କୁଚିଣ୍ଡା,୮ା୫(ଡି.ଏନ.ଏ.): ସମ୍ବଲପୁର ଜିଲା କୁଚିଣ୍ଡା ଥାନା ମନ୍ତ୍ରୀମୁଣ୍ଡା ପ୍ରାଥମିକ ସ୍କୁଲ ଶିକ୍ଷକ ପୃଥ୍ବୀରାଜ ମହାନନ୍ଦ(୪୩) ଓରଫ ମଣ୍ଟୁଙ୍କ ଗଳାକାଟି ହତ୍ୟା କରାଯିବା ଘଟଣାର ଇତିମଧ୍ୟରେ ୩୬ ଘଣ୍ଟା ବିତିଲାଣି। ହେଲେ ଶିକ୍ଷକଙ୍କୁ କାହିଁକି ଓ କେଉଁ ପରିସ୍ଥିତିରେ ଏଭଳି ହତ୍ୟା କରାଗଲା ପୋଲିସକୁ ତାର ଟେର୍ ମିଳିନାହିଁ। କୁଚିଣ୍ଡା ପୋଲିସ ବିଭିନ୍ନ ଦିଗକୁ ଦୃଷ୍ଟିରେ ରଖି ତଦନ୍ତକୁ ଜୋରଦାର କରିଥିବା ବେଳେ ଏହି ଘଟଣାରେ ଥାନାରେ ଅଟକ ଥିବା ଜଣେ ଯୁବକ ଶୌଚାଳୟର ଟାଇଲ ଭାଙ୍ଗି ତଣ୍ଟି କାଟି ଆତ୍ମହତ୍ୟା ଉଦ୍ୟମ କରିବା ଘଟଣାକୁ ଅଧିକ ଜଟିଳ କରିଛି। ଆହତ ଯୁବକଙ୍କୁ କୁଚିଣ୍ଡା ମେଡିକାଲରେ ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ହେବାରୁ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଥିବା ଜଣାଯାଇଛି। ଏନେଇ କୁଚିଣ୍ଡା ପୋଲିସ ତଦନ୍ତରେ ବ୍ୟାଘାତ ହେବା ନେଇ କୌଣସି ତଥ୍ୟ ଦେବାକୁ ମନା କରୁଛି। ତେବେ ଟଙ୍କା ଧାରକୁ ନେଇ ଏଭଳି ହତ୍ୟାକାଣ୍ଡ ଘଟିଥିବା ଆଲୋଚନା ହେଉଛି।
ଶିକ୍ଷକଙ୍କ ହତ୍ୟା ଘଟଣାରେ ପଚରାଉଚୁରା ପାଇଁ ପୋଲିସ କୁଚିଣ୍ଡା ଥାନା ଅଧୀନ ପତ୍ରାପାଲି ଗ୍ରାମର ସୁଧାଂଶୁ କୁସୁମ ନାମକ ଯୁବକଙ୍କୁ ଶନିବାର ଥାନାକୁ ଡାକି ଅଟକ ରଖିଥିଲାା ତେବେ ସେ ଆତ୍ମହତ୍ୟା ଉଦ୍ୟମ କରିବା ନିଶ୍ଚିତ ଭାବେ ପୋଲିସ ପାଇଁ ଆଉ ଏକ ଚାଲେଞ୍ଜ ସୃଷ୍ଟି କରିଛି। କେଉଁ ପରିସ୍ଥିତିରେ ଯୁବକ ଜଣକ ଏଭଳି ଆତ୍ମହତ୍ୟା ଉଦ୍ୟମ କଲେ ତା’ର ତଦନ୍ତ କରାଯିବ ଏବଂ ଶିକ୍ଷକଙ୍କ ହତ୍ୟା ଘଟଣାରେ ଯେଉଁମାନଙ୍କ ସଂପୃକ୍ତି ରହିଛି ଖୁବଶୀଘ୍ର ତାଙ୍କୁ ଗିରଫ କରାଯିବ ବୋଲି କୁଚିଣ୍ଡା ଆଇଆଇସି ଶୋଭାକର ସେଠ କହିଛନ୍ତି। ପ୍ରକାଶଥାଉ କି, ମହୁଲପାଲି ଥାନା କୁଚିଲାପାଲି ଗ୍ରାମର ଏହି ଶିକ୍ଷକ ଜଣକ ଦୀର୍ଘ ଦିନ ହେବ ସପରିବାର କୁଚିଣ୍ଡାରେ ଘରଭଡ଼ା ନେଇ ରହୁଥିଲେ। ଶୁକ୍ରବାର ଅପରାହ୍ନ ୪ଟାରେ ସେ ଘରୁ ବାହାରି ଆଉ ଘରକୁ ଫେରି ନ ଥିଲେ। ଶନିବାର ସକାଳେ କୁଚିଣ୍ଡା ସହର ନିଟକ ଖର୍ଲା ନଦୀ ପୋଲ ପାର୍ଶ୍ୱରୁ ତାଙ୍କ ମୃତଦେହ ପୋଲିସ ଜବତ କରିଥିଲା।