ସାରସକଣା,୨୦।୯(ଡି.ଏନ୍.ଏ.): ମୟୂରଭଞ୍ଜ ଜିଲା ଝାରପୋଖରିଆ ସୀମାନ୍ତରେ ଥିବା ଏକ ଫାର୍ମାସୀ କଲେଜର ଜଣେ ଛାତ୍ର ଆତ୍ମହତ୍ୟା ଉଦ୍ୟମ କରିଛନ୍ତି। ଏହି ଘଟଣା ସାରା ଅଞ୍ଚଳରେ ଏବେ ଚର୍ଚ୍ଚାର ବିଷୟ ପାଲଟିଛି।
ମିଳିଥିବା ସୂଚନା ମୁତାବକ, ଛାତ୍ର ଜଣକ ଏକ ମେସ୍ରେ ରହୁଥିଲେ। ସୋମବାର ରୁମ୍ରେ ସେ ଏକୁଟିଆ ଥିଲେ। ତାଙ୍କ ସହିତ ରହୁଥିବା ଅନ୍ୟ ଜଣେ ସହପାଠୀ ସନ୍ଧ୍ୟାରେ ରୁମକୁ ଆସିବା ବେଳେ ଭିତର ପଟୁ କବାଟ ବନ୍ଦ ଥିବା ଦେଖିବାକୁ ପାଇଥିଲେ। ସେ ବାରମ୍ବାର ଡାକିବା ସତ୍ତ୍ୱେ କବାଟ ନ ଖୋଲିବାରୁ ପଛପଟ ଝରକା ଖୋଲି ଦେଖିବା ବେଳକୁ ଛାତ୍ର ଜଣକ ଅଚେତ ଅବସ୍ଥାରେ ପଡିଥିଲେ। ଏନେଇ ଛାତ୍ରମାନେ ଝାରପୋଖରିଆ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ଛାତ୍ରକୁ ଉଦ୍ଧାର କରି ଶୀର୍ଷା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ଛାତ୍ରଙ୍କୁ ବାରିପଦା ପିଆରଏମ୍ ମେଡିକାଲ କଲେଜ ଓ ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି । ରୁମରୁ କଳା ଫିନାଇଲ ବୋତଲ ମିଳିବା ସହିତ ବିଛଣାରୁ ମିଳିଥିବା କିଛି ଚିଠିରୁ ପ୍ରେମ ସମ୍ପର୍କକୁ ନେଇ ଛାତ୍ର ଜଣକ ଆତ୍ମହତ୍ୟା ଉଦ୍ୟମ କରିଥାଇପାରନ୍ତି ବୋଲି ପୋଲିସ ଅନୁମାନ କରୁଛି।
