ଆପଣ ନିଶ୍ଚିତ ଭାବରେ ଏପରି ଅନେକ ସ୍ଥାନ ବିଷୟରେ ଶୁଣିଥିବେ, ଯାହା ସହିତ କିଛି କାହାଣୀ ଜଡ଼ିତ ଥାଏ ତାହାଲୋକଙ୍କୁ ଆଶ୍ଚର୍ଯ୍ୟ କରିଥାଏ। ଇଂଲଣ୍ଡରେ ମଧ୍ୟ ସେମିତି ଏକ ଗାଁ ରହିଛି। ଯେଉଁଠାରେ ଅନନ୍ୟ ରହସ୍ୟ ଲୁଚି ରହିଛି। ଏଠାକାର ଲୋକମାନେ ନିଜ ଗାଁକୁ ବହୁତ ଭଲ ପାଆନ୍ତି, କିନ୍ତୁ ସେମାନଙ୍କର ସମସ୍ୟା ହେଉଛି ଯେ, ସେମାନେ ନିଜ ସୁନ୍ଦର ଘର ଏବଂ ଗାଁରେ ରାତିରେ ଶାନ୍ତିରେ ଶୋଇ ପାରନ୍ତି ନାହିଁ। ଏହା ଚୋର ଏବଂ ଡକାୟତମାନଙ୍କ ଭୟ ଯୋଗୁ ନୁହେଁ ବରଂ ଏକ ଅଜବ ଶବ୍ଦ ଯୋଗୁ। ଯାହାକି ବର୍ଷ ବର୍ଷ ଧରି ସେମାନଙ୍କ ଶାନ୍ତି ନିଦ୍ରା ଛଡ଼ାଇ ନେଇଛି।
ଇଂଲଣ୍ଡର ୟର୍କସାୟାରରେ ଏପରି ଗାଁଟିଏ ରହିଛି। ଯେଉଁଠାରେ ଦିନରାତି ଏକ ରହସ୍ୟମୟ ଶବ୍ଦ ଆସେ। ଗାଁର ନାମ ହୋମଫିଲ୍ଡ। ଏଠାରୁ ସବୁବେଳେ ଏକ ଇଞ୍ଜିନ କିମ୍ବା ଓ୍ବାଶିଂ ମେଶିନର ଶବ୍ଦ ପରି ଶବ୍ଦ ଶୁଣିବାକୁ ମିଳେ। ଦିନରେ ଲୋକମାନେ ଏକପ୍ରକାର ଚଳି ଯାଉଥିବା ବେଳେ ରାତିରେ ଭୟଭୀତ ହୋଇପଡ଼ନ୍ତି। ଏହି ଶବ୍ଦ ଲୋକଙ୍କ ଜୀବନକୁ ପ୍ରଭାବିତ କରୁଛି। କିନ୍ତୁ ଏହାର ପ୍ରକୃତ କାରଣ କାହାକୁ ଜଣା ନାହିଁ।
ଦୀର୍ଘ ବର୍ଷ ଧରି, ଏହି ସ୍ଥାନର ବାସିନ୍ଦାମାନେ ଏହି ପ୍ରକାରର ଶବ୍ଦ ଶୁଣୁଛନ୍ତି ଏବଂ ଏହା ପଛରେ ଥିବା କାରଣ ଜାଣିବାକୁ ଚେଷ୍ଟା କରୁଛନ୍ତି। ଏହାର କାରଣ ଜାଣିବା ପାଇଁ ସ୍ଥାନୀୟ କର୍ତ୍ତୃପକ୍ଷ ମଧ୍ୟ ଜଣେ ପରାମର୍ଶଦାତାଙ୍କୁ ନିଯୁକ୍ତି ଦେଇଥିଲେ। କିନ୍ତୁ ସେ ମଧ୍ୟ ଏହି ରହସ୍ୟର ସମାଧାନ କରିପାରି ନ ଥିଲେ। ଏଠାରେ ରହୁଥିବା ଲୋକମାନେ କହୁଛନ୍ତି ଯେ ଶବ୍ଦଟି ଓ୍ବାଶିଂ ମେଶିନ କିମ୍ବା ଡିଜେଲ ଇଞ୍ଜିନ ଚଲାଇବା ପରି। ରାତିରେ ଶୋଇପାରୁ ନ ଥିବାରୁ ଏପରି ଶବ୍ଦର କ୍ରମାଗତ ଶୁଣିବା ଯୋଗୁ ଲୋକଙ୍କ ମାନସିକ ଅବସ୍ଥା ପ୍ରଭାବିତ ହେଉଛି। କିଛି ଲୋକ ଏପରିକି କୁହନ୍ତି, ସେମାନଙ୍କର ମୁଣ୍ଡ ଫାଟିଯିବା ପରେ ଲାଗେ।
୨୦୧୯ରେ ପ୍ରଥମ ଥର ପାଇଁ ଲୋକମାନେ ଏହି ଶବ୍ଦ ଶୁଣିଲେ ଏବଂ ସେମାନେ ସ୍ଥାନୀୟ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କଲେ। ଯାଞ୍ଚରେ ୩ଟି କଥାକୁ ନେଇ ସନ୍ଦେହ କରାଯାଇଥିଲା କିନ୍ତୁ ଅଧିକାରୀମାନେ ପ୍ରକୃତ କାରଣ ଜାଣିପାରିଲେ ନାହିଁ। ଶବ୍ଦ ବିଶେଷଜ୍ଞ ପିଟର ରୋଜର୍ସ କହିଛନ୍ତି, ଏହି ଶବ୍ଦ କାରଖାନା କିମ୍ବା ପ୍ରବାହିତ ଜଳ କିମ୍ବା ଟ୍ରାନ୍ସଫର୍ମର କିମ୍ବା ଟେଲିଗ୍ରାଫ ପୋଲ୍ରୁ ହୋଇପାରେ। କିନ୍ତୁ ସଠିକ୍ ଭାବେ କେହି ଆଜି ପର୍ଯ୍ୟନ୍ତ କହିପାରୁନାହାନ୍ତି। ଫଳରେ ଏହା ରହସ୍ୟାବୃତ୍ତ ହୋଇରହିଛି।