ସେଞ୍ଚୁରିୟନ୍,୩୦।୧୨:ସେଞ୍ଚୁରିୟନର ସୁପରପୋର୍ଟ ପାର୍କରେ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଚାଲିଥିବା ପ୍ରଥମ ଟେଷ୍ଟ ମ୍ୟାଚର ଦ୍ୱିତୀୟ ଇନିଂସରେ ବିରାଟ କୋହଲି ମାତ୍ର ୧୮ ରନ ସ୍କୋର କରିପାରିଛନ୍ତି। ଏହା ସହିତ ଭାରତୀୟ ଟେଷ୍ଟ ଅଧିନାୟକ କୋହଲି ଅନ୍ତର୍ଜାତୀୟ କ୍ରିକେଟରେ ଏକ ଶତକ ବିନା ଦୁଇଟି କ୍ୟାଲେଣ୍ଡର ବର୍ଷ ପୂରଣ କରିଛନ୍ତି। ସେଞ୍ଚୁରିୟନ ଟେଷ୍ଟର ଉଭୟ ଇନିଂସରେ କୋହଲି ଭଲ ଫର୍ମରେ ନଜର ଆସୁଥିଲେ ମଧ୍ୟ ଅଫ-ଷ୍ଟମ୍ପ ବାହାରେ ବଲ ପିଛା କରୁଥିବା ବେଳେ ଉଇକେଟ ହରାଇଥିଲେ। ମ୍ୟାଚର ଚତୁର୍ଥ ଦିନ ଦ୍ୱିତୀୟ ଇନିଂସରେ ମଧ୍ୟାହ୍ନ ଭୋଜନ ବିରତି ପରେ କୋହଲି ପ୍ରଥମ ବଲରେ ଡେବ୍ୟୁଟାଣ୍ଟ ମାର୍କୋ ଜେନସେନଙ୍କ ଦ୍ୱାରା ଆଉଟ୍ ହୋଇଥିଲେ।
କିମ୍ବଦନ୍ତୀ ଭାରତୀୟ କ୍ରିକେଟର ସୁନୀଲ ଗାଭାସ୍କର ବିରାଟ କୋହଲିଙ୍କ ଏହି ଉଇକେଟ ବିଶ୍ଳେଷଣ କରି ଏହାକୁ ଏକ ‘ଢିଲା ସଟ’ ବୋଲି କହିଛନ୍ତି। ଏହା ସହିତ ସେ କହିଛନ୍ତି ବୋଧହୁଏ ତାଙ୍କ ମନରେ ଇନିଂସ ଘୋଷଣା କରିବାର ଚିନ୍ତା ଚାଲିଥିଲା। ଷ୍ଟାର ସ୍ପୋର୍ଟସରେ କମେଣ୍ଟ୍ରି କଲା ବେଳେ ଗାଭାସ୍କର କୋହଲି ଏମିତି ଉଇକେଟ ହରାଇବା ଦେଖି ରାଗି ଯାଇଥିଲେ ଏବଂ ସେ ଏହାକୁ ମଧ୍ୟ ସମାଲୋଚନା କରିଥିଲେ। ଗାଭାସ୍କରଙ୍କ ବ୍ୟତୀତ ସଞ୍ଜୟ ବାଙ୍ଗର ବିରାଟ କୋହଲିଙ୍କ ଏହି ସଟ୍ରେ ଖୁସି ନ ଥିଲେ। ବାଙ୍ଗର କହିଛନ୍ତି, ଆଶା କରାଯାଉଥିଲା ସେ ଦୀର୍ଘ ସମୟ ଧରି କ୍ରିଜରେ ରହିବେ, ଲମ୍ବା ସ୍କୋର କରିବେ, କିନ୍ତୁ ସେ ପୁଣି ଥରେ ସମାନ ଭୁଲ କରିଛନ୍ତି, ଯାହା ସେ ଦୀର୍ଘ ଦିନ ଧରି କରିଆସୁଛନ୍ତି।
