ଭୁବନେଶ୍ୱର,୨୫।୩(ବ୍ୟୁରୋ): ଲୋକପ୍ରିୟ ଡିଜେ ଆଜେକ୍ସ ଓରଫ ଅକ୍ଷୟ କୁମାର ମହାରଣାଙ୍କ ଆତ୍ମହତ୍ୟା ଘଟଣାକୁ ଶୁକ୍ରବାର ସପ୍ତାହେ ପୂରିଛି। ଏହି ମାମଲାକୁ ନେଇ ପୋଲିସ ତଦନ୍ତ ଜାରି ରଖିଥିବାବେଳେ ପ୍ରତ୍ୟେକ ଦିନ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ତେବେ ବାନ୍ଧବୀ ଜିଜ୍ଞାସାଙ୍କ ସମେତ ୩ ଯୁବତୀ ଆଜେକ୍ସ ପାଇଁ ଏକ ହ୍ବାଟ୍ସଆପ୍ ଖୋଲିଥିଲେ ବୋଲି ଶୁକ୍ରବାର ଚର୍ଚ୍ଚା ହେଉଛି। ଅନ୍ୟ ୨ ଯୁବତୀ ମଧ୍ୟ ଆଜେକ୍ସଙ୍କ ବାନ୍ଧବୀ ଥିଲେ। ଆଜେକ୍ସ ସମସ୍ତଙ୍କ ସହ ସମ୍ପର୍କ ରଖିଥିବା ଜାଣିବା ପରେ ସେମାନେ ପରସ୍ପର କଥାହୋଇ ଏକ ହ୍ବାଟ୍ସଆପ୍ ଗ୍ରୁପ୍ ଖୋଲିଥିଲେ। ଉକ୍ତ ଗ୍ରୁପ୍ରେ ଆଜେକ୍ସଙ୍କ ସମ୍ପର୍କରେ ସେମାନେ ଆଲୋଚନା କରୁଥିଲେ ବୋଲି ସାଇବର ଟିମ୍ ଜାଣିବାକୁ ପାଇଛି। ହେଲେ ଏହାକୁ ଆଜେକ୍ସଙ୍କ ମା’ ଲକ୍ଷ୍ମୀପ୍ରିୟା ମିଥ୍ୟା ବୋଲି କହିଛନ୍ତି। ଆଜେକ୍ସ କେବଳ ଜିଜ୍ଞାସାଙ୍କୁ ଭଲ ପାଉଥିଲେ ଏବଂ ତାଙ୍କ ପାଇଁ ସେ ଆତ୍ମହତ୍ୟା କରିଥିଲେ। ପୋଲିସ ଠିକ୍ ଭାବେ ତଦନ୍ତ କରି ସତ୍ୟତା ପଦାକୁ ଆଣୁ ବୋଲି ଲକ୍ଷ୍ମୀପ୍ରିୟା କହିଛନ୍ତି। ଏନେଇ ଥାନାଧିକାରୀ ରଜନୀକାନ୍ତ ପ୍ରଧାନ କହିଛନ୍ତି, ହ୍ବାଟ୍ସଆପ୍ ଗ୍ରୁପ୍ ନେଇ ଆମ ପାଖରେ କୌଣସି ତଥ୍ୟ ନାହିଁ। ଏହି ମାମଲାରେ ଡିଜିଟାଲ ପ୍ରମାଣକୁ ନେଇ ସାଇବର ଟିମ୍ ଅଧିକ ତଦନ୍ତ କରୁଛି। ଉକ୍ତ ଟେକ୍ନିକାଲ ଟିମ୍ ରିପୋର୍ଟ ଦେବା ପରେ ଅଧିକ କିିଛି ସୂଚନା ମିଳିପାରିବ। ଉକ୍ତ ରିପୋର୍ଟକୁ ଆଧାର କରି ଆଗାମୀ ଦିନରେ ଆଉ କେତେଜଣଙ୍କୁ ପଚରାଉଚରା କରାଯିବ ବୋଲି ସେ କହିଛନ୍ତି।
ସୂଚନାଯୋଗ୍ୟ, ମାର୍ଚ୍ଚ ୧୮ ରାତିରେ ଖାରବେଳନଗର ଥାନା ଅନ୍ତର୍ଗତ ଇଣ୍ଡଷ୍ଟ୍ରିଆଲ୍ କଲୋନୀସ୍ଥିତ ବାସଭବନରେ ଆଜେକ୍ସ ଫ୍ୟାନ୍ରେ ବେଡ୍ଶିଟ୍ ଦ୍ୱାରା ଝୁଲି ଆତ୍ମହତ୍ୟା କରିଥିଲେ। ତେବେ ଏହାପଛରେ ବାନ୍ଧବୀ ଜିଜ୍ଞାସା ଏବଂ ତାଙ୍କ ନୂଆ ପୁରୁଷବନ୍ଧୁଙ୍କୁ ପରିବାର ଲୋକ ଦାୟୀ କରିଥିଲେ। ପୋଲିସ ଏନେଇ ଆତ୍ମହତ୍ୟା ପାଇଁ ପ୍ରବର୍ତ୍ତାଇବା ଅଭିଯୋଗରେ ଆଇପିସି ଦଫା ୩୦୬ରେ ଏକ ମାମଲା (ନଂ.୧୨୧/୨୦୨୩) ରୁଜୁ କରି ତଦନ୍ତ ଜାରି ରହିଛି।
