ବରୀ, ୫।୧୦ (ଡି.ଏନ୍.ଏ.): ବନ୍ୟା ପ୍ରବାବିତ ପରିବାରକୁ ୫୦ କି.ଗ୍ରା. ଚାଉଳ ଓ ୫ଶହ ଟଙ୍କା ଲେଖାଏ ରିଲିଫ ଯୋଗାଣ ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ହେଲେ ଅଗଷ୍ଟରେ ହୋଇଥିବା ବନ୍ୟାକୁ ଇତିମଧ୍ୟରେ ମାସେ ପୁରିଥିଲେ ବି ଏ ଯାଏ ସବୁ ବିପନ୍ନ ପରିବାରକୁ ରିଲିଫ ମିଳିପାରିନାହିଁ। ବନ୍ୟାରେ ଯାଜପୁର ଜିଲା ବରୀ ବ୍ଲକ ସର୍ବାଧିକ କ୍ଷତି ହୋଇଥିବା ବେଳେ ରିଲିଫ ବଣ୍ଟନରେ ଅନିୟମିତତା ନେଇ ସବୁଠୁ ଅଧିକ ଅଭିଯୋଗ ମଧ୍ୟ ବରୀ ବ୍ଲକରୁ ଆସିଛି। ଏ ସମ୍ପର୍କିତ ବହୁ ଅଭିଯୋଗ ଇତିମଧ୍ୟରେ ଜିଲା ଓ ବ୍ଲକ ପ୍ରଶାସନ ନିକଟରେ ପହଞ୍ଚତ୍ଛି। ଏଭଳି ଆଉ ଏକ ଅଭିଯୋଗ ଆସିଛି ବରୀ ବ୍ଲକ ରତ୍ନଗିରି ପଞ୍ଚାୟତରୁ। ରତ୍ନଗିରି ପଞ୍ଚାୟତ ପାଟଣା ଗ୍ରାମର ଦିବ୍ୟାଙ୍ଗ ବିଜ୍ଞାନ ଜେନା(୨୮) ଓ ସେହି ଗ୍ରାମର ସ୍ବାମୀ ପରିତ୍ୟକ୍ତା ଡଲି ବାରିକ(୩୦)ଙ୍କ ପରିବାରକୁ ରିଲିଫ ମିଳି ନ ଥିବା ଅଭିଯୋଗ ହୋଇଛି। ପ୍ରଶାସନ ପକ୍ଷରୁ ପ୍ରସ୍ତୁତ କରାଯାଇଥିବା ବନ୍ୟା ବିପନ୍ନ ପରିବାର ତାଲିକାରେ ଡଲି ଓ ବିଜ୍ଞାନଙ୍କ ପରିବାରର ନଁା ନ ଥିବାରୁ ସେମାନଙ୍କୁ ରିଲିଫ ମିଳି ନ ଥିବା ଜଣାଯାଇଛି। ପ୍ରଭାବିତ ତାଲିକାରେ ଅନେକ ଅଯୋଗ୍ୟଙ୍କ ନଁା ରହିଥିଲେ ବି ଦୟନୀୟ ଅବସ୍ଥାରେ ଦିନ କାଟୁଥିବା ଉକ୍ତ ଦୁଇ ପରିବାରକୁ ସାମିଲ କରାଯାଇନି। ଫଳରେ ତାଲିକା ପ୍ରସ୍ତୁତି ଦାୟିତ୍ୱରେ ଥିବା କର୍ମଚାରୀଙ୍କ କାର୍ଯ୍ୟରେ ସ୍ବଚ୍ଛତା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ବନ୍ୟା ପରଠୁ ଏକାଧିକ ଥର ପ୍ରଶାସନିକ ଅଧିକାରୀଙ୍କୁ ଭେଟି ରିଲିଫ ପାଇଁ ନିବେଦନ କରିଥିଲେ ବି କିଛି ଲାଭ ମିଳିଲାନି ବୋଲି ଡଲି କହିଥିବା ବେଳେ ବିଜ୍ଞାନଙ୍କ ପରିବାର ଲୋକେ ସମାନ କଥା କହିଛନ୍ତି। ଏ ନେଇ ରତ୍ନଗିରି ସରପଞ୍ଚ ଅଶୋକ ଜେନାଙ୍କୁ ପଚାରିବାରେ, ଉଭୟ ଅତ୍ୟନ୍ତ ଗରିବ। ସେମାନେ ରିଲିଫ ପାଇବାକୁ ଯୋଗ୍ୟ, ମାତ୍ର ତାଲିକାରେ ତ୍ରୁଟି ଯୋଗୁ ସେମାନେ ଏହି ସୁବିଧାରୁ ବଞ୍ଚତ୍ତ ହୋଇଛନ୍ତି। ସେମାନଙ୍କୁ ରିଲିଫ ସାମଗ୍ରୀ ଯୋଗାଇ ଦେବାକୁ ବ୍ଲକ ପ୍ରଶାସନର ଦୃଷ୍ଟି ଆକର୍ଷଣ କରାଯାଇଛି ବୋଲି କହିଛନ୍ତି।
