଜ, କୋବି, ମଟର, ଗୁଆଁର, ମୂଳା, ସୋରିଷ, ମକା, ଭେଣ୍ଡି, କାକୁଡି, ଝୁଡଙ୍ଗ ଓ ବିଲାତି ଚାଷ କରି ନିଜ ପରିବାର ପ୍ରତିପୋଷଣ କରିବା ସଙ୍ଗେ ସଙ୍ଗେ ୭୫୦୦୦ ଟଙ୍କା ପର୍ଯ୍ୟନ୍ତ ବାର୍ଷିକ ଲାଭ ପାଇପାରୁଛନ୍ତି। ନିଜସ୍ବ ଉଦ୍ୟମରେ ନିଜ ଘରବାଡିରେ ଅଶ୍ୱତଥ ଓ ପିପଲର ଏକ ଛୋଟ ନର୍ସରୀ କରି ସ୍ଥାନୀୟ ଜଙ୍ଗଲ ଓ ଜଳାଶୟମାନଙ୍କରେ ବନ ସୁରକ୍ଷା ସମିତି ଦ୍ୱାରା ବୃକ୍ଷରୋପଣ କରାଇଛନ୍ତି ରେଖା। ଚଳିତବର୍ଷ ଏକାଭିମୁଖୀତା କାର୍ଯ୍ୟକ୍ରମ ଦ୍ୱାରା ୧ଏକର ଜମିରେ ନିଜସ୍ବ ଉଦ୍ୟମ ଓ ପରିଶ୍ରମ ଦ୍ୱାରା ମାଣ୍ଡିଆ ଚାଷ କରି ୪.୬ କୁଇଣ୍ଟାଲ ମାଣ୍ଡିଆ ଅମଳ କରି ୧୫୦୦୦ ଟଙ୍କା ଲାଭ ପାଇ ଚଳିତବର୍ଷ ନିଜର ୩ ଏକର ଜମିରେ କେବଳ ମାଣ୍ଡିଆ ଚାଷ କରୁଛନ୍ତି। ଓଡିଶା ବନାଞ୍ଚଳ ଉନ୍ନୟନ ପ୍ରକଳ୍ପ-୨ ତରଫରୁ ଆବର୍ତ୍ତନ ପାଣ୍ଠିରୁ ୫୦୦୦୦ ଋଣ ନେଇ ଜିଆଖତ ଚାଷ କରି ଏ ପର୍ଯ୍ୟନ୍ତ ୧୦୦ କୁଇଣ୍ଟାଲ ବିକ୍ରି କରି ୨ ଲକ୍ଷ ଟଙ୍କା ଆୟ କରିଛନ୍ତି। ଝିଅର ପାଠପଢା, ଶାଶୁ ଶ୍ବଶୁରଙ୍କ ସେବା ଶୁଶୃଷା କାର୍ଯ୍ୟ, ତେଜରାତି ଦୋକାନର ପରିଚାଳନା ତଥା ଚାଷ କାମର ଦାୟିତ୍ୱ ଏକା ସାଙ୍ଗରେ ସଫଳ ଭାବରେ ସମ୍ପାଦନା କରି ଗାଁରେ ତଥା ଆଖପାଖ ଅଞ୍ଚଳରେ ଏକ ସ୍ବାବଲମ୍ବୀ ମହିଳାର ପରିଚୟ ସୃଷ୍ଟି କରିପାରିଛନ୍ତି ରେଖା। ଏହି ସଫଳତାର ଶ୍ରେୟ ଝୁରିମାଲ ବନ ସୁରକ୍ଷା ସମିତି, ସହଯୋଗୀ ଅନୁଷ୍ଠାନ ସେବକ ତଥା ଓଡିଶା ବନାଞ୍ଚଳ ଉନ୍ନୟନ ପ୍ରକଳ୍ପ-୨କୁ ଦିଅନ୍ତି ରେଖା ନାଏକ।