ପାଟଣା, ୭ା୪: କୁହାଯାଏ ବିଭୁଦତ୍ତ ପ୍ରତିଭା ଓ ନିଷ୍ଠା ଅନେକ ଅସମ୍ଭବକୁ ସମ୍ଭବ କରିବାର ସାମର୍ଥ୍ୟ ରଖେ। ଆଉ ପରେ ସଫଳତାର ଶୀର୍ଷ ସୋପାନରେ ଉପନୀତ କରିଥାଏ। କୌଣସି ପ୍ରଶିକ୍ଷଣ କିମ୍ବା ଚିତ୍ର କଳା ପ୍ରତିଷ୍ଠାନରେ ଅଧ୍ୟୟନ ନ କରି କିମ୍ବା ସେନେଇ କୌଣସି ଡିଗ୍ରୀ ହାସଲ ନ କରି ଥିଲେ ବି ନିଖୁଣ ଭାବେ ଡ୍ରଇଂଶିଟ୍ର କାନଭାସ ଉପରେ ଜଣେ ରଙ୍ଗ ତୁଳି ଧରି ସମ୍ମୁଖରେ ଥିବା ବ୍ୟକ୍ତି କିମ୍ବା ଛବିକୁ ଅବିକଳ ଭାବେ ଚିତ୍ରିତ କରିଦେଇପାରୁଛନ୍ତି। ଏପରି କରି ଜିଲାରେ ଅନେକ ପ୍ରଶଂସା ସାଉଁଟିଛନ୍ତି ଜଣେ ୧୭ ବର୍ଷର କିଶୋର ପ୍ରତିଭା। ସେ ହେଉଛନ୍ତି କେନ୍ଦୁଝର ଜିଲା ପାଟଣା ବ୍ଲକ ବାଉଁଶୁଳି ଗୋପାଳିଆ ସାହିର ଉଦୀୟମାନ ଚିତ୍ରଶିଳ୍ପୀ ଲକ୍ଷ୍ମୀନାରାୟଣ ମହାରଣା।
ବୟସରୁ ଚିତ୍ରକଳା ପ୍ରତି ତାଙ୍କର ଆଗ୍ରହ ରହିଛି। ମାତ୍ର ୧୫ବର୍ଷ ବୟସରେ ଗଁାରେ ହେଉଥିବା ଲକ୍ଷ୍ମୀ ପୂଜା ସକାଶେ ମୂର୍ତ୍ତି ତିଆରି କରିବାର ସେ ଗୁରୁଦାୟିତ୍ୱ ନେଇଥିଲେ। ୟାପରେ ଅଦମ୍ୟ ଇଛାଶକ୍ତି ଆଉ ସାଙ୍ଗସାଥୀଙ୍କଠାରୁ ପ୍ରେରଣା ପାଇ ଚିତ୍ରକଳା ପ୍ରତି ମନୋନିବେଶ କରିଥିଲେ। ତାଙ୍କ ଚିତ୍ରକଳାରେ ସମସାମୟିକ ଘଟଣାବଳୀ ସହ ହିନ୍ଦୁ ଦେବାଦେବୀ, ଦେଶ ଓ ରାଜ୍ୟର ପ୍ରତିଷ୍ଠିତ ରାଜନେତା, କ୍ରିକେଟ ତାରକା, ଫିଲ୍ମ ଷ୍ଟାର, କଣ୍ଠଶିଳ୍ପୀ, ଚଳଚ୍ଚିତ୍ର ଅଭିନେତା ଅଭିନେତ୍ରୀଙ୍କ ଅବିକଳ ଚିତ୍ର ଆଙ୍କି ସେ ଜିଲା ତଥା ସ୍ଥାନୀୟ ଅଞ୍ଚଳରେ ଚର୍ଚ୍ଚିତ ହୋଇଛନ୍ତି। ଏଥିପାଇଁ ସେ କୌଣସି ଗୁରୁଙ୍କଠାରୁ ମଧ୍ୟ ଶିକ୍ଷା ନେଇନାହାନ୍ତି। କୌଣସି ପୁରସ୍କାର କିମ୍ବା ପ୍ରୋତ୍ସାହନ ପାଇ ନାହାନ୍ତି। ଏସମ୍ପର୍କରେ ଲକ୍ଷ୍ମୀ ନାରାୟଣ କହିଛନ୍ତି, ଲୋକଙ୍କ ଭଲ ପାଇବା ମୋତେ ପ୍ରେରଣା ଯୋଗାଇଛି। ଯେତେବେଳେ ଦର୍ଶକ ମୋର ଚିତ୍ର ଦେଖି ଖୁସି ହୋଇ ସୁନ୍ଦର ହୋଇଛି ବୋଲି ପଦୁଟିଏ କହିଦିଅନ୍ତି ସେତିକିରେ ମନ ମୋର ଖୁସି ହୋଇଯାଏ। ଆଉ ଶ୍ରମ ସାର୍ଥକ ହେଲା ବୋଲି ଭାବିନିଏ। ତେବେ ଗାଁ ମଫସଲରେ ଏହି କଳାର ପୂଜାରୀ ପାଇଁ ବଜାର ସୁବିଧା ନାହିଁ କି ପ୍ରୋତ୍ସାହନ ନାହିଁ। ମୋତେ ସୁଯୋଗ ମିଳିଲେ ରାଜ୍ୟ ଓ ଜାତୀୟ ସ୍ତର ଆର୍ଟ ଫେଷ୍ଟିଭାଲରେ ଅଂଶଗ୍ରହଣ କରି ମୋ କଳାକୃତିର ପ୍ରଚାର, ପ୍ରସାର କରିବି ବୋଲି କହିଛନ୍ତି। ଦାରିଦ୍ର୍ୟର ତାଡନା ଲକ୍ଷ୍ମୀ ନାରାୟଣଙ୍କ କଳାକାର ଜୀବନ ଦୋଛକିରେ ଅନ୍ତରାୟ ସୃଷ୍ଟି କରୁଥିବା ବେଳେ ସେ ସଂଘର୍ଷ ଜାରି ରଖିଛନ୍ତି। ସରକାରୀ ସୁବିଧା ସୁଯୋଗ ମିଳିଲେ ଏହି କିଶୋର ପ୍ରତିଭା ଦିନେ ଓଡ଼ିଶାର ନାଁ କରିବେ ବୋଲି ସ୍ଥାନୀୟ ଅଞ୍ଚଳର ବୁଦ୍ଧିଜୀବୀ ଆଶାପୋଷଣ କରିଛନ୍ତି।