ଢେଙ୍କାନାଳ,୨୮ା୩(ରତନ ନାୟାର)ଢେଙ୍କାନାଳ ଜିଲାର ୪ଟି ବିଧାନସଭା ନିର୍ବାଚନ ମଣ୍ଡଳୀରୁ ୩ଟି ବିଧାନସଭା ନିର୍ବାଚନମଣ୍ଡଳୀ ପାଇଁ ବିଜେଡି ପକ୍ଷରୁ ବୁଧବାର ପ୍ରାର୍ଥୀ ଘୋଷଣା କରାଯାଇଛି। ଢେଙ୍କାନାଳ, କାମାକ୍ଷାନଗର ଓ ପରଜଙ୍ଗ ନିବାଚନମଣ୍ଡଳୀରେ ବିଜେଡି ପ୍ରାର୍ଥୀ ଅପରବର୍ତ୍ତିତ ରହିଛନ୍ତି। ଢେଙ୍କାନାଳ ବିଧାନସଭା ନିର୍ବାଚନ ମଣ୍ଡଳୀରେ ବିଜେଡି ବିଧାୟକ ସୁଧୀର କୁମାର ସାମଲ, କାମାକ୍ଷାନଗର ବିଧାନସଭା ନିର୍ବାଚନ ମଣ୍ଡଳୀରେ ମନ୍ତ୍ରୀ ତଥା ବିଧାୟକ ପ୍ରଫୁଲ୍ଲ କୁମାର ମଲ୍ଲିକ ଏବଂ ପରଜଙ୍ଗ ବିଧାନସଭା ନିର୍ବାଚନମଣ୍ଡଳୀରେ ବିଧାୟକ ତଥା ଜିଲା ବିଜେଡି ସଭାପତି ଡା. ନୃସିଂହ ଚରଣ ସାହୁଙ୍କୁ ଦଳ ପୁଣି ପ୍ରାର୍ଥୀ କରିଛି। କିନ୍ତୁ ହିନ୍ଦୋଳ ବିଧାନସଭା ନିର୍ବାଚନମଣ୍ଡଳୀ ପାଇଁ ଦଳ ବୁଧବାର ପ୍ରାର୍ଥୀ ଘୋଷଣା କରିପାରିନାହିଁ।
ଢେଙ୍କାନାଳ ବିଧାନସଭା ନିର୍ବାଚନମଣ୍ଡଳୀରେ ଦଳୀୟ ପ୍ରାର୍ଥୀ ବିଧାୟକ ସୁଧୀର କୁମାର ସାମଲଙ୍କ ଉପରେ ଦଳ ଦ୍ୱିତୀୟଥର ପାଇଁ ଭରସା କରିଛି। ଏ ନେଇ ସୁଧୀର କହିଛନ୍ତି, ମୁଖ୍ୟମନ୍ତ୍ରୀ ଦ୍ୱିତୀୟଥର ପାଇଁ ଆସ୍ଥା ପ୍ରକଟ କରିଥିବାରୁ ପ୍ରଥମେ ତାଙ୍କୁ କୃତଜ୍ଞତା ଜଣାଉଛି। ବିଗତ ୫ବର୍ଷ ଭିତରେ ଗାଁ ଗାଁ, ଘର ଘର ବୁଲିଛୁ। ନିର୍ବାଚନମଣ୍ଡଳୀର ସଦର ଓ ଗଁଦିଆ ବ୍ଲକର ୫୦ଟି ପଞ୍ଚାୟତରେ ବିଜୁ ସଡ଼କ ଯୋଜନାରେ ରାସ୍ତା ନିର୍ମାଣ, ବିଦ୍ୟାଳୟ ରୁପାନ୍ତରଣ, ପାନୀୟଜଳ ସମସ୍ୟା, ଧର୍ମାନୁଷ୍ଠାନର ଉନ୍ନତୀକରଣ, ସ୍ବାସ୍ଥ୍ୟ, କୃଷି ଆଦି ସବୁ କ୍ଷେତ୍ରରେ ଉନ୍ନତି ହୋଇଛି। ଆସନ୍ତା ନିର୍ବାଚନରେ ବହୁତ ଭଲ କରିବୁ ଏବଂ ବିଜୟୀ ହେବୁ। ସୂଚନାଯୋଗ୍ୟ, ସୁଧୀର କୁମାର ସାମଲ ୨୦୦୪ରେ ପ୍ରଥମେ କଂଗ୍ରେସ ଟିକେଟରେ ଢେଙ୍କାନାଳ ବିଧାନସଭା ନିର୍ବାଚନ ମଣ୍ଡଳୀରୁ ବିଜୟୀ ହୋଇଥିଲେ। ଏହାପରେ ୨୦୧୯ରେ ବିଜେଡି ଟିକେଟରେ ବିଜୟୀ ହୋଇ ବିଧାୟକ ହୋଇଥିଲେ।
ସେହିପରି କାମାକ୍ଷାନଗର ବିଧାନସଭା ନିର୍ବାଚନମଣ୍ଡଳୀରେ ରାଜ୍ୟ ସରକାରଙ୍କ ବରିଷ୍ଠ ମନ୍ତ୍ରୀ ତଥା ବିଧାୟକ ପ୍ରଫୁଲ୍ଲ କୁମାର ମଲ୍ଲିକଙ୍କ ଉପରେ ବିଜେଡି ୫ମ ଥର ପାଇଁ ଭରସା କରି ପ୍ରାର୍ଥୀ କରିଛି। ସେ ଏହି ନିର୍ବାଚନ ମଣ୍ଡଳୀରୁ ୪ଥର ବିଧାୟକ ହୋଇ ୨ଟି ପାଳିରେ ମନ୍ତ୍ରୀ ହୋଇଛନ୍ତି। ଏ ସମ୍ପର୍କରେ ମନ୍ତ୍ରୀ ମଲ୍ଲିକ କହିଛନ୍ତି, କାମାକ୍ଷାନଗର ବିଧାନସଭା ନିର୍ବାଚନମଣ୍ଡଳୀରେ ବହୁ ବିକାଶମୂଳକ କାର୍ଯ୍ୟ ହୋଇଛି। ଅନେକ ଗ୍ରାମକୁ ସଂଯୋଗ ପାଇଁ ବ୍ରାହ୍ମଣୀ ଓ ରାମିଆଳ ନଦୀରେ ସେତୁ ନିର୍ମାଣ କରାଯାଇଛି। ପାନୀୟଜଳ ସମସ୍ୟାର ସମାଧାନ ସମେତ ବିଭିନ୍ନ ଉନ୍ନତିମୂଳକ କାର୍ଯ୍ୟ ହୋଇଛି। ଆସନ୍ତା ନିର୍ବାଚନରେ ଗତଥର ଅପେକ୍ଷା ବହୁ ଅଧିକ ଭୋଟରେ ବିଜୟୀ ହେବୁ।
ସେହିପରି ପରଜଙ୍ଗ ବିଧାନସଭା ନିର୍ବାଚନମଣ୍ଡଳୀରେ ୪ର୍ଥ ଥର ପାଇଁ ପ୍ରାର୍ଥୀ ହୋଇଛନ୍ତି ବିଧାୟକ ତଥା ଜିଲା ବିଜେଡି ସଭାପତି ଡା. ନୃସିଂହ ଚରଣ ସାହୁ। ସେ ଏଥିପୂର୍ବରୁ ପାଲଲହଡା ନିର୍ବାଚନମଣ୍ଡଳୀରେ ଥରେ କଂଗ୍ରେସ ଓ ଥରେ ଜନତା ଦଳର ବିଧାୟକ ହୋଇଥିଲେ। ୨୦୦୯ ମସିହାରେ ନୂତନ ପରଜଙ୍ଗ ବିଧାନସଭା ନିର୍ବାଚନମଣ୍ଡଳୀ ଗଠନ ହେବାପରେ ସେ ଲଗାତର ୩ଥର ବିଧାୟକ ହେବା ସହିତ ରାଜ୍ୟ ସରକାରରେ ମନ୍ତ୍ରୀ ମଧ୍ୟ ରହିଥିଲେ। ଏ ନେଇ ବିଧାୟକ ସାହୁ କହିଛନ୍ତି, ସମସ୍ୟା ଆସୁଥିବ, ଏହାର ସମାଧାନ ମଧ୍ୟ କରାଯାଉଥିବ। ଚଳିତ ନିର୍ବାଚନରେ ବହୁ ଭଲ ଭୋଟରେ ଜିତିବୁ। ଜିଲାର ଏହି ୩ଟି ବିଧାନସଭା ନିର୍ବାଚନ ମଣ୍ଡଳୀର ପ୍ରାର୍ଥୀ ଘୋଷଣା ହେବାପରେ ପ୍ରାର୍ଥୀମାନଙ୍କ ସମର୍ଥକଙ୍କ ମଧ୍ୟରେ ଉତ୍ସାହ ପରିଲକ୍ଷିତ ହୋଇଥିବା ଯୋଗୁ ରାଜନୈତିକ ବାତାବରଣ ଅଧିକ ସରଗରମ ହୋଇଛି।