ମୁମ୍ବାଇ/ଭୁବନେଶ୍ୱର,(୧୦ା୧୦): ବିଶିଷ୍ଟ ଶିଳ୍ପପତି ତଥା ଟାଟା ସନ୍ସର ପୂର୍ବତନ ଅଧ୍ୟକ୍ଷ ରତନ ଟାଟାଙ୍କ ବୁଧବାର ବିଳମ୍ବିତ ରାତିରେ ପରଲୋକ ହୋଇଛି। ମୃତ୍ୟୁ ବେଳକୁ ତାଙ୍କୁ ୮୬ ବର୍ଷ ହୋଇଥିଲା। ବୟସାଧିକ କାରଣରୁ ସ୍ବାସ୍ଥ୍ୟଗତ ସମସ୍ୟା ଦେଇ ଗତି କରୁଥିବା ରତନଙ୍କୁ କିଛିଦିନ ତଳେ ଦକ୍ଷିଣ ମୁମ୍ବାଇର ବ୍ରିଚ୍କାଣ୍ଡି ହସ୍ପିଟାଲରେ ଭର୍ତ୍ତି କରାଯାଇଥିଲା। ସେତେବେଳେ ତାଙ୍କ ମୃତ୍ୟୁକୁ ନେଇ ଗୁଜବ ସୃଷ୍ଟି ହେବାରୁ ରତନ ତାହାକୁ ବିଶ୍ୱାସ ନ କରିବା ପାଇଁ ଲୋକଙ୍କୁ ପରାମର୍ଶ ଦେଇଥିଲେ। ବୁଧବାର ରତନଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଇନ୍ଟେନ୍ସିଭ୍ କେୟାର ୟୁନିଟ୍ (ଆଇସିୟୁ)ରେ ଭର୍ତ୍ତି କରାଯିବା ପରେ ତାଙ୍କ ସ୍ବାସ୍ଥ୍ୟକୁ ନେଇ ଚିନ୍ତା ବଢ଼ିଥିଲା। ତେବେ ବିଳମ୍ବିତ ରାତିରେ ତାଙ୍କ ପରଲୋକ ହୋଇଥିବା ଟାଟା ଗ୍ରୁପ୍ ପକ୍ଷରୁ ସୂଚନା ଦିଆଯାଇଥିଲା। ତାଙ୍କ ପରଲୋକରେ ଭାରତର ଶିଳ୍ପ ଜଗତରେ ଶୋକର ଛାୟା ଖେଳିଯାଇଛି।
ସବୁଠୁ ବଡ଼ କଥା ହେଲା ରତନ ଟାଟାଙ୍କ ଓଡ଼ିଶା ସହ ସମ୍ପର୍କ ବେଶ୍ ଭଲ ଥିଲା। ଓଡ଼ିଶାର ଶିଳ୍ପ, ଅର୍ଥନୈତିକ ପ୍ରଗତି, ସମାଜସେବା କ୍ଷେତ୍ରରେ ରତନ ଟାଟାଙ୍କର ଥିଲା ଗୁରୁତ୍ବପୂର୍ଣ୍ଣ ଭୂମିକା । ଓଡ଼ିଶାର ଯାଜପୁରରୁ କଳିଙ୍ଗନଗର ଇସ୍ପାତ କାରଖାନା, ଗୋପାଳପୁର ପ୍ରୋଜେକ୍ଟ ଏବଂ ଗଞ୍ଜାମରେ ହୋଇଥିବା ଜାଗା ମିଶନ ପ୍ରକଳ୍ପ ସହ ରତନ ଟାଟାଙ୍କର ଥିଲା ପ୍ରତ୍ୟକ୍ଷ ସଂପୃକ୍ତି। ଏହିସବୁ ପ୍ରକଳ୍ପ ପାଇଁ ଏକାଧିକ ବାର ଓଡ଼ିଆ ଆସିଛନ୍ତି ରତନ ଟାଟା। ରତନ ଟାଟାଙ୍କ ହୃଦୟର ନିକଟ ଓଡ଼ିଶା ଟାଟା ଷ୍ଟିଲ ପାଇଁ ଏକ ପ୍ରିୟ ବିନିଯୋଗ ସ୍ଥାନ ପାଲଟିଛି। ଏଭଳି ପରିସ୍ଥିତିରେ କମ୍ପାନୀ ଆଗାମୀ ବର୍ଷରେ ଏହି ରାଜ୍ୟରେ ପୁଞ୍ଜି ବିନିଯୋଗର ସମସ୍ତ ରେକର୍ଡ ଭାଙ୍ଗିପାରେ ବୋଲି କୁହାଯାଉଛି। କଳିଙ୍ଗନଗର କାରଖାନାର ଦ୍ୱିତୀୟ ପର୍ଯ୍ୟାୟ ସମ୍ପ୍ରସାରଣ ପରେ ଓଡ଼ିଶା କମ୍ପାନୀର ସବୁଠାରୁ ବଡ଼ ନିବେଶ ସ୍ଥାନ ହେବ। ଏହା ପରେ ଏହି କାରଖାନାର କ୍ଷମତା ବାର୍ଷିକ ୩୦ଲକ୍ଷ ଟନ୍ରୁ ୮୦ ଲକ୍ଷ ଟନ୍କୁ ବୃଦ୍ଧି ପାଇବ।
କମ୍ପାନୀ ବିବୃତ୍ତିରେ କହିଛି, କଳିଙ୍ଗନଗର ପ୍ଲାଣ୍ଟ ବିସ୍ତାରର ଦ୍ୱିତୀୟ ପର୍ଯ୍ୟାୟରେ ଏହା ୨୭୦୦୦କୋଟି ଟଙ୍କା ବିନିଯୋଗ କରିଛି ଏବଂ ୟୁନିଟରେ ଏହାର ସମ୍ପ୍ରସାରିତ କ୍ଷମତା କାର୍ଯ୍ୟକ୍ଷମ ହେବାକୁ ଯାଉଛି। କମ୍ପାନୀ ପକ୍ଷରୁ କୁହାଯାଇଛି, କଳିଙ୍ଗନଗରରେ ଚାଲିଥିବା ସମ୍ପ୍ରସାରଣ କାର୍ଯ୍ୟ ୨୦୨୩ସୁଦ୍ଧା ଭାରତରେ ବାର୍ଷିକ ୪୦ନିୟୁତ ଟନ୍ ଲକ୍ଷ୍ୟ ହାସଲ କରିବାକୁ ଟାଟା ଷ୍ଟିଲର ଅଭିଳାଷରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଓଡ଼ିଶାର ଯାଜପୁର ଜିଲାର ଟାଟା ଷ୍ଟିଲର କଳିଙ୍ଗନଗର କାରଖାନାର ଦ୍ୱିତୀୟ ପର୍ଯ୍ୟାୟ ସମ୍ପ୍ରସାରଣ। ଦେଶର ପୁରାତନ ଇସ୍ପାତ ନିର୍ମାଣ ପାଇଁ ସବୁଠାରୁ ବଡ଼ ପୁଞ୍ଜି ବିନିଯୋଗ ସ୍ଥଳ ହେବ ବୋଲି ବିବୃତ୍ତିରେ କୁହାଯାଇଛି।
ଢେଙ୍କାନାଳ ଜିଲାର ଟାଟା ଷ୍ଟିଲ୍ ମେରାମଣ୍ଡଳି (ପୂର୍ବରୁ ଭୂଷଣ ଷ୍ଟିଲ୍ ଲିମିଟେଡ) କାରଖାନା ସହିତ କମ୍ପାନୀର ଓଡ଼ିଶାରେ ମୋଟ ପୁଞ୍ଜି ବିନିଯୋଗ ୧୦୦,୦୦୦କୋଟିରୁ ଅଧିକ ଅଟେ। କଳିଙ୍ଗନଗରରେ ଏହାର ସମ୍ପ୍ରସାରିତ କ୍ଷମତା କମିଶନ କରିବା ପାଇଁ କମ୍ପାନୀ ଟ୍ରାକ୍ରେ ଥିବାବେଳେ ଆଗାମୀ ବର୍ଷରେ ପ୍ଲାଣ୍ଟକୁ ବାର୍ଷିକ ୧୦ ମିଲିୟନ ଟନ୍କୁ ଦ୍ୱିଗୁଣିତ କରିବାର ଅଧିକ ସୁଯୋଗ ଅଛି, ଯାହା ଟାଟା ଓଡ଼ିଶାର ଭୂମିକାକୁ ଆହୁରି ମଜବୁତ କରିବ।
୧୯୩୭ ଡିସେମ୍ବର ୨୮ରେ ବ୍ରିଟିଶ୍ ଇଣ୍ଡିଆର ବମ୍ବେ ପ୍ରେସିଡେନ୍ସିରେ ଶିଳ୍ପପତି ନାଭାଲ ହେରମୁସ୍ଜୀ ଟାଟାଙ୍କ ଔରସରୁ ରତନ ଟାଟା ଜନ୍ମଗ୍ରହଣ କରିଥିଲେ। ମୁମ୍ବାଇର ଚାମ୍ପିୟନ୍ ସ୍କୁଲରେ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିଥିଲେ। ଏହାପରେ ସେ ଶିମ୍ଲାସ୍ଥିତ ବିଶପ୍ ଜନ୍ କୋନ୍ନୋନ ସ୍କୁଲ ଏବଂ ୧୯୫୫ରେ ନ୍ୟୁୟର୍କସ୍ଥିତ ରିଭରଡେଲ୍ କଣ୍ଟ୍ରି ସ୍କୁଲରେ ଅଧ୍ୟୟନ କରିଥିଲେ। ରତନ ୧୯୯୦ରୁ ୨୦୧୨ ଓ ୨୦୧୬ରୁ ୨୦୧୭ ପର୍ଯ୍ୟନ୍ତ ୨ ଥର ଟାଟା ଗ୍ରୁପ୍ର ଅଧ୍ୟକ୍ଷ ଦାୟିତ୍ୱ ସମ୍ଭାଳିଥିଲେ। ରତନ ଟାଟା ଆଜୀବନ ଅବିବାହିତ ଥିଲେ। ୨୦୧୧ରେ ସେ କହିଥିଲେ, ତାଙ୍କୁ ୪ ଥର ବିବାହ ସୁଯୋଗ ମିଳିଥିଲା। କିନ୍ତୁ ପ୍ରତ୍ୟେକ ଥର ସେ କୌଣସି ନା କୌଣସି କାରଣରୁ ଭୟଭୀତ ହୋଇ ବିବାହକୁ ଏଡ଼ାଇ ଦେଇଥିଲେ। ରତନ ଜଣେ ସରଳ, ଅମାୟିକ ଓ ପରୋପକାରୀ ବ୍ୟକ୍ତି ଥିଲେ। ସେ ବ୍ୟବସାୟିକ ପରିଚାଳନା ସହ ଅନେକ ଦାତବ୍ୟ ଅନୁଷ୍ଠାନ ଗଢ଼ି ଜନସେବାରେ ନିଜକୁ ସମର୍ପିତ କରିଥିଲେ। ଏଥିପାଇଁ ସେ ବହୁ ପୁରସ୍କାର ଓ ସମ୍ମାନର ଅଧିକାରୀ ହୋଇଥିଲେ। ୨୦୦୦ରେ ରତନଙ୍କୁ ପଦ୍ମଭୂଷଣ ଓ ୨୦୦୮ରେ ଭାରତ ସରକାରଙ୍କ ଦ୍ୱିତୀୟ ସର୍ବୋଚ୍ଚ ବେସାମରିକ ସମ୍ମାନ ପଦ୍ମବିଭୂଷଣ ଉପାଧିରେ ଭୂଷିତ କରାଯାଇଥିଲା। ଏହାବାଦ୍ ୨୦୦୬ରେ ମହାରାଷ୍ଟ୍ର ଭୂଷଣ ଓ ୨୦୨୧ରେ ଆସାମ ବୈଭବ ପୁରସ୍କାର ପ୍ରଦାନ କରାଯାଇଥିଲା।