ହାଇଦ୍ରାବାଦ,୨୬।୨: ଶିକ୍ଷାନୁଷ୍ଠାନଗୁଡ଼ିକରେ ଛାତ୍ରୀଛାତ୍ରଙ୍କ ଆତ୍ମହତ୍ୟା ଘଟଣା ବଢ଼ୁଥିବାରୁ ଭାରତର ପ୍ରଧାନ ବିଚାରପତି (ସିଜେଆଇ) ଡି.ଓ୍ବାଇ. ଚନ୍ଦ୍ରଚୂଡ଼ ଶନିବାର ଉଦ୍ବେଗ ପ୍ରକାଶ କରିଛନ୍ତି। ଜୀବନ ହାରୁଥିବା ପିଲାମାନଙ୍କ ପାଇଁ ସେ ବିଚଳିତ ବୋଲି କହିଛନ୍ତି। ଶିକ୍ଷାନୁଷ୍ଠାନରେ କ’ଣ ତ୍ରୁଟି ରହୁଛି, ଯେଉଁଥିପାଇଁ ଛାତ୍ରୀଛାତ୍ର ଆତ୍ମହତ୍ୟା କରିବାକୁ ବାଧ୍ୟ ହେଉଛନ୍ତି ବୋଲି ସିଜେଆଇ ଜାଣିବାକୁ ଚାହିଁଛନ୍ତି। ନିକଟରେ ଆଇଆଇଟି ବମ୍ବେରେ ଜଣେ ଦଳିତ ଛାତ୍ର ଆତ୍ମହତ୍ୟା କରିଥିଲେ। ଗୁଜରାଟର ଦର୍ଶନ ସୋଲାଙ୍କି ବମ୍ବେ ଆଇଆଇଟିରେ ପ୍ରଥମ ବର୍ଷ ଛାତ୍ର ଥିଲେ। ସେ ଗତ ୧୨ ତାରିଖରେ କୌଣସି କାରଣରୁ ଆତ୍ମହତ୍ୟା କରିଥିଲେ। ଏଭଳି ଆତ୍ମହତ୍ୟାରେ ସମାଜର ଦୁର୍ବଳ ଶ୍ରେଣୀ ବିଶେଷ ଭାବରେ ଶିକାର ହେଉଛନ୍ତି ବୋଲି ନ୍ୟାଶନାଲ ଏକାଡେମୀ ଅଫ୍ ଲିଗାଲ ଷ୍ଟଡିଜ୍ ଆଣ୍ଡ ରିସର୍ଚ୍ଚ (ଏନ୍ଏଏଲ୍ଏସ୍ଏଆର୍)ରେ ଦୀକ୍ଷାନ୍ତ ଭାଷଣ ଦେଇ ସିଜେଆଇ କହିଛନ୍ତି। ସାମାଜିକ ପରିବର୍ତ୍ତନକୁ ଆଗେଇ ନେବାରେ ବିଚାରପତିମାନଙ୍କୁ କୋର୍ଟରୁମ୍ ଭିତରେ ଏବଂ ବାହାରେ ଆଲୋଚନା କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନେବାକୁ ହେବ। ଏହି ଅବସରରେ ସେ ଗତବର୍ଷ ଓଡ଼ିଶାର ଜାତୀୟ ଆଇନ ବିଶ୍ୱବିଦ୍ୟାଳୟର ଆଦିବାସୀ ଛାତ୍ର ଆତ୍ମହତ୍ୟା ଘଟଣାକୁ ମନେ ପକାଇଥିଲେ। ଏଭଳି ଆତ୍ମହତ୍ୟା ରୋକିବାକୁ ହେଲେ ଆମକୁ ପ୍ରଥମେ ସମସ୍ୟାକୁ ଚିହ୍ନଟ କରିବା ସହ ସ୍ବୀକାର କରିବାକୁ ପଡ଼ିବ ବୋଲି ଜଷ୍ଟିସ ଚନ୍ଦ୍ରଚୂଡ଼ କହିଛନ୍ତି। ଆଇନଜୀବୀ ଏବଂ ଛାତ୍ରମାନଙ୍କ ମାନସିକ ସ୍ବାସ୍ଥ୍ୟ ଉପରେ ସେ ଗୁରୁତ୍ୱ ଦେଇଥିଲେ। ଏନେଇ ଶିକ୍ଷାକ୍ଷେତ୍ରର ନେତୃତ୍ୱ ନେଉଥିବା ବ୍ୟକ୍ତିମାନେ ମଧ୍ୟ ସମ୍ବେଦନଶୀଳ ହେବାକୁ ସିଜେଆଇ ପରାମର୍ଶ ଦେଇଛନ୍ତି।