ଲଣ୍ଡନ, ୮।୭- ଘରୋଇ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ପ୍ରଥମ ଟେଷ୍ଟ ବୁଧବାରଠାରୁ ସ୍ଥାନୀୟ ସାଉଥମ୍ପଟନର ଦି ରସ୍ ବାଉଲ୍ ଗ୍ରାଉଣ୍ଡରେ ଆରମ୍ଭ ହୋଇଛି। ଫଳରେ ଦୀର୍ଘ ୧୧୭ ଦିନର ବ୍ୟବଧାନ ପରେ ଅନ୍ତର୍ଜାତୀୟ କ୍ରିକେଟ୍ ପ୍ରତ୍ୟାବର୍ତ୍ତନ କରିଛି। ମହାମାରୀ କରୋନା ଭାଇରସ୍ ଲାଗି ପାଖାପାଖି ୪ ମାସ ହେବ କୌଣସି ଅନ୍ତର୍ଜାତୀୟ ମ୍ୟାଚ୍ ଅନୁଷ୍ଠିତ ହୋଇ ନ ଥିଲା। ଶେଷଥର ପାଇଁ ମାର୍ଚ୍ଚ ୧୫ରେ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ମଧ୍ୟରେ ସିଡ୍ନୀରେ ଏକ ଦିନିକିଆ ମ୍ୟାଚ୍ ଅନୁଷ୍ଠିତ ହୋଇଥିଲା। ପଡ଼ିଆକୁ କ୍ରିକେଟ୍ ପ୍ରତ୍ୟାବର୍ତ୍ତନ କରିଥିଲେ ମଧ୍ୟ କ୍ରିକେଟ୍ର ସର୍ବୋଚ୍ଚ ସଂସ୍ଥା ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) କେତେକ କଟକଣା ଜାରି କରିଛି। କରୋନା ସଂକ୍ରମଣ ଆଶଙ୍କାକୁ ଦୃଷ୍ଟିରେ ରଖି ବିନା ଦର୍ଶକରେ ମ୍ୟାଚ୍ ଅନୁଷ୍ଠିତ ହେବ। ଫଳରେ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ଆରମ୍ଭ ହୋଇଥିବା ଏହି ଟେଷ୍ଟ ମ୍ୟାଚ୍ରେ କୌଣସି ଦର୍ଶକଙ୍କୁ ଦେଖିବାକୁ ମିଳିବ ନାହିଁ। ଟେଷ୍ଟ କ୍ରିକେଟ୍ର ୧୪୩ ବର୍ଷର ଇତିହାସରେ ପ୍ରଥମ ଥର ଲାଗି ଏମିତି ଏକ ମ୍ୟାଚ୍ ଅନୁଷ୍ଠିତ ହୋଇଛି ଯେଉଁଠି ଷ୍ଟାଡିୟମ ଦର୍ଶକ ଶୂନ୍ୟ ରହିଛି। ଫଳରେ ଖେଳାଳିଙ୍କୁ ସ୍ବାଗତ କରିବାକୁ କିମ୍ବା ମ୍ୟାଚ୍ ମଝିରେ ଉତ୍ସାହ ବଢ଼ାଇବା ଲାଗି ଦର୍ଶକଙ୍କ ଅନୁପସ୍ଥିତିକୁ ଖେଳାଳି ଅନୁଭବ କରିବେ। ସେହିଭଳି କରୋନା ଲାଗି ଆଇସିସି ଜାରି କରିଥିବା ଆଉ କିଛି କଟକଣା ମଧ୍ୟରେ ବୋଲରମାନେ ବଲ୍ରେ ଚମକ ଆଣିବା ପାଇଁ ଲାଳର ବ୍ୟବହାର କରିପାରିବେ ନାହିଁ। ଯଦି କୌଣସି ଖେଳାଳି ବାରମ୍ବାର ଏଭଳି କରନ୍ତି ତେବେ ଅମ୍ପାୟର ୨ଥର ଚେତାବନୀ ଦେବେ ଏବଂ ପରେ ୩ୟ ଥର ପେନାଲ୍ଟି ଆକାରରେ ସେହି ଦଳର ୫ ରନ କାଟିବେ।
