ବମ୍ବେ: ମନୋରଞ୍ଜନଜଗତରେ ହାସ୍ୟ ଅଭିନେତା ଭାବେ ସୁଦେଶ ଲେହରି ବେଶ୍ ଲୋକପ୍ରିୟ। ପଞ୍ଜାବର ଜଲନ୍ଧରରେ ତାଙ୍କର ଜନ୍ମ। ହେଲେ ଅମୃତସରରେ ତାଙ୍କର ପିଲାଦିନ କଟିଥିଲା। ଆଜି ତାଙ୍କୁ ସଫଳ କମେଡିଆନ୍ ବୋଲି କୁହାଯାଉଥିଲେ ହେଁ ଦିନ ଥିଲା ସେ ବହୁତ ଗରିବ ଥିଲେ। ଦିନକୁ ବେଳାଏ ଖାଇବାକୁ ତାଙ୍କୁ ମିଳୁ ନ ଥିଲା। ହେଲେ ଜୀବନରେ କେବେ ହେଁ ହାର ନ ମାନିବା ଏବଂ ଚେଷ୍ଟା କରି ସେ କୋଟି କୋଟି ଲୋକଙ୍କ ପାଇଁ ପ୍ରେରଣା ପାଲଟିଛନ୍ତି।
ସୁଦେଶଙ୍କ ବାପା ମାସକୁ ମାତ୍ର ୧୦୦-୨୦୦ ଟଙ୍କା ରୋଜଗାର କରୁଥିଲେ। ଯାହା ରୋଜଗାର କରୁଥିଲେ ତାହା ମଦ ପିଇ ଉଡାଇଦେଉଥିଲେ। ପୁରା ପରିବାର ପାଇଁ ଗୋଟିଏ ଚପଲ ଥିଲା। ପାଖରେ ପନିପରିବା କିଣିବାକୁ ଟଙ୍କା ନ ଥିବାରୁ ସେ ପାଣି ଏବଂ ଲୁଣ ସହିତ ରୁଟି ଖାଉଥିଲେ। ସ୍କୁଲରେ ସେ ପାଠପଢ଼ିନାହାନ୍ତି। କାରଣ ଟଙ୍କା ଅଭାବରୁ ତାଙ୍କୁ ଏକ ଚା’ ଷ୍ଟଲରେ କାମ କରିବାକୁ ପଡ଼ିଥିଲା।
ଦୀର୍ଘ ବର୍ଷ ଧରି ସେ ଆର୍ଥିକ ଅସୁବିଧାର ସମ୍ମୁଖୀନ ହୋଇଥିଲେ। ସେ ଚିହ୍ନାପରିଚିତ ଲୋକଙ୍କଠାରୁ ଟଙ୍କା ମାଗିବା ପାଇଁ ନିଜ ପିଲାମାନଙ୍କୁ ପଠାଉଥିଲେ। ଏକଦା ତାଙ୍କୁ ଜଣେ ଡ୍ରାଏ ଫ୍ରୁଟ୍ସ ଦେଇଥିଲେ। ହାତରେ ମୁଠାଇ ସେ ଘରକୁ ଯାଇ ଭୋକିଲା ପିଲାଙ୍କୁ ଖାଇବାକୁ ଦେଇଥିଲେ। ରୋଜଗାର ଭଲ ହେଉ ନ ଥିବାରୁ ସେ ପରିବାର ଚଳାଇ ପାରୁ ନ ଥିଲେ। ପୁରସ୍କାରକୁ ବିକ୍ରି କଲେ ୩ଶହରୁ ୪ଶହ ଟଙ୍କା ରୋଜଗାର କରିପାରିବେ ବୋଲି ସେ ଜାଣିବାକୁ ପାଇଥିଲେ। ଏହାପରେ ସେ ପରିବାରପାଇଁ ତାଙ୍କୁ ମିଳିଥିବା ପୁରସ୍କାର ବିକ୍ରି କରିଥିଲେ।
ଦ ଗ୍ରେଟ ଇଣ୍ଡିଆନ ଲାଫ୍ଟର ଚ୍ୟାଲେଞ୍ଜ-୩ ସୁଦେଶଙ୍କ ଜୀବନକୁ ବଦଳାଇ ଦେଇଥିଲା। ସେ ଏହି ଶୋ’ରେ ତୃତୀୟ ସ୍ଥାନ ହାସଲ କରିଥିଲେ। ଅପରପକ୍ଷେ କପିଲ ଶର୍ମା ପ୍ରଥମ ଏବଂ ଚନ୍ଦନ ପ୍ରଭାକର ଦ୍ୱିତୀୟ ସ୍ଥାନ ହାସଲ କରିଥିଲେ। ଏହାପରେ ସେ ଦେଖ ଇଣ୍ଡିଆ ଦେଖ, କମେଡି ସର୍କସ, କମେଡ କ୍ଲାସେଜ୍ ଭଳି ଅନେକ କମେଡି ଶୋ’ରେ ଭାଗ ନେଇଥିଲେ। ସେ ଅନେକ ଟ୍ରଫି ଜିତିବା ସହ ପରିଶ୍ରମ ଦ୍ୱାରା ଖ୍ୟାତି ଅର୍ଜନ କରିଥିଲେ।
ଏବେ ସେଲିବ୍ରିଟି ପାଲଟିଥିଲେ ହେଁ ସୁଦେଶ ନିଜର ନମ୍ରତା ଏବଂ ଭଦ୍ର ବ୍ୟବହାରକୁ ନେଇ ଜଣାଶୁଣା। ଅନେକ ସମୟରେ କ୍ରିଷ୍ଣା ଅଭିଷେକ ତାଙ୍କ ଘରକୁ ବୁଲି ଯାଉଥିବା ବେଳେ ତାହା ଏକ ୫ ଷ୍ଟାର ନୁହେଁ ବରଂ ୭ ଷ୍ଟାର ହୋଟେଲ ବୋଲି କହିଥାନ୍ତି। ତେବେ ଆଗାମୀ ଦିନରେ ତାଙ୍କୁ କପିଲଙ୍କ ଶୋ’ରେ ଦେଖିବାକୁ ମିଳିବ।