ଆଜିର ଯୁଗରେ ଲୋକମାନେ ନିଜ ଲୋକମାନଙ୍କୁ ବି ଖୋଲାଖୋଲି ବିଶ୍ୱାସ କରିପାରୁ ନାହାନ୍ତି ଏପରି ସ୍ଥିତିରେ ଜଣେ ଦୋକାନୀ ଅଜଣା ଗ୍ରାହକଙ୍କୁ ବିଶ୍ୱାସ କରୁଥିବାର ଜାଣି ଆଶ୍ଚର୍ଯ୍ୟ ଲାଗେ। ଏମିତି ଅନନ୍ୟ ବ୍ୟକ୍ତି ହେଉଛନ୍ତି ଗୁଜରାଟର ଜଣେ ଦୋକାନୀ। ତାଙ୍କ ଦୋକାନ ଦିନରାତି ୨୪ ଘଣ୍ଟା ଖୋଲା ରହିଥାଏ। ଦୋକାନର କବାଟ ମଧ୍ୟ ନାହିଁ। ଦୋକାନର ମାଲିକ ବି ଦୋକାନରେ ଉପସ୍ଥିତ ରୁହନ୍ତି ନାହିଁ। ଗ୍ରାହକଙ୍କ ପାଇଁ ଦୋକାନ କେବେ ବନ୍ଦ ହୁଏ ନାହିଁ। କେବଳ ଏତିକି ନୁହେଁ, ଦୋକାନୀ ସଉଦା ନେବାକୁ ଆସିଥିବା ଗ୍ରାହକଙ୍କଠାରୁ ଟଙ୍କାଟିଏ ମଧ୍ୟ ମାଗନ୍ତି ନାହିଁ। ଗ୍ରାହକମାନେ ନିଜେ ଆବଶ୍ୟକ ସାମଗ୍ରୀ ନେଇ ଟଙ୍କା ରଖି ଦେଇ ଯାଇଥାନ୍ତି। ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ।
ଗୁଜରାଟର ଛୋଟଉଦୟପୁର ଜିଲାର କେଭାଡି ଗ୍ରାମରେ ଏଭଳି ଏକ ଅନନ୍ୟ ଦୋକାନ ରହିଛି। ଗତ ୩୦ ବର୍ଷ ଧରି ଚାଲୁଥିବା ଏହି ଦୋକାନ କେବେବି ବନ୍ଦ ହୋଇନାହିଁ। ଏହି ଦୋକାନର ମାଲିକ ସୟଦ ଏକ ସାକ୍ଷାତକାରରେ ଏପରି କହିଛନ୍ତି।
ସେ କୁହନ୍ତି, ତାଙ୍କୁ ଯେତେବେଳେ ୧୮ ବର୍ଷ ହୋଇଥିଲା ସେ ଏହି ଦୋକାନ ଆରମ୍ଭ କରିଥିଲେ। ସେ କହିଛନ୍ତି, ଆରମ୍ଭରୁ ଏହି ଦୋକାନ ବିଶ୍ୱାସରେ ଚାଲୁଛି ଏବଂ ଭବିଷ୍ୟତରେ ମଧ୍ୟ ଏହିପରି ଚାଲିବ।
ପ୍ରଥମେ ଗାଁ ଲୋକମାନେ ଏହାକୁ ଅଦ୍ଭୁତ ମନେ କରୁଥିଲେ। ସମସ୍ତେ ଭାବୁଥିଲେ ଏହା କେଉଁ ପ୍ରକାରର ଦୋକାନ ଏବଂ ଅନେକ ଲୋକଙ୍କ ମନରେ ବିଭିନ୍ନ ପ୍ରକାରର ସନ୍ଦେହ ଥିଲା। କିନ୍ତୁ ତା’ପରେ ସୟଦ ଭାଇ ଲୋକମାନଙ୍କୁ ବୁଝାଇ ଘର ଘର ବୁଲିବାକୁ ଲାଗିଲେ। ସେ ଲୋକମାନଙ୍କୁ କୁହନ୍ତି, ଯଦି ତୁମର କିଛି ଦରକାର, ମୋର ଦୋକାନ ସବୁବେଳେ ଖୋଲା ଅଛି ଏବଂ ତୁମେ ଯାହା ଚାହିଁବ ତାହା ନେଇ ପାରିବ। ସମୟ ସହିତ ଧୀରେ ଧୀରେ ଲୋକମାନେ ଦୋକାନ ଉପରେ ବିଶ୍ୱାସ କରିବା ଆରମ୍ଭ କଲେ।
ସୟଦ କୁହନ୍ତି, ଯେକୌଣସି ବ୍ୟବସାୟ ହେଉ ତା’ର କେବଳ ଗୋଟିଏ ନିୟମ ହେଉଛି ବିଶ୍ୱାସ। ମୁଁ ଆଜି ପର୍ଯ୍ୟନ୍ତ କିଛି ଭୁଲ କରି ନାହିଁ, ତେବେ ମୁଁ କଦାପି ଭୁଲ କରିବି ନାହିଁ। ଜୀବନରେ ମୁଁ କେବଳ ଭଗବାନଙ୍କୁ ଭୟ କରେ। ତୁମେ ମଣିଷକୁ କାହିଁକି ଭୟ କରୁଛ? ଏହି ଚିନ୍ତାଧାରାକୁ ଦୃଷ୍ଟିରେ ରଖି ମୁଁ ଏହି ଅନନ୍ୟ ଦୋକାନକୁ ଏହି ଉପାୟରେ ଚଳାଇବା ଆରମ୍ଭ କଲି। ଯାହା ଆଜି ପର୍ଯ୍ୟନ୍ତ ଚାଲିଆସିଛି।
ସେ ଏକ କଥା କହିଛନ୍ତି, ତାଙ୍କ ଦୋକାନରୁ ଥରେ ଚୋରି ହୋଇଥିଲା। ସେ କିନ୍ତୁ କୌଣସି ଥାନାରେ ଅଭିଯୋଗ କରି ନ ଥିଲେ। କାରଣ ସେ ଜାଣିଥିଲେ ଯିଏ ବି ଚୋରି କରିବାକୁ ଆସିଛି ତା’ର କିଛି ଅସୁବିଧା ଥିବ। ତେଣୁ ଥାନାରେ ଅଭିଯୋଗ କରି ଲାଭ କିଛି ନାହିଁ। ଚୋର ଟଙ୍କା ନୁହେଁ ବରଂ ଗୋଟିଏ ବ୍ୟାଟେରୀ ଚୋରି କରିଥିଲା। ଯାହା ତା’ର ଆବଶ୍ୟକ ଥିବ।