ନୂଆଦିଲ୍ଲୀ,୧୫/୧୦:ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଇମ୍ପାକ୍ଟ ପ୍ଲେୟାର ନିୟମକୁ ଉଚ୍ଛେଦ କରିବାକୁ ଏକ ଆଶ୍ଚର୍ଯ୍ୟଜନକ ନିଷ୍ପତ୍ତି ନେଇଛି। ଆଗାମୀ ସୟଦ ମୁସ୍ତାକ ଅଲ୍ଲୀ ଟ୍ରଫିରେ ଇମ୍ପାକ୍ଟ ପ୍ଲେୟର ନିୟମ କୌଣସି ପ୍ରକାରେ ଲାଗୁ ହେବ ନାହିଁ ବୋଲି ସମସ୍ତ ରାଜ୍ୟ କ୍ରିକେଟ ଆସୋସିଏସନକୁ ନୋଟିସ୍ ପଠାଯାଇଛି। କିନ୍ତୁ ଇଣ୍ଡିଆନ୍ ପ୍ରିମିୟର ଲିଗର ପରବର୍ତ୍ତୀ ସଂସ୍କରଣ ଅର୍ଥାତ୍ ଆଇପିଏଲ୍ ୨୦୨୫ରେ ଏହାର ବ୍ୟବହାର ଉପରେ କୌଣସି ପ୍ରତିବନ୍ଧକ ନାହିଁ।
ବିସିସିଆଇ ରାଜ୍ୟଗୁଡ଼ିକୁ ପଠାଯାଇଥିବା ନୋଟିସ୍ରେ ଲେଖିଛି, ଦୟାକରି ଧ୍ୟାନ ଦିଅନ୍ତୁ ଯେ ବିସିସିଆଇ ଚଳିତ ଘରୋଇ ସିଜନରୁ ଇମ୍ପାକ୍ଟ ପ୍ଲେୟାର ରୁଲ୍ ହଟାଇବାକୁ ନିଷ୍ପତ୍ତି ନେଇଛି। ଆଇପିଏଲର ଗତ ସିଜନରେ ରୋହିତ ଶର୍ମା ଏବଂ ବିରାଟ କୋହଲିଙ୍କ ଭଳି ଶୀର୍ଷ ଖେଳାଳି ମାନେ ମଧ୍ୟ ଇମ୍ପାକ୍ଟ ପ୍ଲେୟାର ନିୟମକୁ ବିରୋଧ କରିଛନ୍ତି ।
ସେହିପରି ଗତ ସିଜନରେ ମହମ୍ମଦ ସିରାଜ କହିଥିଲେ, ଏହି ନିୟମ ଲାଗୁ ହେବା ପରେ ଆଇପିଏଲରେ ବୋଲରଙ୍କ ପାଇଁ ଆଉ କିଛି ବାକି ନାହିଁ। ଅଲରାଉଣ୍ଡର ଖେଳାଳିଙ୍କ କ୍ୟାରିୟର ନଷ୍ଟ ହେବାର କାରଣ କୁହାଯାଉଥିବାରୁ ଏହି ନିୟମକୁ ମଧ୍ୟ ସମାଲୋଚନା କରାଯାଇଥିଲା। ଏସବୁ ସତ୍ତ୍ୱେ ଅଧିକାଂଶ ଆଇପିଏଲ୍ ଦଳର ମାଲିକ ଏବଂ ପ୍ରସାରଣକାରୀ କହିଛନ୍ତି ଯେ ଏହି ନିୟମ ଲାଗୁ ହେବା ଦ୍ୱାରା ଟୁର୍ଣ୍ଣାମେଣ୍ଟ ଅଧିକ ରୋମାଞ୍ଚକର ଏବଂ ପ୍ରତିଯୋଗିତାମୂଳକ ହୋଇଛି।
ଏବେ ଇମ୍ପାକ୍ଟ ପ୍ଲେୟର ରୁଲକୁ ଭାରତୀୟ ଘରୋଇ କ୍ରିକେଟରୁ ହଟାଇ ଦିଆଯାଇଛି, କିନ୍ତୁ ଆଇପିଏଲ ୨୦୨୫ ପରେ ମଧ୍ୟ ଏହି ନିୟମ ଲିଗ୍ ରେ ଜାରି ରହିବ କି ନାହିଁ ତାହା ଦେଖିବା ଆକର୍ଷଣୀୟ ହେବ। ବର୍ତ୍ତମାନ ଏହା ନିଶ୍ଚିତ ଯେ ଆଇପିଏଲର ପରବର୍ତ୍ତୀ ସିଜନରୁ ଇମ୍ପାକ୍ଟ ପ୍ଲେୟର ନିୟମ କୌଣସି ସ୍ଥାନକୁ ଯିବ ନାହିଁ। ଏହାବ୍ୟତୀତ ସୟଦ ମୁସ୍ତାକ ଅଲ୍ଲୀ ଟ୍ରଫି ଉପରେ ନଜର ପକାଇଲେ ବିସିସିଆଇ ଘରୋଇ ଟି-୨୦ କ୍ରିକେଟରେ ଗୋଟିଏ ଓଭରରେ ୨ଟି ବାଉନ୍ସର ବଲ୍ ନିୟମକୁ ପୁଣି ଥରେ ଲାଗୁ କରିଛି।