ପାରାଦୀପ,୨୧ା୭(ସ୍ବ.ପ୍ର.): ପାରାଦୀପ ଉପକଣ୍ଠ ନୂଆଗଡ଼ ଗାଁର ମହିଳା ହେଲେ ସୁହାସିନୀ ବେହେରା। ମଧ୍ୟବିତ୍ତ ପରିବାର ମଧ୍ୟରେ ରହି ନିଜେ ରୋଜଗାରକ୍ଷମ ହେବା ସହ ଶତାଧିକ ମହିଳାଙ୍କ ପାଇଁ ସେ ମାର୍ଗଦର୍ଶକ ଭାବେ ପରିଚୟ ସୃଷ୍ଟି କରିଛନ୍ତି। ଏ ପର୍ଯ୍ୟନ୍ତ ୧୫୦ରୁ ଅଧିକ ମହିଳା ତାଙ୍କ ଅଧୀନରେ ସିଲେଇ ତାଲିମ ନେଇ ଭିନ୍ନ ଭିନ୍ନ ଜାଗାରେ ରୋଜଗାର କରୁଛନ୍ତି। ଚଳିତ ବର୍ଷ ସେ ଲୋକସେବା କେନ୍ଦ୍ରରେ ତାଲିମ ନେଉଛନ୍ତି। ଏହି ତାଲିମ କେନ୍ଦ୍ର ଓ ପ୍ରଶିକ୍ଷଣ ନେଉଥିବା ମହିଳାଙ୍କ ପାଇଁ ଆବଶ୍ୟକ ଭିତ୍ତିଭୂମି ଓ ସରଞ୍ଜାମ ଆଦିକୁ ସହାୟତା କରୁଛି ଏଏମ୍ଏନ୍ଏସ୍ (ଆର୍ସେଲର ମିତ୍ତଲ ନିପ୍ପନ ଷ୍ଟିଲ)କମ୍ପାନୀ। ସୁହାସିନୀ ପାରାଦୀପ କଲେଜରେ ପଢ଼ିବା ବେଳେ ଆର୍ଥିକ ଅଭାବ ଅନୁଭବ କରିଥିଲେ। ସେତେବେଳେ ସେ ଲୋକସେବା କେନ୍ଦ୍ରରେ ନାମ ପଞ୍ଜୀକୃତ କରିବା ସହ ସିଲେଇ ତାଲିମ ନେଇଥିଲେ। କଲେଜ ଶିକ୍ଷା ପରେ ସେ ସିଲେଇ କରିବା ସହ ବିଭିନ୍ନ ଡିଜାଇନ୍ର ଡ୍ରେସ୍ କରିଥିଲେ, ଯାହା ତାଙ୍କୁ ରୋଜଗାରର ବାଟ ଦେଖାଇଥିଲା। ୨୦୧୬ରେ ଏସାର ଷ୍ଟିଲ୍ (ଏବେର ଏଏମ୍ଏନ୍ଏସ୍) ସିଏସ୍ଆର କାର୍ଯ୍ୟକ୍ରମ ଜରିଆରେ ତାଙ୍କୁ ପ୍ରୋତ୍ସାହନ ଓ ଭିତ୍ତିଭୂମି ମିଳିଥିଲା। ସେଥିରେ ଅନ୍ୟ ମହିଳାମାନଙ୍କୁ ନେଇ ସ୍ବୟଂ ସହାୟିକା ଗୋଷ୍ଠୀ କରି ତାଲିମ କାର୍ଯ୍ୟ ଆରମ୍ଭ କରିଥିଲେ। ଧୀରେ ଧୀରେ ଏଥିରେ ଅଧିକ ମହିଳା ଯୋଡ଼ିହୋଇ ସିଲେଇ, ଡିଜାଇନ୍ ଆଦି କାମ କରୁଛନ୍ତି। ଏବେ ବି ଏଏମ୍ଏନ୍ଏସ୍ କମ୍ପାନୀ ସେହିଭଳି ପ୍ରୋତ୍ସାହନ ବ୍ୟବସ୍ଥା ବଳବତ୍ତର ରଖିଛି। ଏଥିରେ ଦକ୍ଷତା ବିକାଶ ହେବା ସହ ମହିଳାମାନେ ଘରେ ବସି ରୋଜଗାରକ୍ଷମ ହୋଇପାରିଛନ୍ତି ବୋଲି କମ୍ପାନୀ ନିର୍ବାହୀ ନିର୍ଦ୍ଦେଶକ ଜି. ସୁରେଶା କହିଛନ୍ତି। ଏବେ ସୁହାସିନୀ ଗାଁର ମହିଳାଙ୍କ ପାଇଁ ପରିଚୟ ପାଲଟି ଯାଇଛନ୍ତି।
