ପୁରୀ ଅଫିସ, ୧୭ା୧:ଅନ୍ତର୍ଜାତୀୟ ବାଲୁକା ଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ଗତ ୧୦ ତାରିଖରେ ପୁରୁଷ ହକି ବିଶ୍ୱକପ୍ ଉଦ୍ଘାଟନ ଅବସରରେ କଟକର ମହାନଦୀ ନଦୀ କୂଳରେ ବାଲୁକାରେ ଏକ ବିରାଟ ହକି ଷ୍ଟିକ୍ ନିର୍ମାଣ କରିଥିଲେ, ଯାହା ଓ୍ବାର୍ଲଡ ରେକର୍ଡ ଇଣ୍ଡିଆରେ ସ୍ଥାନ ପାଇଛି। ଉକ୍ତ ବାଲୁକା କଳାକୁ ସୋମବାର ଓ୍ବାର୍ଲଡ ରେକର୍ଡ ଇଣ୍ଡିଆର ପ୍ରତିଷ୍ଠାତା ପବନ ସୋଲାଙ୍କି, ଏଚ୍ଓଡି ସୁଷମା ନର୍ଭକର ଏବଂ ସିନିୟର ଆଡ୍ଜୁଡିକେଟର ସଞ୍ଜୟ ନର୍ଭେକର ବିଶ୍ୱର ସର୍ବବୃହତ ବାଲୁକା ହକି ଷ୍ଟିକ୍ ଭାବେ ମାନ୍ୟତା ପ୍ରଦାନ କରିଛନ୍ତି। ସୁଦର୍ଶନଙ୍କ ଏହି ବାଲୁକା କଳା ୧୦୫ ଫୁଟ ଲମ୍ବର ହୋଇଥିବାବେଳେ ସେ ଏଥିରେ ୫ହଜାର ହକି ବଲ ସ୍ଥାନିତ କରିଥିଲେ। ଏହାକୁ ନିର୍ମାଣ କରିବା ପାଇଁ ତାଙ୍କୁ ତାଙ୍କ ଅନୁଷ୍ଠାନର ୧୫ ଜଣ ଛାତ୍ର ସହଯୋଗ କରିଥିଲେ। ସୂଚନାଯୋଗ୍ୟ, ସୁଦର୍ଶନ ଜଣେ ଅନ୍ତର୍ଜତୀୟ ସ୍ତରର ବାଲୁକା ଶିଳ୍ପୀ ହୋଇଥିବା ବେଳେ ସେ ଗିନିଜ୍ ରେକର୍ଡ ସହିତ ଅନେକ ରେକର୍ଡର ଅଧିକାରୀ ଅଟନ୍ତି। ସେ ବିଶ୍ୱ ରେକର୍ଡ ଇଣ୍ଡିଆରୁ ସାର୍ଟିଫିକେଟ୍ ପାଇ ବହୁତ ଖୁସି ଥିବା କହିଛନ୍ତି।